2 NENG SATANG 27 - Khumi Common Language Bible

Juda samrang Jotham

¹ Jotham ly saneng 25 rei khala samrang lyn i, Jerusalem mary y saneng holai tariurei peang nai ne. Ni i amhm ly Zadok i chaniu Jerusa ne.

² Ni ly ampo kamta Areng i mei ka-niu y kahawichi sa. Na i py ni ly ampo kamta Achura yhm theung kun iy kamngo so y leang. Khumi mipuichi naini kamngo sa kari sa u nai ne.

³ Achura yhm tosyh mang katheu pa-kho sa iy, Jerusalem mary Ophel meingtymra i mary apai kakhaw sa nai keung ly Jotham ne.

⁴ Ni ly Juda pri mawi aheungchi salo y marychi sa iy, mawi ka-sangchira y khaw parai nairachi hawi angdeangrachi sa.

⁵ Ni ly Ammon samrang hawi ni i tavaimichi ai tiu nai pajau. Naibaly ni ly Ammon chengchi ai sanengrei y muku kaji sie 6225rei, chohpui chomaw teaung 205,000 rei hawi chajai choh teaung 205,000 rei, saneng thomrei pei hai bo.

⁶ Jotham ly mymy i Areng Tameuh my leu pei nai ai sai py takhawi y naimy tangai nai deaungkho y, sa thai naira len ryh len ryh nai ne.

⁷ Jotham i peang nai deung y atiti tym naichi, tavai atiu nai leaungsaichi hawi ni i lam patei naichi ai Israela hawi Juda samrangchi i cha-iu theung y tajiu pi typ bo.

⁸ Jotham ly saneng 25 rei khala samrang lyn i, Jerusalem mary y saneng holai tariurei peang.

⁹ Ni dei nai khala ni ai Davida mary y up bo. Chapo Ahazi ly ampo i meingtym samrang y lyn nai ne.