2 NENG SATANG 22 - Khumi Common Language Bible

Juda samrang Ahazia

¹ Arab cheng phyreichi my tiu i, samrang Jehoram i chapo kasawi keh Ahazia ai naini khai iy huni bo i chapo bawibawichi ai padei chauchau. Hunai deaungkho y Jerusalem mary i khumichi ly Ahazia ai ampo i meingtym samrang y palyn u bo.

² Ahazia ly saneng 22 reisaneng y samrang lawm i, Jerusalem mary y sanengrei peang. Ni i amhm ly Israela samrang Omari i katu, samrang Ahab i chaniu Athalia ne.

³ Amhm my hawi y nai katauchi pei nai deaungkho y, Ahazia ly samrang Ahab yhm dengtheungchi i sa nai lam y abang nai ne.

⁴ Ampo dei nai bo y mymy ai tau pei nai miteaung kehchi ly Ahab i yhm dengtheungchi ne i, Ahazia ly Areng i tlang tleaung y kamngo sa i phra bo.

⁵ Ni ly huni khumichi i tau pei nai tangai i, Israela samrang Joram hawi Suria samrang Hazaela nini tavai atiu nai khala, Joram ai sabawm. Kilead pri Ramoth mary y atiu nai khala, Joram ly tamo nga nai deaungkho y,

⁶ tamo asi atang ai nai Jezarela mary y vawi teang bo. Huna nai khala Ahazia py, ni ai no de ai nai huni mary y chei nai ne.

⁷ Tameuh my tahyh yb nai kamta huna nai tym nai y, Ahazia ly dei nai ne. Ahazia ly huni mary y Joram hawi vanrei awm nai thym khala, Ahab i samrang kangpreang myh vui nai molam y, Areng my vawi takhra nai Nimshi i chapo Jehu hawi avum bo.

⁸ Jehu ly Ahab i samrang kangpreang tlang tleaung y Tameuh i pacheang yb nai ai sa nai thym khala, Ahazia teng abang nai Juda miteaung kehchi hawi Ahazia i chapomochi ai avum bo.

⁹ Jehu ly huni khumichi ai padei be chum baly, khumi phyreichi ai Ahazia ai hau hai bo. Nichi ly Samari mary y aheu nai Ahazia ai niu i, Jehu teng y tym hai. Naibaly Ahazia ai padei u bo. Na i py nichi ly Areng i kalop ai paleung apei parai naimy sa nai samrang Jehoshapha ai tahm khai nai deaungkho y, ni i katu Ahazia i veu ai ly up nai ne. Ahazia yhm dengtheung i dengdairei pri peang ai nai khumi leaungrei py by y leang bo.

Juda samrangnu Athalia

¹⁰ Ahazia i amhm Athalia ly chapo ai padei nai satang thai phai thai baly, Juda pri y awm nai samrang kangpreang ngiereichi ai padei pawn nai ne.

¹¹ Ahazia ly Jehosheba napi nai (ampo vanrei, amhm takhra nai) tuicho leaungrei awm. Ni ly Jehojada napi nai pathyp pi nai keung hawi yhmtheaung sa. Jehosheba ly padei ai nai samrang chochi theung i Ahazia i chapo Josha, deaungdi kry nai keung hawi vanrei, Achura yhm takun theung y heu vui bo. Ni ly huna nai heu vui nai deaungkho y, Athalia my padei ai naira i nai lawi hai bo.

¹² Athalia my peang nai thym khala Josha ly Achura yhm theung y saneng tariurei aheu nai ne.