2 NENG SATANG 19 - Khumi Common Language Bible

Jehoshapha ai amo my thuitamawn nai

¹ Juda samrang Jehoshapha ly Jerusalem mary samrang yhm y hawihai palai tym teang bo.

² Hanani ni i chapo amo Jehu ly samrang teng y chei i ni teng y, “Samrang nang ly khumi hawi y naichi ai sabawm lawh a? Areng ai niu ngai y nai khumichi hawi ahawi ka-dawi asa lawh a? Hunichi molam y Areng i kado theu nai ly nang i tlang tleaung y tym nai bo.

³ Na i py nang ly khumichi chiu nai Asherah tameuhnu i tamkhawn bawibawichi taphra pawn iy, Areng i kangai atho sa nai deaungkho y, nang teng y hawi nai sai maidenrei awm rai,” napi.

Jehoshapha i sa palai naichi

⁴ Jehoshapha ly Jerusalem mary samrang yhm y awm teu i py, tokalawi mang Berasheba mary dengdai tosyh mang mawi nawi nai Ephraim khujyh tym pa-rei, khumichi ai mymychi amsi pajochi i Areng Tameuh teng y ali teang ai nai avawrei amki nai ne.

⁵ Ni ly Juda pri khaw parai nai mary tleirei y, tara chih nai keungchi khai pi i

⁶ nichi teng y, ““Hawihai palai dawn iy tara chih u. Khumi my pei nai sa thai naira hawi ny y, Areng my pei nai sa thai naira hawi sa nai ne. Nangchi tara chih nai thym khala, mymy ly nangchi hawi vanrei awm.

⁷ Areng ai jei kaji naimy, hawihai palai so u. Ati mana nai mo na baly achi i Areng Tameuh ly li-tapawp nai, meimai khen patleh nai, un cha naichi ai niu ngai y nai deaungkho y ne,” napi.

⁸ Jehoshapha ly mary i khumichi tengtawi ajo athui naichi hawi Areng i Reita taphra naichi ai tara chih ai nai molam, Levi theaungchi hawi mary i miteaung kehchi ai tara chih nai keung y khai bo.

⁹ Samrang my huni khumichi teng y, “Nangchi ly Areng ai jei kaji nai paleung hawi nangmychi i kalopchi so u. Leu meitang teaung iy meimai khen patleh y naimy so u.

¹⁰ Mary takhrachira awm nai amy cheng tengtawi atleh nai py ne sy, reita tanyn hawi Reita leu pei naichi taphra nai py ne sy, nangchi teng y tym hai nai tleirei, nichi ly tara chih naira y Areng i tlang tleaung y tamang y ai nai, nangchi my hawihai palai thui pi ai nai tla. Huna kamta so y lawh baly nangchi hawi nangchi i tlang tleaung y Areng i kado theu naira tym ai. Na i py nangchi ly nangmychi i sa ai avo nai kamta sa u lawh baly, kamngo tlo y ai.

¹¹ Reita leaungsai ka-jo kahm tleirei y pathyp pi nai keung kalen keh Amariah my ne sy, tara kahm ngierei ly Ishamaela i chapo Zebedia my ne sy, kangkhym i sa thai naira awm nai keung lawm ai nai tla. Tara jeungchira i chih chum naichi ai bawi la ai nai ly Levi theaungchi i kalop ne. Nangchi ly hini leu pei naichi ai vam parai naimy su u. Areng ly khumi kahawi ngiereichi teng y awm hai sy,” napi.