2 NENG SATANG 18 - Khumi Common Language BibleAhab ai amo Mikaia my pany hai nai ( 1 Ar 22.1–28 ) 1 Samrang Jehoshapha ly nang chawn iy, amyn amthang nai khala, Israela samrang Ahab i yhm dengtheungchi hawi vui ala i, miso ateaung u bo. 2 Saneng kra kyh nai khala Jehoshapha ly Ahab teng y pavai ai nai Samari mary y tym. Ahab ly Jehoshapha hawi vanrei, ni i khumichi ai tahm khai ai ngai nai deaungkho y, si hawi beram neangneang tleh hai iy, cha nei pawi sa. Ni ly Jehoshapha ai mymy hawi vanrei, Kilead pri Ramoth mary y tiu ai nai parawi bo. 3 Ni my, “Nang ly Ramoth mary y tiu ai nai kai hawi vanrei chei ai a?,” nanai deng. Jehoshapha my, “Nang chei ai nai angveirym baly kai py angveirym nai teu bo. Kai i tavaimi kamkawm py hunai kamta ne teang. Kai ly nang hawi amkawm ai,” napi 4 Naibaly ni my thui bi nai ly “Na i py hini molam y Areng hawi adeng man rai,” napi. 5 Hunai deaungkho y Ahab ly amo leaung 400 reichi ai palau i nichi teng y, “Kai ly Ramoth mary y tiu ai nai avo a, avo y a?,” nanai deng bo. Amochi my, “Huni mary ai tiu ba. Areng my nang ai eaung naira pei ai,” napi u. 6 Na i py Jehoshapha my, “Ani i vui Areng teng y deng pi ai nai amo takhra by y bo a?,” napi. 7 Ahab my, “Takhra amo leaungrei awm rai. Ni ly Imala i chapo Mikaia ne. Na i py ni ly kai i vui mana khala py kahawi thui vai y; hawi y naira naini thui khyh nai deaungkho y, ni ai kai ly mei angai y,” napi. Huna nai khala Jehoshapha my, “Nang ly tuni leu thui ngau y,” napi. 8 Hunai deaungkho y samrang Ahab ly samrang yhm i miteaung keh leaungrei ai palau iy, Mikaia ai vaimy jeu hai praw ai nai pato bo. 9 Samrang leaung nyhrei ly samrang ateaungchi amthyp hawi iy, Samari mary, apai pa-kho khaileaung kakaura, samrang atehra bailang tleaung y ateh hawi bo. Nini i mo y amo bawibawichi ly amo leu thui u nai ne. 10 Nichi theung i amo leaungrei, Khenanah i chapo Zedekiah ly tamo taki kamsuichi sa iy Ahab teng y, “Areng my, ‘Nang ly hini taki kamsuichi hawi Suria tavaimichi ai tiu baly eaung ai mang,’ nanai ang napi,” napi. 11 Takhra amo bawibawichi my py, huna nai kamta samrang teng y thui u. Nichi my, “Ramoth mary y tiu ba. Areng ly nang ai eaung hai ai mang,” napi u. 12 Huni thym khala Mikaia ai palau nai samrang yhm i miteaung keh my Mikaia teng y, “Amo bawibawichi my samrang ly eaung ai, nanai thui u bo. Nang py hunai kamta thui teang ba,” napi. 13 Na i py Mikaia my, “Kai ly Areng i leu pei nai kamta thui pi ai, nanai heng nai Areng i amyn y adeu naimy kathui bo!,” napi. 14 Ni ly samrang i mo y tym nai khala samrang my, “Mikaia awi, samrang Jehoshapha kaini ly Ramoth mary y tiu ai nai avo a, avo y a?,” nanai deng. Mikaia my, “Tiu ba! Eaung ai mang. Areng my nang ai eaung hai ai,” napi. 15 Na i py Ahab my, “Areng i amyn y thui baly kateng naini thui ai nai avo, nanai nang ai kaimy tlen majirei kang thui ai mo?,” napi. 16 Huna nai khala Mikaia my, “Israela khumichi ly typ nai keung by y nai beramchi kamta, mawi aheungchira y ahei nai kaniu bo. Areng my py, “Hini khumichi ly lu sa nai keung by y. Nichi ai mychi i avang saleaung y vawi ai nai pei pi,’ ang napi,” napi. 17 Ahab ly Jehoshapha teng y, “Hini khumi ly mana khala py kai i vui kahawi thui y. Hawi y naini thui khyh, nanai nang ai kang thui pi chum bo,” napi. 18 Mikaia my Ahab teng thui pi bi nai ly “Areng my thui nai leu vai, tangai ba! Areng ly kani pri bailang salo y ateh nai ai py, mymy sahawi y kani pri amtaw thauchi angdo u nai ai py, kaniu bo. 19 Areng my, ‘Ahab ly Ramoth mary y chei iy, padei nai avum ai nai ni ai ami my li-tapawp ai mo?,’ nanai deng baly kani pri amtaw thauchi my, leaung leaungrei thui pi akyhkyh nai ne. 20 Kangkhym y phailo harei ly Areng i mo y jeu iy, “Hini khumi ai kaimy li-tapawp ai,’ napi. Areng my, ‘Mana tapawp ai mo?,’ nanai deng baly 21 phailo my, ‘Kai ly Ahab i amochi teng chei iy, nichi ai li-tapawp nai leu thui hai ai,’ napi. Areng my py, ‘Nang chei iy Ahab ai tapawp hyp ba; eaung naira nga ai,’ nanai leu pei bo,” napi. 22 Naibaly Mikaia my, “Areng ly hini amochi ai nang teng y tapawp nai leu thui hai bo. Na i py nang i avum ai nai ka-jeira ly Areng mymy kypkyp my pasym pi ai!,” napi. 23 Huna nai khala amo Zedekiah ly Mikaia sahawi y athui iy, tangbeng y tabeang naimy, “Areng i phailo ly nang teng leu pei ai nai mani neng y, kai teng i nai theu mo?,” nanai deng. 24 Mikaia my, “Nang abyh ai nai takun mang y kun nai khala pany ai,” napi. 25 Naibaly Ahab ly mymy i samrang yhm miteaung keh leaungrei teng y, “Mikaia ai patiu ly mary lu areng Ammon hawi samrang i chapo Joasa teng y pahawi jo. 26 Ni ai theaung palo ly kai hawihai palai kang vawi teang nai neng ryrei, tako hawi tui naini pei ai nai khumichi teng y thui pi,” napi. 27 Mikaia my, “Samrang nang ly hawihai palai vawi ali teang lawh teu baly, kai i thui nai leu ly Areng my pei nai leu ny y!,” napi. Huni bo y, “Khumi bawibawichi awi, kai i thui nai leu tangai u!,” napi. Ahab dei nai ( 1 Ar 22.29–35 ) 28 Naibaly Israela samrang Ahab hawi Juda samrang Jehoshapha nini ly Kilead pri Ramoth mary y tiu ai nai chei hawi bo. 29 Ahab my Jehoshapha teng y, “Tavai keung y amsa nai khala kai ly mo-cha ataphra vui ai. Na i py nang ly samrang ateaungchi apathyp iy chei ba,” napi. Huna nai thui chum baly Israela samrang ly mo ataphra iy, tavai keung y amsa bo. 30 Suria samrang ly my i tavai ka-ri lu sa naichi teng y, Israela samrang ny y baly takhra ami ai py tiu y ai nai leu pei bo. 31 Naibaly nichi ly samrang Jehoshapha ai niu nai khala, Israela samrang palawn iy alengli teang i tiu u bo. Na i py Jehoshapha aeu nai khala, Areng Tameuh my ni ai ama hai i, paleung ka-echi ly takhra mang y amhi iy tiu u. 32 Tavai ka-ri lu sa naichi ly Israela samrang ny y, nanai pany baly aheang vui nai ne. 33 Na i py Suria risa leaungrei ly thailiho chynrei ko i, athang khai y naimy Ahab i tamo baichu tawm sala y chawm khyp bo. Samrang ly mymy ai thailiho chyn chawn bo, nanai thui chum baly tavai ka-ri lu teng y, tavai keung i nai angam mang y theu ai nai leu pei. 34 Tavai atiu nai thym khala samrang Ahab ly Suria tavaimichi mang y motha naimy, mymy i ka-ri salo y ateh iy anghawi. Naibaly kani dym nai khala dei bo. |
Khumi Common Language Bible © Bible Society of Myanmar, 2005.
Bible Society of Myanmar