2 NENG SATANG 15 - Khumi Common Language Bible

Asa i sa palai naichi

¹ Tameuh i phailo ly Oded i chapo Azariah tlang tleaung y tym i,

² Azariah ly samrang Asa teng y chei i, ni teng y, “Aw samrang Asa hawi vanrei Juda hawi Benjamin theaungchi awi, kai i leu tangai u! Nangchi ly Areng teng y awm nai ryrei, mymy ly nangchi hawi vanrei awm ai. Nangchi ly mymy ai hau u baly mymy ly nangchi hawi ka-vum sa ai. Na i py nangchi ly mymy ai nithun thun u lawh baly, mymy py nangchi ai ang khai su ai.

³ Israela chengchi teng y Tameuh meitang awm pi jo y, thui parip ai nai pathyp pi nai keungchi by y, reita py by y.

⁴ Na i py patang naira tym nai khala, nichi ly Israela chengchi i Areng Tameuh teng y ali iy, mymy ai hau baly avum bo.

⁵ Huni thym khala pri tleirei tlamsa naira by y nai deaungkho y, ami py chymme naimy khuleaung chei u pajau y.

⁶ Tameuh my khumichi teng y patang nairachi tym hai nai deaungkho y, pri harei my pri harei ai, mary harei my mary harei ai ana u nai ne.

⁷ Na i py nangchi ly ham parai nai awm u. Paleung atho di u moh. Nangchi i sa nai kalop molam y amtheaung naira nga u ai,” napi.

⁸ Hina nai Oded i chapo Azariah my thui nai amo leu thai nai khala, Asa ly atho nga i, Juda khu ka-peang, Benjamin khu ka-peangchi hawi mawi nawi nai Ephraim pri marychira i mynchi taphra vui bo. Samrang ly Achura yhm apai theung i maicham py, sa palum teang nai ne.

⁹ Areng ly Asa hawi vanrei awm, nanai niu nai deaungkho y, Ephraim, manase hawi Simeon khu ka-peang theung i khumi neangneangchi ly Asa mang y abawi u iy, ni i pri y ang pyn u nai ne. Asa ly hini khumi bawibawichi ai py, Benjamin hawi Juda khumichi ai py, angym u ai nai leu pei bo.

¹⁰ Nichi ly Asa i peang nai saneng holai pangrei, pa-thom lo Jerusalem mary y angym u nai ne.

¹¹ Huni kani y nichi ly tavai keung y mychi nga nai vawnsaichi theung i si amai 700 rei hawi beram amai 7,000 reichi hawi Areng teng y apathyp u bo.

¹² Nichi ly mymychi i amsi pajochi i Areng Tameuh ai, paleung hawi tlang verei chiu ai, nanai Leu Maikawm sa u nai ne.

¹³ Theang nai py ne sy, len nai py ne sy, neampacho py ne sy, neampachy py ne sy, ami py ne sy mymy ai chiu y lawh baly, huni khumi ai ly padei ai.

¹⁴ Huni khumichi ly hini Leu Maikawm khaw hai ai, nanai Areng i amyn y raawi pajeng parai naimy vaineng abeu u bo. Naibaly nichi ly aeu u iy bawchi eng u.

¹⁵ Juda khumi bawibawichi ly paleung hawi tlang verei Leu Maikawm asa u nai deaungkho y amo theu u bo. Nichi ly paleung hawi verei ahihawi nai deaungkho y, Areng ly nichi i ahihawi nai kawn pi i, meingtym tleirei y tlamsa hai bo.

¹⁶ Samrang Asa ly my i amsichy Maakath ai amhm samrangnu ra i nai pala vui bo. Ati mana nai mo na baly Maakath ly khaileaung hawi hai nai tameuhnu Asherah ai chiu ai nai molam, khen hawi y nai myn sa nai deaungkho y ne. Asa ly huni mynchi taphra piupa vui iy Kidron leaunghawi ra y mai veang hai bo.

¹⁷ Myn y chiu nai meingtym awm nai ngiereichi taphra y tei i py, Asa ly mymy deungrei Areng ai ym nai ne.

¹⁸ Ni ly Areng teng y ampo my talam nai ateaung ngiereichi ai, mymy kypkyp my talam nai muku, tangka, ateaung alangchi hawi vanrei Achura yhm y khai nai ne.

¹⁹ Ni i peang nai saneng 35 ryrei ly tavai atiu bi y leang bo.