2 NENG SATANG 12 - Khumi Common Language Bible

Juda pri y Aikupta chengchi khu ta-ie nai

¹ Rehoboam ly mymy i sa thai naira khaw ai nai sa chum baly, ni hawi ni i khumi bawibawichi ly Areng i Reita khai u su bo.

² Leu atangai y nai deaungkho y my i peang nai pa-ngo saneng y, Aikupta samrang Shisha ly Jerusalem mary y tiu.

³ Ni ly tavai ka-ri 1,200 rei, keaungngo atang nai risa leaung 60,000 rei hawi, Libyan khumi, Sukki khumi, Ethiopia khumi raurei, kati leila y nai risachi abawi nai tavaimi kamkawm pui ai lu sa nai ne.

⁴ Ni ly Juda pri i awm nai amtangra marychi ai tiu vui iy, Jerusalem mary y tym pa-rei tavai thau bo.

⁵ Shisha kiu i tleaung ai nai molam Jerusalem mary y angym u nai samrang Rehoboam hawi Juda miteaung kehchi teng y amo Shemaiah chei i, nichi teng y, “Areng my, ‘Nangchi ly kai ai khai u su nai deaungkho y, kai ly nangchi ai Shisha i kiu y au veng bo,’ ang napi,” napi.

⁶ Samrang hawi miteaungkehchi ly mymychi i kamngo sa nai apany u i, “Areng ly meitang ne,” nanai thui u.

⁷ Areng my huna naichi niu nai khala, Shemaiah teng y thui pi bi nai ly “Nichi ly mymychi i kamngo apany u nai deaungkho y, kai ly nichi ai taphra ai ny y. Na i py Shisha my tiu nai molam y nichi ly dei y naimy tleaungrum heng u ai. Jerusalem mary py kai i kado theu nai angym pa-rei avum u ai ny y.

⁸ Na i py Shisha ly nichi ai pajau ai. Nichi ly kai i kalop sa nai hawi khaileaung pri samrangchi i kalop sa nai ly amtleh takhra nai sai pany u ai,” napi.

⁹ Samrang Shisha ly Jerusalem mary mang y chei iy, samrang Solomon my khai pi nai muku khopuichi raurei, Achura yhm hawi samrang yhm i yhmtheaung katui bawibawichi la pi pawn nai ne.

¹⁰ Samrang Rehoboam ly huni khopuichi jeng y, kheupaja khopuichi sa iy samrang yhm apai katheu pa-kho typ nai tavai luchi teng y pei pi bo.

¹¹ Achura yhm mang y samrang chei nai tleirei, tamcheaung risachi ly huni khupui syn u iy, huni chum baly tamcheaung panglai theung y khai u teang bo.

¹² Samrang ly Areng i mo y tahm apanem nai deaungkho y, Areng i kado theu nai ly ni i tlang tleaung y tym hai bebe y leang. Naibaly Juda pri y py tlamsa naira nga nai ne.

Rehoboam i peang nai satang kadawi

¹³ Rehoboam ly Jerusalem mary samrang yhm y awm iy, sa thai naira asang nai ne. Samrang lawm nai thym khala ni ly saneng 41 rei awm. Jerusalem mary y saneng 17 rei peang. Israela theaung bawibawichi awm nai marychi theung y huni mary ai Areng ly mymy ai chiu nai meingtym vawi takhra bo. Rehoboam i amhm ly Ammon pri neampachy Naamah ne.

¹⁴ Samrang ly Areng i kangai sa ai nai paleung ka-dawn by y nai deaungkho y, hawi y nairachi sa bo.

¹⁵ Rehoboam i sa nai saichi angchei khala i dengdai kangtem khrairei, ni i yhm dengtheung recordchi ai amo Shemaiah hawi amo Iddo nini i cha-iu theung y niu pajau nai ne. Rehoboam hawi Jeroboam nini ly avawrei tavai atiu hawi.

¹⁶ Rehoboam dei nai khala ni ai Davida mary samrangchi i tapreaung y up nai ne. Ni i chapo Abijah ly ampo i meingtym samrang y atheng bo.