2 ARENG KEH 1 - Khumi Common Language Bible

Elija hawi samrang Ahazia

¹ Israela samrang Ahad dei nai khala, Moba pri ly Israela pri y tiu nai ne.

² Israela samrang Ahazia ly Samari mary, my i samrang yhm amphu salo i savang mang tla i, khri pa-rei no nga bo. Naibaly ni ly Philistin pri Ekron mary i tameuh Balazebu teng y savaichi pato iy, mymy no hawi teang ai mo, hawi teang y ai mo, nanai deng hai bo.

³ Na i py Areng i kani pri amtaw thau ly Tshabe mary i amo Elija teng y, “Samrang Ahazia i savaichi hawi ka-vum so. Ati mana nai deaungkho y nangchi ly Ekron i tameuh Balazebu teng y leu deng ai nai chei u lawh mo? Israela pri y tameuh by y nai sai a?

⁴ Areng my samrang teng y, ‘Nang i no nai ly hawi ali teang ai ny y, dei ai!’ nanai thui pi,” napi. Elija ly Areng i leu pei nai kamta sa i,

⁵ savaichi ly samrang teng y vawi u teang bo. Samrang my, “Ati mana nai y vawi u teang lawh mo?” nanai deng.

⁶ Nichi my, “Khumi leaungrei ly kaichi hawi ka-vum sa i Areng my nang teng y, ‘Israela pri y tameuh by y nai deaungkho y Ekron tameuh Balazebu teng y savaichi pato iy leu deng lawh a? Nang ly no hawi teang ai ny y, dei ai!” nanai leu pei nai deaungkho y, nang teng y vawi ali teang ai nai kaichi ai pato nai ne,” napi.

⁷ Samrang my, “Huni khumi i mo-cha ly ati atawm mo?” napi.

⁸ Huni khumichi my, “Ni ly mawipeih baichu amchiu iy, mawipeih khobai akawm nai ne,” nanai pathang u. Samrang my, “Huni khumi ly Elija na a tu ly!” napi.

⁹ Naibaly samrang ly tavailu leaungrei ai khumi leaung vuipangrei hawi vanrei Elija teng y pato bo. Tavai lu ly Elija ai mawi saleung hareira y ateh nai niu i ni teng y, “Tameuh i khumi awi, satlo kathiu, samrang my leu ang pei,” napi.

¹⁰ Elija my, “Kai ly Tameuh i khumi ne nabaly, kani mang dengdairei mai tla iy nang hawi nang i khumichi ai kang chauchau sy!” napi. Naibaly tlenrei khyhmy mai tla kathiu i, tavailu hawi ni i khumichi ai kangbe bo.

¹¹ Samrang ly takhra tavailu leaungrei hawi khumi leaung vuipangreichi ai pato bi. Nichi ly Elija teng y chei iy, “Tameuh i khumi awi, satlo kaliki; samrang my leu ang pei!” napi.

¹² Elija my, “Kai ly Tameuh i khumi ne nabaly, kani mang dengdairei mai tla iy nang hawi nang i khumichi ai kang chauchau sy!” napi. Naibaly tlenrei khyhmy kani mang dengdairei mai ly tla kathiu i, tavailu hawi ni i khumichi ai kangbe bo.

¹³ Samrang ly tavailu leaungrei hawi khumi leaung vuipangreichi ai pato taleang bi. Huni tavailu ly mawi saleung y lyn kalau iy Elija i mo y kheukhu di naimy, “Tameuh i khumi awi, kai hawi kai i khumichi ai pahen ba. Kaichi ai padei moh ba!

¹⁴ Takhra tavailu leaung nyhrei hawi nini i khumichi ai ly kani mang dengdairei mai tla hai i dei be bo. Na i py kai ai ly pahen kyh ba!” nanai ahui.

¹⁵ Areng i kani pri amtaw thau my Elija teng y, “Jei moh, ni hawi vanrei abang” napi. Hunai deaungkho y Elija ly samrang teng y tavailu hawi vanrei chei i,

¹⁶ samrang teng y, “Areng my thui pi nai ly ‘Israela pri theung y leu deng ai nai tameuh by y nai deaungkho y, Ekron i tameuh Balazebu teng y deng ai nai savaichi pato nai a? Huna nai y nang ly no hawi ali teang ai ny y, dei ai!’ nanai lei ang pei,” napi.

¹⁷ Areng my Elija teng y thui pi nai kamta ly Ahazia ly dei nai ne. Ahazia ly chapo by y; hunai deaungkho y amnau Joram ly Jehoshapha i chapo, Juda samrang Jehoram i peang nai pa-nyh saneng y samrang lyn bo.

¹⁸ Samrang Ahazia i sa nai cheaungkhangchi ly Israela razavang cha-iu theung y tajiu tyn nai ne.