1 SAMUELA 9 - Khumi Common Language Bible

Sawla ly Samuela hawi avum nai

¹ Benjamin cheng theaung theung y khumi leaungrei awm; ni i amyn ly Kisa ne; ni i ampo ly Abiela, amsi ly Zeror ne. Ni ly Aphiah nupai Bekora yhm dengtheung kangpreang ne; ni ly nang chawn i, sa thai naira awm nai khumi leaungrei py ne.

² Ni ly amyn Sawla napi nai chapo leaungrei awm; ni ly neampacho mo-cha hawi nai thawndeang ne. Israela cheng ngiereichi theung y lu harei ka-cho asang nai ne i, mo-cha py hawi keh.

³ Kisa ly my i keaungngo kano kasau theung i, phyrei tama vui nai deaungkho y ni ly Sawla ai, “Miseaung leaungrei hawi keaungngo kano kasauchi hau ai nai chei ba,” napi.

⁴ Nini ly Ephraim tokalawi khu ka-peang hawi, Shalishah meingtym verei y hau i py niu hawi y. Hunai deaungkho y Saalim meingtym verei y hau hawi bo. Na i py keaungngo kano kasauchi ly hu y py by y. Naibaly nini ly Benjamin khu ka-peang mang y chei i, hau hawi bi; na i py niu hawi y.

⁵ Nini ly Zupha meingtym y tym hawi nai khala y Sawla my, my i miseaung teng y, “Yhm mang y phai vawi hawi ali teang sina, ti y baly ngaai ly keaungngo kano kasauchi molam y paleung mawn nai tleaung y, ani i vui y paleung mawn hai keh lawh na,” napi.

⁶ Miseaung my, “Kaneu rai! hini mary theung y khumi kachai leaungrei awm; ni i thui nai ngiereichi ly teng khyp reng nai deaungkho y, khumichi my ni ai tahm khai u; ni ly keaungngo kano kasauchi niu pajau nai meingtym ani teng y ang thui pi pajau ai,” napi.

⁷ Sawla my, “Huni khumi teng y chei baly ati talam ai mo? Ani i syn nai teicha teinei py khei bo; ani ly ni ai pei ai nai ati sai py by y be,” napi.

⁸ Miseaung my, “Kai teng y tangkacho tlaurei awm; huni tangka ni teng y pei ai; naibaly ni my niu pajau nai meingtym, ani ai ang thui pi ai,” napi nai pathang.

^9-11 Sawla my, “Hawi nai katau ne! ani chei hawi sina,” napi. Hunai deaungkho y nini ly khumi kachai i awm nai meingtym mary y chei hawi bo. Nini ly mary awm nai mawi mang y lyn kalau nai thym khala y, nini ly tui deu ai chei nai anglo phyrei hawi avum. Nini my neampachychi teng y, “Mary theung y niu thai nai keung awm a,” nanai deng. (Huni neng khala y amo ai ly niu thai nai keung, nanai palau; khumi ami py ne sy, Tameuh teng y deng ai nai ngai baly, “Niu thai nai keung teng y chei u sina,” nanai thui u reng nai ne.)

^12-13 Neampachy deaungdichi my py, “Awm na a, ni ly vaichi my tym nai ne; nangni chei hawi kaliki baly kai ai; nangni mary theung y kun phai kun baly, ni ai avum ai mang; huni khumi ly mawi salo y awm nai maichamra y, kapathypra talam ai nai, ni ly mary theung y vaini tym nai ne; ni tym y ryrei ly palau nai khumichi ly cha-nei u ai ny y; ati mana nai mo nabaly, apathyp ai nai tawnbawichi ai amtheaung hai man ai tla nai deaungkho y ne. Hunaibaly nangni ly mary theung y kun phai kun baly, huni khumi mawi saleung y cha-nei ai nai chei y kyh rai khala, ni ai avum hawi ai mang,” napi.

¹⁴ Naibaly Sawla hawi ni i miseaung ly mary mang y chei hawi tapai; nini ly mary theung y kun ai enten nai khala y, chiu sa ai nai meingtym mang y chei nai, Samuela ai avum hawi bo.

¹⁵ Sawla tym y rai nai kanirei nai khala y, Areng my Samuela teng y,

¹⁶ “Khawndam hini neng y Benjamin cheng theaung theung i khumi leaungrei ai, nang teng y kang pato ai; huni khumi ai Israela chengchi i samrang y khai takhra ba; ni ly kai i khumichi ai Philistia chengchi my ana naira i nai ama hai ai; kai ly kaimy i khumichi ngari patang nai kaniu bo; nichi ai sabawm ai nai palau nai raawi py kathai bo,” napi.

¹⁷ Samuela my Sawla ai niu nai khala y, Areng my ni teng y, “Hini ly kaimy kang thui pi nai khumi ne; ni my ly kai i khumichi ai peang ai,” napi.

¹⁸ Naibaly Sawla ly mary apai pa-kho kang sa y tym nai, Samuela teng y chei praw iy, “Mo mang i satang thui thai nai khumi ly ma y awm mo? kai ai thui pi ba,” nanai takeng bo.

¹⁹ Samuela my, “Mo mang i satang thui thai nai keung ly kai na a; chiu nai meingtym mang y kai i mo mang tako man; vaini nangni leaung nyhrei ly kai hawi vanrei cha-nei ai. Khawndam khutawi nai khala y, nangni i deng nai bawibawi kang pathang pi chum baly, nangni ai yhm mang y kang pato teang ai mang.

²⁰ Kani thomrei tama jo nai keaungngo kano kasauchi i vui y ly nang paleung bi moh. Hunichi ai ly niu angchi yb nai teu mang. Na i py Israela chengchi kadeaung keh nai khumi ly ami nai mo? nang hawi nang i ngampo yhm dengtheungchi ny y lawh a?,” napi.

²¹ Sawla my, “Kai ly Benjamin cheng theaung theung i ne; huni cheng theaung ly Israela cheng theung y theang keh. Naibaly kai i yhm dengtheung py, huni nupai theung y theang keh. Ati mana nai y nang ly kai ai hina nai kamta thui lawh mo?,” napi.

²² Naibaly Samuela my Sawla hawi ni i miseaung ai ly awmra meingtym kalen mang y pahawi iy, khumi leaung phairei ateh nai sabawi kachawn mang y ateh hai bo.

²³ Samuela my biu an amsi nai teng y, “Nang teng y khai takhra ai nai kang pei yb nai mawi jeu hai,” napi.

²⁴ Naibaly biu an amsi nai keung ly khai takhra nai mawi phai harei jeu hai iy, Sawla i mo y sawn pi. Samuela my, “Khen cham, hini ly nang i vui khai takhra nai mawi ne; lo ly cho ba. Kaimy heang yb nai khumichi hawi vanrei, vai i neng y nang cha ai nai hini mawi khai takhra pi nai bo,” napi. Huni kani y Sawla ly Samuela hawi vanrei cha-nei nai ne.

²⁵ Nichi ly chiu nai meingtymra i nai mary mang y satla u kathiu nai khala y, Sawla i vui yhm amphu salo y, ira harei sa pi u bo.

²⁶ Sawla ly ira tleaung y i nai ne. Khutawi en nai khala y Samuela ly amphu salo y awm nai Sawla ai, “Angthau, nang i yhm mang y vawi ai nai khuleaung lam y, kaimy kangtha ai,” napi. Naibaly ni hawi Samuela ly vanrei theu hawi bo.

Samuela my Sawla ai asitui lei iy peang nai keung y palyn nai

²⁷ Nini ly mary katem mang y tym nai khala, Samuela my Sawla teng y, “Nang i miseaung ai ani mo y tako man ai nai leu pei,” napi. Miseaung ly tako man bo. Huna nai khala y Samuela my, “Hi y tanareichy anawn rai, Tameuh i leu pei nai kang thui pi ai,” napi.