1 SAMUELA 8 - Khumi Common Language Bible

Khumichi my Samrang hnei nai

¹ Samuela ly miteaung cheang nai khala y, my i chapochi ai Israela pri y tara chih nai keung kalopchi sa hai.

² Chapo chalu ai ly Joela, chapo katheang ai ly Abija, nanai amyn pathi. Nini ly Beraseba mary y tara chih keung kalop sa hawi bo.

³ Na i py nini ly ampo i lawi hui y; paisa tangka nga ai nai mang y naini paleung apei khyh; hunai deaungkho y unchi talam i, leu meitang tara chih pi vai y leang bo.

⁴ Hunanai khala y Israela cheng lu sa nai bawibawichi ly vanrei avum achu u iy, Ramah mary y awm nai Samuela teng y chei u.

⁵ Naibaly nichi my ni teng y, “Khen cham, nang ly miteaung cheang bo; nang i chapochi ly nang i sa nai kamta so u y lawh. Hunai deaungkho y kaichi ai peang ai nai samrang khai pi; naibaly pri takhrachi kamta, kaichi py samrang awm teang ai,” napi.

⁶ Samuela ly nichi my samrang hnei nai khala y paleung hawi y; naibaly ni ly Areng teng y chiu sa bo.

⁷ Naibaly Areng my, “Khumichi my nang teng y thui nai ngierei tangai ba; nang ai ly nichi my khai su y leang mang; kai ai naini nichi my khai u su bo; nichi ly kai ai mychi i samrang palawn y bo.

⁸ Nichi ai kaimy Aikupta pri i nai kapahawi nai dengdairei vaini khrairei, nichi ly kai ai nithun thun iy, tameuh takhrachi ai chiu u; nichi ly kai ai avawrei ang sa nai kamta, vai ly nang ai ang sa u nai teu bo.

⁹ Hunai deaungkho y nichi i thui nai leu tangai pi; na i py samrang my peang nai khala y, samrang i reita tanynchi thui pi iy hawihai palai dawn hai patyp,” nanai leu pei.

¹⁰ Samuela ly samrang hnei nai khumichi i vui Areng i leu pei nai ngiereichi amti pi teang bo.

¹¹ Ni my, “Nangchi ai ang peang nai samrang ly nangchi i chapochi ai tavaira y kalop sa hai ai; phyreichi ai tavai ka-richira y, phyreichi ai keaungngo kamkawmra y, phyreichi ai atiu patyp nai tavaimi risachira y kalop sa hai ai.

¹² Ni ly phyreichi ai khumi leaung sangrei peang nai tavailu areng, phyreichi ai khumi leaung vuipangreichi ai peang nai tavai lura y ang khai ai; nangchi i chapochi ly samrang i lichi thawn iy chohchi tyn ai nai tla ai; ni i tavai ateaungchi, tavai ka-ri ateaungchi sa u ai nai tla ai.

¹³ Nangchi i chaniuchi py, samrang i vui rimui amjy cheaungkhang sa nai, biu theaung nai, tako paawp pi nai keungchi lawm u ai.

¹⁴ Ni ly nangchi i khaileaung kahawichi, kreip akhochi hawi Olive baichi py ang la pi pawn ai i, my i kalop sa pi naichi teng y pei pi pawn ai.

¹⁵ Ni ly my i tara chih nai miteaung kehchi hawi takhra miseaungchi i vui py, choh hawi kreip athaichi theung i, horei y harei ang la pi ai.

¹⁶ Ni ly nangchi i miseaungchi, hawi keh nai sichi hawi keaungngo kano kasauchi ang la pi vui iy, my i vui kalop sa hai ai.

¹⁷ Ni ly nangchi i beram kanghu theung i, horei y harei ang la pi ai. Naibaly kangkhym y ly nangchi py, ni i miseaung y lawh u ai.

¹⁸ Huni neng tym nai khala y, nangmychi my vawi takhra nai samrang molam y, tangam u naimy josei u ai. Na i py Areng my, nangchi i tangam nai, josei lengleang nai ly tangai pi ai ny y,” napi.

¹⁹ Khumichi my Samuela i thui pi nai ly dawndan pi y; na i py nichi my, “Huna ny y leang! kaichi ly samrang ngai;

²⁰ kaichi ly pri takhrachi kamta, kaimychi ai peang iy kaimychi i tavai keung y lu sa naimy tiu pi nai samrang ngai,” nanai takeng u.

²¹ Samuela ly nichi my thui nai ngierei tangai chum baly, Areng teng y kun iy hnei takeng pi bo.

²² Areng my, “Nichi i ngai nai kamta samrang khai pi,” nanai leu pei. Naibaly Samuela ly Israela khumi bawibawichi ai, mychi i awm nai yhm mang y vawi hai bo.