1 SAMUELA 7 - Khumi Common Language Bible

¹ Naibaly Kiria Jearim mary i khumichi ly jeu u iy Areng i Leu Maikawm Pawm ai, mawi saleung y awm nai Abinada i yhm y angjeaung u. Nichi ly Leu Maikawm Pawm ai kry ai nai Abinada i chapo Eleaza ai vawi takhra iy au u bo.

Samuela my Israela chengchi ai peang nai

² Areng i Leu Maikawm Pawm ly Kiria Jearim mary y saneng apomrei kamta, kra parai naimy awm. Huna nai neng khala y Israela chengchi ly sabawmra nga ai nai Areng ai kadeaung u nai ne.

³ Samuela my Israela chengchi teng y, “Nangchi ly Areng teng y paleung hawi verei, jeu aliteang ai nai ngai baly cheng takhrachi i tameuhchi ai py, kani anglo Asatare i mynchi ai py, khai su ai nai tla; Areng teng y nangmychi ai aau patyp iy, mymy ai naini chiu u baly mymy ly nangchi ai, Philistia chengchi kiu i nai atleu ai,” napi.

⁴ Hunai deaungkho y Israela chengchi ly Bala tameuh hawi Asetare i mynchi khai su iy, Areng ai naini chiu u bo.

⁵ Naibaly Samuela ly Israela cheng bawibawichi teng y, “Kai ly Mizapa mary y nangchi i vui Areng teng y chiu sa ai i, nangchi ly huni mary y angym u,” napi.

⁶ Naibaly nichi bawibawi ly Mizapa mary y angym u iy, tui maidenreichy deu i, Areng teng y talam nai lei i, huni kani khengrei biu hai u bo. nichi my, “Kaichi ly Areng ai kamngo kasa u lawh bo,” napi u. (Mizapa mary i dengdairei Samuela ly Israela chengchi ai peang nai ne.)

⁷ Mizapa mary y Israela chengchi awm angym u nai satang ly Philistia chengchi thai u nai khala y, Philistia samrang leaung pangreichi ly Israela chengchi awm nai mang y tavai amsa u bo. Huni satang ai Israela chengchi thai u nai khala y jei u i,

⁸ Samuela teng y, “Kaichi ai Philistia chengchi teng i dengdairei atleu ai nai, achi i Areng Tameuh teng y chiu so pi jojo kyh ba,” napi u.

⁹ Samuela ly beramcho harei tleh iy, Areng teng y bom verei leng patlum nai kapathypra talam bo. Naibaly ni ly Areng teng y Israela chengchi ai sabawm ai nai chiu sa pi i, Areng my ni i chiu sa nai pathang pi.

¹⁰ Samuela my apathyp nai thym y Philistia chengchi ly Israela chengchi ai tiu ai nai ang tym u bo. Na i py huni neng khala y, Areng my kani mang dengdairei kani pajyh hai nai deaungkho y, nichi ly ahei khrikhra naimy angpreng u nai ne.

¹¹ Israela chengchi ly Mizapa mary i dengdairei theu u iy, nichi ai Bethka mary sahawi y tym pa-rei hui i padei u bo.

¹² Huni bo y Samuela ly lengseaung harei la iy, Mizapa mary hawi Sen mary sala y leng bo; naibaly ni ly " Areng ly achi ai vaini khrairei ang sabawm bo,” nanai thui chum baly, huni lengseaung ai “sabawm nai lengseaung” (Ebenezar) nanai amyn pathi.

¹³ Hunai deaungkho y Philistia chengchi ly tavai sum u bo. Areng ly nichi ai Samuela heng nai ryrei ly Israela chengchi i khu ka-peang theung y kun ai nai pei y.

¹⁴ Ekron mary hawi kath mary sahawi y Philistia chengchi ly mychi my peang vui nai mary bawibawichi ai, Israela chengchi teng y pei ali teang ai nai tla nai deaungkho y, Israela chengchi ly mymychi i khu ka-peang bawibawi nga u aliteang bo. Huni bo y Israela chengchi hawi Kanan chengchi ly adyh adawi naimy awm u nai ne.

¹⁵ Samuela ly mymy deungrei, Israela chengchi ai peang nai ne.

¹⁶ Ni ly saneng tleitleirei, Bethela mary, Kilakala mary, Mizapa marychi mang y amki iy, tara chih pi reng nai ne.

¹⁷ Naibaly ni ly Ramah mary my i yhm y vawi iy, tara chih keung kalop sa. Ni ly amah mary y Areng i vui maicham sa nai ne.