1 SAMUELA 5 - Khumi Common Language Bible

Philistia chengchi teng y tym vui nai Leu Maikawm Pawm

¹ Philistia chengchi ly Leu Maikawm Pawm nga vui chum baly, Ebenezar mary i dengdairei mychi i awm nai Asadod mary mang y kajeaung u i,

² Dakon tameuh i achura yhm theung i, Dakon myn sahawi y khai u bo.

³ Kani pa-nyh khawn angthodyh Dakon myn ly Areng i Leu Maikawm Pawm mo y tla amkhiumeuh nai ai, Asadod mary i khumichi niu u bo. Naibaly nichi my kateang iy khaira y khai u ali teang.

⁴ Huni bo i kani pa-nyh khawn angthodyh y, huni myn ly Leu Maikawm Pawm i mo y tla amkhiumeuh nai niu u taleang bi. Vai i nai ly myn i lu hawi kiu nyhrei py tleuleu pawn iy, katheu pa-kho sahawi y tym vui nai ne; tlang my tlairei naini awm su bo.

⁵ (Huna nai y Dakon tameuh i pathyp pi nai keungchi hawi, Dakon achura yhm y kun theu nai Asadod mary i khumichi ly katheu pa-kho kheutang ai vaini khrairei chiu y naimy takan u.)

⁶ Areng ly Asadod mary i khumichi ai, khri pa-rei pajeng nai deaungkho y, jei hyn hai bo. Huni mary i khumichi hawi tengpang y awm nai khumichi ai uisaluchi man hai iy pajeng bo.

⁷ Hunichi niu u nai khala y nichi ly “Israela chengchi chiu nai Tameuh ly achi hawi achi i tameuh ai pajeng nai bo; Leu Maikawm Pawm ai achi ly hini meingtym y khai jo ai nai avo y leang bo,” nanai thui u.

⁸ Naibaly nichi ly Philistia samrang leaung pangreichi teng y savaichi pato iy, palau i nichi teng y, “Israela chengchi i Tameuh i Leu Maikawm Pawn ai, kaichi mana kasa u aimo?” nanai deng. Samrangchi my, “kath mary y tha u,” napi i, Leu Maikawm Pawm ai Philistia mary harei, kath mary y tha u bo.

⁹ Na i py huni mary y Leu Maikawm Pawm tym baly, Areng ly huni mary ai py pajeng lawh nai deaungkho y, khumichi ly angtheng u na bo. Mymy ly katheang kalen vawi y naimy, khumichi i tlang tleaung y uisalu man hai iy pajeng nai ne.

¹⁰ Hunai deaungkho y nichi ly Leu Maikawm Pawm ai takhra Philistia mary harei Ekron mary mang y tha u bi bo. Na i py huni mary y Leu Maikawm Pawm tym nai khala khumichi my, “Nichi ly achi bawibawi ai padei ai nai, Israela chengchi chiu nai Tameuh i Leu Maikawm Pawm achi teng y ang tha lawh bo,” nanai aeu u.

¹¹ Naibaly nichi ly Philistia samrang leaung pangreichi ai palau bi i, nichi teng y, Israela chengchi i Leu Maikawm Pawm ai, my i awm nai meingtym y tha u teang; huna khala naini, kaichi hawi kaichi i yhm dengtheungchi ly deira i nai lawi u ai,” nanai thui u. Tameuh ly nichi ai khri pa-rei pajeng nai deaungkho y, mary verei jei hyn u nai ne.

¹² Dei y nai khumi malawn py, uisalu man nai deaungkho y, khumichi ly sabawm naira nga thai ai nai, tameuhchi teng y hnei takeng u bo.