1 SAMUELA 30 - Khumi Common Language Bible

Amalek chengchi hawi tavai atiu nai

¹ Kani nyhrei nai khala y Davida hawi my i khumichi ly Zikala mary y tym u ali teang bo. Amalek chengchi ly Juda pri tokalawi mang y kun iy, Zikala mary ai tiu i mai leng vui;

² naibaly neampachy bawibawichi ai patiu iy, hawi u pawn bo. Na i py khumi leaungrei ai py padei u y.

³ Davida hawi ni i khumichi tym nai khala y, mary ly mai leng vui nai hawi mychi i aju hawi cho chanauchi ai paleung ka-echi my patiu pawn nai deaungkho y,

⁴ Davida hawi my i khumichi ly atho bai nanai pa-rei vo u bo.

⁵ Davida i aju leaung nyhrei, Ahinoam hawi Abikaila ai py hawi vui nai ne.

⁶ Davida i khumichi ly mychi i cho chanauchi chau pawn nai molam y paleung si naimy, Davida ai lengseaung hawi aphi ai nai pahyn nai deaungkho y, Davida ly rai naira avum bo. Na i py ni ly mymy i Areng Tameuh teng i dengdairei atho nga nai ne.

⁷ Davida ly Ahimelek i chapo, pathyp pi nai keung Abiatha teng y, “Ephod kai teng y jeu hai,” napi i, Abiatha ly ephod syn pi bo.

⁸ Huna nai khala y Davida ly Areng teng y, “Kai ly hini mary ai tiu nai khumichi nithun hui ai a? Nichi ai kapatiu ai a?,” nanai deng. Mymy ly “Nichi nithun hui; nang ly nichi ai patiu iy, langheng hawi naichi ai atleu pajau ai mang,” nanai pathang.

⁹ Hunai deaungkho y Davida hawi my i khumi leaung chungvai tariureichi ly theu u i, Besora micheaung mang y tym u nai khala y, phyreichi ly hu y awm u jo.

¹⁰ Davida ly khumi leaung chungvai palyhreichi hawi tako u bi nai ne. Takhra khumi leaung chungvai nyhreichi ly akawm ala nai deaungkho y, tavo micheaung angpeang pajau y nai, awm u jo bo.

¹¹ Davida hawi abawi nai khumichi ly Aikupta cheng thawndeang leaungrei ai daichi theung y avum i, Davida teng y hawi u bo. Nichi ly huni thawndeang ai teicha teinei hawi tui py,

¹² thaidu athai kajei maidenreichy hawi kreip athai kajei phrawn nyhrei py pei pi u. Thawndeang ly teicha teineichi cha chum baly atho awm ali teang bo. Ni ly kani thomrei ati teicha teinei py cho nei y nai ne;

¹³ Davida ly ni teng y, “Nang i yhmkeung ly ami mo? Nang ly manira i jeu nai mo?,” nanai deng. Thawndeang my, “Kai ly Amalek cheng khumi leaungrei i miseaung, Aikupta khumi ne. Kai ly keaung no nai deaungkho y, kai ai yhmkeung my lawm veng nai kani thomrei khala y angdaw su nai ne.

¹⁴ Kaichi ly Juda pri tokalawi mang i, Kherathi khu ka-peang hawi Kaleb nupaichi i khu ka-peang ai tiu iy, Zikala mary ai mai leng vui nai ne,” napi.

¹⁵ Davida my ni teng y, “Nang ly huni khumichi awm naira mang y, kai ai lam patei na a?,” nanai deng. Thawndeang my, “Nang ly kai ai padei y, kai i yhmkeung teng y au y ai, nanai Tameuh i amyn y tau iy leu adeubaly, nang ai lam patei ai,” napi.

¹⁶ Naibaly ni ly Davida ai, huni khumichi teng y hawi jo bo. Huni khumichi ly Philistia pri hawi Juda prichira i, vawnsai neangneangchi nga nai deaungkho y, meingtym tleirei y eaung pawi sa i, cha nei u nai ne.

¹⁷ Davida ly kani pa-nyh khawn khutawi mo dengdairei, dym tengsa ryrei nichi ai tiu i, kula-iu atang iy preang nai thawndeang leaung chungvai palyhreichi ny y baly, ami py tleaung y nai ne.

¹⁸ Davida ly my y aju leaung nyhrei hawi vanrei, Amalek chengchi my lawm pi pawn nai ngiereichi ai nga ali teang bo.

¹⁹ Ati sai py chau y; Davida ly my i khumichi i cho chanau bawibawichi py, Amalek chengchi my lawm pi pawn nai vawnsai ngiereichi py, nga ali teang nai ne.

²⁰ Nichi ly beram kanghu, si kanghuchi ai py, nga aliteang nai deaungkho y, mychi i mo y hawi naimy, “Hini beram hawi sichi ly Davida i vawnchi ne,” nanai thui u.

²¹ Naibaly akawm ala nai deaungkho y mymy hawi abang pajau y nai, Besor micheaung sahawi y amdaw jo nai khumi leaung chungvai nyhreichi teng y, Davida tym teang bo. Nichi ly lamchung ai nai theu u i, Davida i khumichi ai law u.

²² Na i py Davida nithun abang nai khumichi theung i paleung akhum nai khumi phyreichi my, “Nichi ly achi hawi vanrei abang u y nai deaungkho y, nichi ai atiura i nga nai vawnsaichi phy paji pajau y. Nichi ly mychi i aju chanauchi ai hawi iy, theu u pajau nai ne,” napi u.

²³ Na i py Davida my, “Kai i amjo amnauchi awi, Areng my achi ai ang pei nai vawnsaichi ai, nangchi hina nai so ngau y; mymy ly achi ai chymme hai iy, achi i avang saleaung y kun iy tiu nai khumichi i tlang tleaung y eaung ai nai ang pei.

²⁴ Nangchi i tau pei nai ly ami py ngai u ai ny y. Nangchi bawibawi ka-hyh riri phy amji u ai nai tla. Tai typ nai khumi py, tavai thau nai khumi i nga nai kamta, nga teang ai nai tla,” napi.

²⁵ Davida my hina nai kamta, reita sa pi nai deaungkho y, huni reita ly Israela pri y vai khrairei awm jo nai ne.

²⁶ Davida ly Zikala mary y tym ali teang nai khala y, atiura i nga nai vawnsai phyreichi ai, my i ahawi Juda pri i lu sa naichi teng y, cha tajiu iy pa pi bo. Huni cha theung y, “Areng i paleung ka-echi teng i, kaimy nga nai atiura i vawnsai phyreichi ai nangchi i vui langseaung kangpa pi,” nanai abawi.

²⁷ Ni ly vawnsai phyreichi ai py Bethela mary y awm nai khumichi teng y py, Juda pri tokalawi mang i Ramah mary y awm nai khumichi teng y py, Jatir mary i khumichi teng y py,

²⁸ Aroer mary, Siphemoth mary, Estemoa mary,

²⁹ Rakal mary, Jeramela nupaichi awm nai mary, kenit nupaichi awm nai mary,

³⁰ Horama mary, Borasan mary hawi Athaka mary i awm nai khumichi teng y py,

³¹ Hebron mary i dengdairei, mymy hawi my i khumichi anga reng nai avang saleaung ngiereichira py, pei pi nai ne.