1 SAMUELA 3 - Khumi Common Language Bible

Areng ly Samuela teng y amteng nai

¹ Deaungdi Samuela ly Eli i pacheang nai anui y Areng i kalop sa naimy awm; huni neng khala ly Areng teng i amo leu thai nai py di parai, amteng hai naichi py khri pa-rei di parai nai ne.

² Vumrei nai khala y Eli ly mei paju pahai nai deaungkho y, my i takun y i bo.

³ Samuela ly Leu Maikawm Pawm awm nai kanih yhmra y i nai ne. Khutawi y rai i, maisi yhm ly mai padei y rai nai neng khala y,

⁴ Areng my Samuela ai palau bo; Samuela my,” Areng! kai hi y awm na a! nanai pathang nai tarawi y,

⁵ ni ly Eli teng y angpreng i, nangmy palau nai y kai kang jeu nai he,” napi. Na i py Eli my, “Kai nang ai kang palau y leang, i phai i teu,” napi. Naibaly Samuela ly i teang bo.

^6-7 Areng my Samuela ai palau bi; deaungdi ly Areng my palau nanai pany y, ati mana nai mo nabaly Areng ly ni ai tlenrei py, amteng hai vai y nai deaungkho y ne. Naibaly ni ly ang thau i, Eli teng y chei; “Nangmy palau nai deaungkho y, kai kang jeu nai he,” napi. Na i py Eli my, “Deang awi, kai kang palau y leang, i phai i pyp ba,” napi.

⁸ Areng my Samuela ai tlen pa-thom palau taleang bi; ni ly ang thau iy Eli teang y chei bi i, “Nangmy palau nai deaungkho y kai kang jeu nai he,” napi. Huna nai khala y Eli ly deaungdi ai palau nai keung ly Areng ne, nanai pany i,

⁹ “I phai i teang teu ba; nang ai ang palau bi lawh baly,’ Areng awi, thui ba, nang i miseaung tangai mang, nanai pathang ba,” napi. Naibaly Samuela ly i ai nai amkyn ali teang bo.

¹⁰ Areng ly jeu i Samuela sahawi y angdo iy, “Samuela! Samuela!” nanai vaichi khala i kamta palau bi bo. Samuela my, “Areng thui ba, nang i miseaung tangai mang,” napi.

¹¹ Areng my ni teng y, “Kanirei nai khala y Israela chengchi teng y kai i sa ai nai sai ly khri pa-rei ka-jei awm nai deaungkho y, huni satang thai nai khumi bawibawichi ly athengra na ai.

¹² Huni kani tym nai khala y kai ly Eli i yhm dengtheungchi ai kapajeng ai, nanai leu pei nai kamta, amteaung khyp khala i dengdairei tem pa-rei pajeng ai.

¹³ Ni i chapo ni ly kai ai thui tamawn nai molam y, kai ly ni i yhm dengtheungchi ai kapajeng ai, nanai py Eli teng y thui pi yb bo. Eli py my i chapochi i hawi y sa nai saichi pany nai ne; na i py nini ai kam y.

¹⁴ Hunai deaungkho y mani kapathypra, mani katalamra py, hini hawi y parai nai kamngo lawi pa-rei sa pajau ai ny y, nanai kai ly Eli i dengtheungchi teng y thui pi kheng bo,” napi.

¹⁵ Samuela ly ira tleaung y khutawi pa-rei awm jo; khutawi baly ang thau iy Areng i yhm katheuchi paeaung bo. Ni ly my i niu nai amteng hai nai satangchi Eli teng amti pi vam y.

¹⁶ Eli my, “Kai i chapo Samuela awi!,” nanai palau baly, “Awm areng awi,” nanai pathang.

¹⁷ Eli my, “Areng my nang teng y ati ang thui pi mo? kai teng y ati sai py apha moh ba; Tameuh my leu ang pei nai ngiereichi kai teng y amti pi y baly, mymy ly nang ai khri pa-rei ang pajeng ai,” napi.

¹⁸ Naibaly Samuela ly ati sai py takhawi y naimy, leu pei nai ngierei amti pi bo; Eli my, “Mymy ly Areng ne; mymy i ngai nai kamta so hai sy,” napi.

¹⁹ Samuela ly veangryh veangryh i Areng ly ni hawi vanrei awm hai iy, Samuela i thui nai ngierei ly sa pi khyp bo.

²⁰ Hunaibaly Samuela ly Areng i amo ne khyp nai satang, pri katem y khrairei awm nai Israela chengchi pany u bo.

²¹ Siloh mary ly Samuela teng y Areng i amteng hai nai meingtym ne. Mymy ly huni mary y avawrei, amteng hai bo. Samuela my leu pei nai tleirei y Israela cheng bawibawichi tangai u nai ne.