1 SAMUELA 26 - Khumi Common Language Bible

Sawla ai Davida my lawi hai bi nai

¹ Zipha mary i khumi phyreichi ly Sawla awm nai Kibeah mary y chei u i, Davida ly daichi ka-vym kachawn mang i Hakhila mawi saleung y aheu, nanai thui pi u.

² Sawla ly vaimy Israela cheng theung i vawi patyp nai tavaimi risa leaung sang thomreichi hawi vanrei, Davida ai hau ai nai Zipha daichi ka-vym mang y amsa praw i,

³ Hakhila mawitleaung lam sahawi y tai u bo. Huni neng khala y Davida ly daichi ka-vym theung y awm i, mymy ai Sawla my hau nai daichi ka-vym y tym nai satang thai nai khala y,

⁴ khen paviu naichi ai pato i, Sawla tym angchi khyp nai pany bo.

⁵ Ni ly Sawla i tai naira mang y vaimy chei praw i, Sawla hawi Nera i chapo, Sawla i tavailu areng Abanachi i nai meingtym khen bo. Sawla ly tavai taira umtang y i iy, my i khumichi ly mymy ai taki teungtareung naimy i u bo.

⁶ Naibaly Davida ly Hiti khumi Ahimelek hawi, Joaba i amnau Abisai teng y, (nichi i amhm ly Zeruiah ne.) “Nangni leaung nyhrei theung i ami nai ly Sawla i tai naira mang y kai hawi vanrei abang ai mo?,” nanai deng. Abisai my, “Kai abang ai,” nanai pathang.

⁷ Hunaibaly huni vum y Davida hawi Abisai ly Sawla i tavai tai naira mang y kun hawi i, tavai taira umtang y Sawla ly mymy i tivi luleung y cheaung iy, i-ngym nai niu hawi bo. Abana hawi tavaimi risachi ly Sawla sahawi y i u mang nai ne.

⁸ Abisai my Davida teng y, “Tameuh ly nang i paleung ka-e ai vaini, nang i kiu y ang-au nai bo. Hunaibaly ni ai mymy i tivi hawi tlenrei khyhmy, khaileaung y prida na pa-rei thun ai nai pei ba; tlen nyhrei kathun y leang mang!,” napi.

⁹ Na i py Davida my, “Nang ly samrang ai padei ai nai avo y! Areng ly mymy i khai takhra nai samrang ai padei nai khumi ai ly pajeng takengkei ai.

¹⁰ Areng mymy khypkhyp malawn py dei ai nai neng tym nai y dei nai py ne sy, tavai keung y dei nai py ne sy, pajeng naira tym hai ai, nanai Tameuh kangheng i saho y kai pany.

¹¹ Areng my khai takhra nai samrang ai padei y ai nai, kai ai Areng my paka na sy. Ani ly samrang i tivi hawi tui adym la iy, theu hawi sina,” napi.

¹² Naibaly Davida ly Sawla i luleung y cheaung nai tivi hawi tui adym la pi vui iy, Abisai hawi vanrei theu hawi bo. Areng ly tavaimi kamkawm vereichi ai, i hai thleng nai deaungkho y, ami py anglaw y, niu u y nai ne.

¹³ Naibaly Davida ly leaunghawi vai mang y angpeang i, kamlora y tym nai khala y, mawi saleung y angdo naimy,

¹⁴ Sawla i risachi hawi Abana teng y, “Abana awi, nang ly kai i thui nai thai a?” nanai aeu. Abana my, “Samrang i anglaw na pa-rei aeu nai khumi ly ami mo?,” nanai deng.

¹⁵ Davida my, “Abana awi, nang ly Israela pri y atho awm keh nai khumi ny y a? Ati mana nai deaungkho y nang ly nangmy i areng, samrang ai hawihai kry y lawh mo? Vaichi my khumi leaungrei ly nang i areng ai padei ai nai tai theung y kun bo.

¹⁶ Abana awi, nang ly nangmy i kalop ai hawihai so y lawh ly! Areng my samrang y khai nai, nang i areng ai nang ly kry y nai deaungkho y, nangchi bawibawi dei ai nai avo, nanai heng nai keung Areng i amyn y kai vaineng abeu bo. Khen cham! samrang i tivi ly ma y awm mo? My i luleung y khai nai tui adym ly ma y mo?” napi.

¹⁷ Sawla ly Davida i raawi ma praw i, “Nang ly kai i chapo Davida ne a?” nanai deng. Davida my, “Ne, tahm awm parai nai samrang awi,” nanai pathang.

¹⁸ Naibaly Davida my teang, “Samrang nang ly ati mana nai nangmy i miseaung kai ai patiu ai nai hau jojo lawh mo? Kai ly ati hawi y nai kasa lawh mo?

¹⁹ Tahm awm parai nai samrang awi, kai i thui nai leu tangai pi kyh ba. Nang ai kai hawi paleung ka-e lawm pa-rei sa nai keung ly Areng ne lawh baly, kado theu nai rym hai ai nai kapathypra talam pajau nai ne. Na i py paleung ka-e lawm hai nai keung ly khumichi ne lawh teu baly, nichi ly Areng i amsawi lawi u na sy. Israela chengchi teng y Areng i pei nai khu ka-peang i dengdairei, cheng takhrachi i tameuhchi ai chiu pajau nai khu ka-peang mang y kai ai nichi my patheu u bo.

²⁰ Kai ai Areng hawi palo nai pri takhrara y dei hai moh kyh; Israela samrang ly ati mana nai uikasyh ryrei awm khyh nai, kai ai padei ai nai jeu lawh mo? Samrang ly ati mana nai kai ai daichi tavo kamta palawn iy patiu ai nai patyp lawh mo?,” napi.

²¹ Sawla my, “Kai tamang bo, kai i chapo Davida awi! kai teng y vawi teang jau ba; nang ly vai vum kai ai padei y nai deaungkho y, kai ly nang ai mo mang y mana khala py, ka-jeira so y leang bo. Kai ly khumi ka-khum lawm lawh! khri pa-rei hawi y nai kalop ai kasa lawh bo ly!,” nanai pathang.

²² Davida my thui bi nai ly “Tahm awm parai nai samrang awi, nang i tivi ly hi y he; khumi leaungrei pato iy lo hai ba.

²³ Areng ly ka-ym awm nai khumi hawi khumi kahawichi ai kawn vang langseaungchi pei nai ne. Vaini mymy ly nang ai kai i kiu y ang-au teu i py, kai ly Areng my khai takhra nai samrang ai padei ai nai kaso y.

²⁴ Vaini nang i tlang ai lawira kang pei nai kamta, Areng ly kai i tlang law tleaung naira pei iy, ngari kamtang cheaungkhang i nai py atleu pi na sy!,” nanai thui pi.

²⁵ Sawla my py Davida teng y, “Deang awi, Tameuh my nang ai amtheaung hai sy! Nang ly nangmy i sa naira tleirei y eaung naira nga ai mang!,” napi. Hunaibaly Davida ly tako vui i, Sawla ly yhm mang y vawi ali teang bo.