1 SAMUELA 23 - Khumi Common Language Bible

Davida my Keilah mary ai atleu nai

¹ Philistia chengchi ly Keilah mary ai tiu iy, tyn chum nai changthachi ai lawm pi pawn nai satang Davida thai bo.

² Hunai deaungkho y ni ly Areng teng y, “Kai ly Philistia chengchi ai tiu ai nai avo na a?,” nanai deng. Areng my, “Avo mang, nichi ai tiu iy, Keilah mary ai atleu,” nanai pathang.

³ Na i py Davida i khumichi my, “Achi ly hini Juda pri y malawn py, jei hyn naimy awm u nai ne. Philistia chengchi ai tiu ai nabaly, hini tleaung y awm nai sai akeh ai,” napi u.

⁴ Hunai deaungkho y Davida ly Areng teng y hnei takeng bi nai ne. Areng my ni teng y, “Keilah mary y chei ly tiu; kai ly nang ai Philistia chengchi tlang tleaung y eaung hai ai,” napi.

⁵ Naibaly Davida hawi my i khumichi ly Keilah mary y chei u i tiu u bo. Nichi ly khumi neangneangchi ai padei iy, tawnbawichi ai py la pi pawn nai ne. Hina nai kamta Davida ly Keilah mary ai atleu nai ne.

⁶ Ahimelek i chapo Abiatha ly preang nai law tleaung nai bo y Keilah mary y awm nai Davida teng y tym i, ni ly mymy hawi vanrei pathyp pi nai keung i ephod py syn.

⁷ Keilah mary y Davida tym nanai Sawla my thai nai khala y, “Tameuh my Davida ai kai i kiu y au bo; Davida ly mary apai hawi apai katheu khaw parai nai mary theung y tym nai deaungkho y, deaung y man nai bo,” nanai thui.

⁸ Hunai deaungkho y Sawla ly my i tavaimi risachi ai palau i, Keilah mary mang y chei iy Davida hawi ni i khumichi ai katanmeuh ai nai leu pei bo.

⁹ Davida ly mymy ai tiu ai nai Sawla i dawn pasym nai thai nai khala y, pathyp pi nai keung Abiatha teng y, “Ephod hi y jeu hai,” napi.

¹⁰ Naibaly Davida my, “Aw Israela chengchi i Areng Tameuh, Sawla ly nang i miseaung kai molam y Keilah mary y jeu i, mary taphra ai nai satang thai bo;

¹¹ Keilah mary i khumichi ly kai ai Sawla kiu y au u na a? Kai i thai nai kamta Sawla ly ang jeu angchi khyp na a? Aw Israela chengchi i Areng Tameuh, kai ai pany ai nai pei kyh ba!,” napi. Areng my, “Sawla ang jeu ai,” nanai pathang.

¹² Davida my, “Keilah mary i khumichi ly kai hawi kai i khumichi ai Sawla i kiu y au na a?,” nanai deng bi. Areng my, “Nichi my ang-au ai,” napi.

¹³ Hunai deaungkho y Davida hawi my i khumi leaung chungvai tariureichi ly Keilah mary i dengdairei vaimy theu u vui i, avo naira mang y anaw u. Davida ly Keilah mary i nai preang veng bo, nanai Sawla my thai nai khala y, mymy i dawn pasym naichi taphra vui bo.

Davida ly mawitleaung pri daichi mang y chei vui nai

¹⁴ Davida ly Zipha daichi ka-vym mawi mang y aheu vui bo. Sawla ly ni ai neng awm nai kamta atho sa iy hau; na i py Tameuh ly Davida ai Sawla i kiu y au y.

¹⁵ Davida ly mymy ai Sawla my padei ai nai hau, nanai pany. Davida ly Zipha daichi ka-vymra awm nai Horesh meingtym y awm.

¹⁶ Huna nai thym khala y Jonathan ly Davida teng y tym i, Tameuh i kry nai sai ai ym ai nai atho pei iy,

¹⁷ ni teng y, “Jei moh, kai i ampo Sawla ly nang i tlang tleaung y ka-jeira tym hai pajau ai ny y leang; nang ly Israela chengchi i samrang lawm ai nai py, kai ly nang i bangtang lawm ai nanai py, ni ly pany hawihai bo,” napi.

¹⁸ Hunaibaly nini leaung nyhrei ly leaung leaungrei vaineng asa hawi chum baly, Davida ly Horesh meingtym y awm jo i, Jonathan ly yhm mang y vawi ali teang bo.

¹⁹ Zipha mary i khumi phyreichi ly Sawla awm nai Kibeah mary y chei i ni teng y, “Davida ly kaichi i khu ka-peang theung i daichi ka-vym tokalawi ngan, Hakhila mawi saleung y awm nai Horesh meingtym y aheu nai ne.

²⁰ Samrang awi, nang ly ni ai patiu ai nai khri pa-rei ngai, nanai kaichi pany. Hunai deaungkho y kaichi i khu ka-peang y jeu ba; ni ai patiu ai nai kaichi my ka-vo sa pi ai,” napi u bo.

²¹ Sawla my, “Nangchi ly hina nai kai i tlang tleaung y pahen u nai molam y, nangchi ai Areng my amtheaung hai sy!

²² Nangchi ly chei iy avo takengkei ai nai so u; ni ly manira y awm mo nanai py, hunira y ni ai ami my niu mo nanai py, hawihai palai khen u; ni ly khri pa-rei tau cheng, nanai kathai.

²³ Ni i aheu nai meingtym hawihai palai khen u patyp ly kai teng y satang thai hai praw; naibaly kai py nangchi hawi vanrei chei iy hau ai. Davida ly Juda pri y awm rai baly, kai ly Juda pri verei y kahau ai i, kapatiu ai,” napi.

²⁴ Hunai deaungkho y huni khumichi ly Sawla i vaichi khala y awm nai Zipha meingtym mang y chei u bo. Davida hawi ni i khumichi ly Judean mary tokalawi ngan mang leaunghawi i Mona daichi ka-vym y awm u.

²⁵ Sawla hawi mymy i khumichi ly Davida ai hau ai nai theu u; na i py huni satang Davida my thai i, Mona daichi ka-vymra awm nai lengseaung mawi mang y aheu vui bo. Sawla ly huni satang thai nai khala y, Davida awm naira mang y hau u.

²⁶ Sawla hawi my i risachi ly mawi Makengrei mang y awm i, Davida hawi ni i risachi ly takhra Makengrei mang y awm u. Sawla hawi ni i risachi ly Davida hawi ni i khumichi ai patiu nai ngavi na bo i, Davida hawi ni i khumichi ly law tleaung ai nai atho sa u bo.

²⁷ Huna nai thym khala y, satang thai hai nai risa ly Sawla teng y tym i, “Philistia chengchi ly achi i pri y ang kun u dudu bo; vaimy vawi ali teang jau!,” nanai thui pi bo.

²⁸ Hunai deaungkho y Sawla ly Davida ai hui nai anawn iy, Philistia chengchi ai tiu ai nai amsa u. Huni meingtym y kamkawm nyhrei khawilang takhra nai molam y huni meingtym ai “Khawilang takhra nai mawi” nanai palau u nai ne.

²⁹ Davida ly hu i dengdairei theu iy, Engkedi meingtym mang y aheu vui bo.