1 SAMUELA 21 - Khumi Common Language Bible

Sawla teng i dengdairei Davida preang nai

¹ Davida ly pathyp pi nai keung Ahimelek awm nai Noba mary y chei bo. Ahimelek ly jei hyn naimy Davida ai ka-vum sa i, “Nang ly ati mana nai y nangmy tlairei jeu nai mo?,” nanai deng.

² Davida my, “Kai ly samrang i kalop molam y, hi y kang jeu nai ne; samrang my ni i sa hai nai kalop ai ami teng y py thui pi y ai nai ang taviu; kaimy i khumichi teng y, meingtym ha hareira y kai hawi avum ai nai pato yb bo.

³ Vai nang teng y ati awm mo? kai ai tako phi pangrei, ti y baly nang teng y awm nai teicha teinei saisairei pei kyh ba,” napi.

⁴ Pathyp pi nai keung my, “Kai teng y tako takhra by y, tako kachai naini awm khyh; nang i khumichi ly kra y nai sala y neampachy hawi ta-pui ta-chi apho y baly, huni tako la pajau mang,” napi.

⁵ Davida my, “Kai i khumichi ly ta-pui ta-chi apha nai by y leang; kai i khumichi ly kalop ha harei sa ai nai chei nai khala y malawn py, kachai sa jojo nai ne. Vai i kamta aly len nai kalop molam khuleaung theu nai ipsaly, kachai awm u nai ne!,” napi.

⁶ Hunai deaungkho y pathyp pi nai keung ly mymy teng y takhra tako py by y i, Tameuh teng y talam nai tako kachai Davida teng y pei pi bo.

⁷ (Sawla i beram typ keung kalen, Edom pri i khumi Doka ly huni kani y reita tanyn molam kachai sa ai nai, huni meingtym y tym nai ne.)

⁸ Davida my Ahimelek teng y, “Nang teng y tivi, ti y baly haisau awm a? Samrang my leu pei nai molam y kai ly theu tamangtang i, haisau ateaung alang angvei ai nai neng ngo y,” napi.

⁹ Ahimelek my, “Kai teng y Ela leaunghawira y nangmy tleh nai Philistia khumi Koliatha i haisau awm; huni haisau ai Leu Maikawm Pawm nithun mang y kanih hawi bamme nai ne. Nang, aly kai nabaly lo; hunira y takhra ateaung alang by y leang,” napi. Hunaibaly Davida my, “Huni haisau tleaung y hawi keh nai ly manira y py awm ai ny y, huni ly kai ai pei ba,” napi.

¹⁰ Huni kani y Davida ly Sawla teng i dengdairei theu nai, kath samrang Akhisa teng y chei bo.

¹¹ Bangtangchi my samrang Akhisa teng y, “Hini Davida napi nai khumi ly Israela samrang ny y a? Neampachychi my lam iy ‘Sawla padei nai sangsang, Davida padei nai meaungmeaungrei’ nanai ni i satang ai khulym thui u nai ny y a?,” napi u.

¹² Davida ly huni khumichi i leu ai paleung theung y adawn i, samrang Akhisa ai khri pa-rei jei.

¹³ Hunai deaungkho y kamthu amlawn iy, nichi i mo y kamthu kamta sa naimy, katheu dawnra y tajiu ryry; pachi phawnchi py mymy i labeaungmuira y leaung hai bo.

¹⁴ Hunai deaungkho y Samrang Akhisa ly my i bangtangchi teng y, “Khen cham! hini khumi ly kamthu ne na a! ni ai nangchi ly ati mana nai kai teng y jeu hai u lawh mo?.

¹⁵ Kai ly kamthu ai aly awm nai sai a? Kai i yhm theung y kai ai khrukhra hai ai nai, ati mana nai kamthu ai pakun lawh mo?,” napi.