1 SAMUELA 2 - Khumi Common Language Bible

Hannah i chiu sa nai

¹ Hannah ly hina nai kamta chiu sa nai ne. Areng my kai ai paleung amo theu hai bo; kai ly mymy i sa pi nai saho y amo theu! kai ly paleung ka-echi ai panui hai ai nai nga bo. Tameuh ly kai ai ang sabawm i, kai ly amo theu bo.

² Areng i chai parai nai kamta ly ami py chai y nai ne. Mymy ny y baly Tameuh takhra by y; achi i chiu nai Tameuh kamta ama hai pajau nai keung by y.

³ Areng ly ati cheaungkhang pany nai sai angym nai ne iy, khumichi i sa nai ngierei tara chih pi i, nangchi ly aeu iy amlyh u moh. Labeaung mang paleung len nai leu theu moh sy.

⁴ Atho awm parai nai tavaimi risachi i thailihochi ly tleu pawn bo; na i py atho by y naichi ly atho awm lawh nai ne.

⁵ Vaichi khala kajeu kawi nai khumichi ly vai i neng y cha-nei ai nai vui tham ai nai tla bo; na i py cha-nei avaw naichi ly bym pa-rei cha ai nai nga bo. Teng nai neampachy ly deaungdi leaung saryhrei tapen; na i py chanau sawi nai amhm ly leaungrei py by y leang bo.

⁶ Areng ly dei nai hawi heng nai py, mymy i khumichi ai tavau pri y tha nai hawi palau teang nai py sa nai ne.

⁷ Mymy ly khumi phyreichi ai nang hai iy, phyreichi ai mawn hai; phyreichi ai panem iy, phyreichi ai ly pasang bo.

⁸ Mymy ly khumi kamawnchi ai spryh i nai pathau iy, khumi kamawn kateuchi ai pasang bo. Nichi ai samrang i chochanauchi hawi amkawm ai nai pei iy, tahm awm nai meingtym y ateh hai bo. Areng ly khaileaung i sangum langdeng ai peang; Huni langdengchi salo y khaileaung pri ai sa nai ne.

⁹ Mymy ly mymy ai ym nai khumichi i hengra kry pi; na i py khumi kamngochi ly kaveng theung y tama u ai; khumi ly amy i atho haiho hawi eaung naira ngo pajau y leang.

¹⁰ Areng i paleung ka-echi ly tama naira avum ai; nichi i tlang tleaung y kani pajyh hai ai. Areng ly khaileaung pri verei y tara chih ai; mymy ly mymy i vawi takhra nai samrang ai sa thai naira angym hai iy, mymy i khai takhra nai khumi ai eaung naira pei ai,” nanai thui bo.

¹¹ Naibaly Elakana ly Ramah mary y awm nai, my i yhm mang y vawi teang bo; na i py deaungdi Samuela ly Siloh mary y awm jo iy, pathyp pi nai keung Eli i anui y Tameuh i kalop sa nai ne. Eli i chapochi

¹² Eli i chapochi ly khumi kamthu kamleaungchi ne. Nichi ly Areng i leu pei naichi py,

¹³ khumichi teng i pathyp pi nai keungchi hnei ai avo nai reita leaungsaichi ai py, tahm khai y naimy kapathypra talam nai khumichi teng y, mymychi i miseaung ai kamsui thomrei awm nai chawn hawi pato reng nai ne. Huni miseaung ly laawmra i theaung thym nai mawichi ai

¹⁴ chawn hawi thun i, ave nai ngierei ai my i pathyp pi nai keungchi i vui syn pi reng nai ne. Siloh mary y apathyp ai tym nai Israela cheng bawibawichi malawn py, huna nai kamta sa nai avum u nai ne.

¹⁵ Huni bo y mawi thauchi leng patlum y rai khala y, pathyp pi nai keung i miseaung jeu iy, apathyp thym nai khumi teng y, “Pathyp pi nai keung i vui dang pi ai nai mawi phyrei pei; pathyp pi nai keung ly byh naira i mawi ngai y; mawi kangheng naini ngai khyh,” nanai hnei reng.

¹⁶ Kapathypra talam nai khumi my, “Kaichi ly reita kamta thauchi leng patlum nai bo y, nangmy i ngai nai lo ba,” nanai thui pi lawh baly, pathyp pi nai keung i miseaung my, “Huni mawi ly vaimy kai ai pei! pei y baly athorei my kanglawm vui na ai!,” nanai thui reng.

¹⁷ Eli i chapo nini i hina nai sa nai ly Areng i mo y khri pa-rei kamngo len nai ne; ati mana nai mo nabaly nini ly Areng teng y talam nairachi ai tahm khai y lawh nai deaungkho y ne.

Samuela Siloh mary y tym nai

¹⁸ Huna nai thym khala y deaungdi Samuela ly kanih mai ka-syn baichu kangjiu amchiu iy, Areng i kalop sa.

¹⁹ Ni i amhm ly saneng tleirei, talam reng nai kapathypra talam ai nai juvo hawi vanrei abang nai khala y, baichu kangjiuchy harei aneng iy syn pi bo.

²⁰ Huna nai khala Eli ly Elakana hawi aju ai amtheaung hai iy, Elakana teng y, “Areng teng y talam nai chapo i jeng y, mymy ly nang ai hini neampachy i dengdairei, takhra cho chanauchi pei sy,” nanai thui pi reng. Hunaibaly nini ly myni i yhm y vawi hawi teang bo.

²¹ Areng my Hannah ai amtheaung hai nai deaungkho y, ni ly chapo leaung thomrei hawi chaniu leaung nyhrei sa bo. Deaungdi Samuela ly Areng i kalop sa naimy veangryh veangryh nai ne.

Eli hawi my i chapochi

²² Vai ly Eli khri pa-rei miteaung cheang na bo. My i chapo nimy Israela chengchi i tlang tleaung y sa nai ngireichi py, nini ly Areng i awm nai Tabynako katheu pa-khora y kalop amsi nai neampachychi hawi tamang nai py, Eli pany nai ne.

²³ Naibaly Eli my nini teng y, “Nangni ly ati mana nai y hina nai sa hawi lawh mo? Nangni i sa nai kamngo ly khumi luteng my thui u bo.

²⁴ Deang ni awi, Areng i khumichi thui u nai satang ly pipi hawi y na ly!

²⁵ Khumi tengtawi tamang naichi ai Areng my ama hai pajau teu i py, Areng i tlang tleaung y tamang nai khumi ai ly ami my ama hai pajau ai mo?,’ nanai parip bo. Na i py nini ly ampo i parip nai leu tangai hawi y; ati mana nai monabaly Areng my nini ai padei ai dawn yb nai deaungkho y ne.

²⁶ Deaungdi Samuela ly veangryh veangryh i, Areng i mo y hawi khumichi i mo y meimai nga nai ne.

Eli i yhm dengtheungchi molam y Amo Leu thui pi nai

²⁷ Amo leaungrei ly Areng teng i amo leu thui pi ai nai Eli teng y tym. Huni amo leu ly hini ne; “Nangchi i amsi pajo Aron hawi yhm dengtheungchi ly Aikupta samrang teng y miseaung achei u nai thym khala, kai ly Aron teng y amteng bo.

²⁸ Kai ly Israela cheng theaung bawibawichi theung i, ni i yhm dengtheungchi ai kai i maichamra y apathyp nai, rimui patawi nai, kai i kangai pany ai nai Ephod amchiu nai kalopchi sa ai nai, kai i pathyp pi nai keung kalop sa ai nai kaimy vawi yb nai ne. Huni bo y maicham y leng patlum nai kapathyp mawichira i phy nga ai avo nai py, nichi ai kaimy vui pi bo.

²⁹ Hunai deaungkho y nang ly kai i leu pei nai y talam nai tawnbawi hawi, katalamrachi ai ngai phi nai paleung hawi khen lawh mo? Eli awi, nang ly kai i khumi talam nai tawnbawi ngiereichira i, hawi keh naichi ai ati mana nai nang i chapochi tym pa-rei cha ai nai pei lawh mo? Ati mana nai nichi ai, kai tleaung y tahm pasang lawh mo?

³⁰ Israela chengchi i yhmkeung, kai Areng Tameuh ly nang i dengtheungchi hawi nupaichi ai, deungtasarei pathyp pi nai keung lawm hai ai, nanai jangni y adeu yb bo. Na i py vai ly huni adeu nai khaw hai y leang bo, nanai kathui. Kai ai tahm khai palo naichi ai, kaimy tahm khai palo ai; kai ai khumi aniu y nai sa naichi kaimy kapaso ai.

³¹ Tangai cham, nang i dengtheung hawi, nang i cheng theaung theung i khumi ka-cheang bawibawichi ai, kapadei chauchau ai nai neng ang tym ai. Hina nai molam y nang i yhm dengtheungchira y, ami py miteaung pa-rei awm ai nai ngo y ai.

³² Nang ly takhra Israela chengchi teng y, kaimy pei nai amtheaung nairachi niu iy, paleung phra naimy ka-e paleung awm ai. Na i py nang i yhm dengtheungra y ami py, miteaung acheang pa-rei awm ai nai nga ai ny y.

³³ Nang i yhm dengtheungra i leaungrei ai ly heng ai nai pei ai; ni ly pathyp pi nai keung lawm ai i, kai i kalop sa ai nai nga ai. Na i py mei paju ai i, athang khai naira tama ai. Nang i takhra katu chanau ngiereichi ly kasah dei u ai.

³⁴ Nang i chapo leaung nyhrei Hopheni hawi Phineha nini ly kanirei my dei hawi mei nai khala, kai i thui pi nai ngiereichi ly teng khyp nai nang pany ai mang.

³⁵ Kai i tlang tleaung y ka-ym awm iy, kai i kangai sa ai nai pathyp pi nai keung leaungrei ai, kaimy vawi takhra ai. Ni ai katu chanau thawn hai ai. Huni khumichi ly kaimy khai takhra nai samrang i mo y kalop sa u jojo ai.

³⁶ Nang i kangpreangchi theung i, heng naimy awm jo nai nang i chanau ngierei ly huni pathyp pi nai keung teng y chei iy, tangka hawi teicha teineichi takeng u ai. Nichi ly teicha teinei nga ai nai molam, pathyp pi nai keungchi kalop sa naira y kasabawm ra nga ai nai hnei kajeaung kaji ai.