1 SAMUELA 19 - Khumi Common Language Bible

Davida ai Sawla my ana nai

¹ Sawla ly Davida ai padei vui ai nai tau nai sai, mymy i chapo Jonathan hawi my i miteaung keh bawibawichi teng y thui pi bo. Na i py Jonathan ly Davida ai khri pa-rei tamen nai deaungkho y,

² Davida teng y, “Kai i ampo ly nang ai padei ai nai khri pa-rei atho sa bo. Khawndam khawn ly adawn ryhpatyh naimy aheu ba.

³ Kai ly nang i awm nai li-prang y chei iy, ngaai sahawi y angdo naimy nang i satang thui pi ai. Ni teng i satang ha harei nga baly, nang ai kang thui pi ai,” napi.

⁴ Jonathan ly ampo Sawla teng y, Davida ai palo naimy thui pi nai ly “Samrang awi, nang i miseaung Davida i tlang tleaung y tamang naira so moh; ni ly nang ai mana khala py, tamang vai y leaung; nang ai py tiu vai y leang. Ni i sa nai ngiereichi ly nang i vui kasabawmra lawm nai ne.

⁵ Ni ly my i tlang areu naimy Koliatha ai padei bo; hunai kamta Areng ly Israela chengchi ai eaung pawi pui nga hai bo. Hunichi nang niu nai khala y amo theu bo. Na i py nang ly kamngo by y nai khumi leaungrei ai ati mana nai tamang ai mo? Ati mana nai Davida ai padei atyhtyh lawh ai mo?,” napi.

⁶ Jonathan i thui nai leuchi ly teng khyp, nanai Sawla my pany hawihai nai deaungkho y, Davida ai padei ai nai atho so y leang bo, nanai Areng i amyn y vaineng adeu bo.

⁷ Hunaibaly Jonathan ly Davida ai palau iy, cheaungkhangchi amti pi chum baly, Sawla teng y hawi. Davida ly vaichi khala i kamta, samrang teng y kalop sa teang nai ne.

⁸ Philistia chengchi hawi tavai atiu taleang bi. Davida my nichi ai athorei my tiu i, nichi ly angpreng u pawn bo.

⁹ Kanirei nai khala y, Areng i phailo hawi y nai, Sawla teng y kun bi bo. Sawla ly tivi syn naimy yhm theung y ateh; Davida ly taro beu pi.

¹⁰ Sawla ly angpang sahawi y Davida ai tivi hawi takhu i, Davida my hi pi vui; tivi ly dengpangra y acheaung tarada na. Davida ly angpreng i tleaung vui bo.

¹¹ Huni vum y my Davida ai padei ai nai, Sawla ly Davida i yhm y khutawi pa-rei typ ai nai khumi phyreichi ai pato. Davida i aju Mikhala my, “Nang ly vai vum my preang ba, ti y baly khawndam nang dei ai bo,” nanai pany hai.

¹² Hunaibaly Davida ai thaibeng mang pala i, ni ly preang i tleaung vui bo.

¹³ Naibaly Mikhala ly yhm y khai nai myn la iy, ira tleaung y paseaung, mi-i mui hawi sa nai lutleang harei khai iy huni salo y kanih khiume bo.

¹⁴ Sawla i khumichi ly Davida ai patiu ai nai tym u i, Mikhala my, “Davida ly keaung no,” napi.

¹⁵ Na i py Sawla ly my i khumichi ai pato taleang bi i, “Nangmychi khypkhyp my Davida ai khen u; ni ai ira hawi raurei vaimy kai teng y jeu hai u; ni ai kaimy padei ai,” napi.

¹⁶ Nichi ly ira takun theung y kun iy khen u nai khala, mi-i mui lutleang hawi paseaung nai, yhm y khai nai myn ira tleaung y niu u.

¹⁷ Sawla ly Mikhala teng y, “Nang ly ati mana nai kai ai tapawp iy, kai i paleung ka-e ai preang hai vui lawh mo?,” napi. Mikhala my, “Ni ai tleaung pa-rei so pi y baly, kai ai padei vui ai nanai thui nai deaungkho y ne,” nanai pathang.

¹⁸ Davida ly huna nai tleaung vui i, Ramah mary y awm nai Samuela teng y chei iy, my i tlang tleaung y Sawla i sa nai ngierei amti pi. Naibaly ni hawi Samuela ly Naioth avang y chei i, hu y awm hawi bo.

¹⁹ Sawla ly Ramah mary ka-peang Naioth avang y Davida awm, nanai thai;

²⁰ hunai deaungkho y niai patiu ai nai khumi phyreichi ai pato. Nichi ly Samuela my lu sa iy lam, aeu u nai amo kamkawm ai niu u. Huna nai khala y Tameuh i phailo ly Sawla i khumichi teng y tym i, nichi py lam, aeu u.

²¹ Huni satang ai Sawla my thai nai khala y, savaichi pato taleang bi; nichi py lam aeu teang. Sawla ly pa-thom savaichi pato bi nai khala py, huna nai kamta sa u taleang bi nai ne.

²² Naibaly Sawla mymy khypkhyp naimy, Ramah mary y chei; ni ly Seku avang y awm nai tuikan pui ra y tym nai khala, Samuela hawi Davida i awm nai meingtym deng i, Naioth avang y awm, nanai pany bo.

²³ Ni ly huni avang y chei nai thym khala y, Tameuh i phailo ly ni teng y tym i, ni py Naioth avang y tym pa-rei, lam aeu prei teang bo.

²⁴ Ni ly my i baichu ateaungchi aleng vui iy, Samuela i mo y lam naimy aeu; naibaly huni kani khengrei, vumtorei, tlang ka-keu naimy aseaungsu bo. (Hini molam y Sawla py amo lawm teang bo a?,” nanai thui achi awm nai ne.)