1 SAMUELA 18 - Khumi Common Language Bible

¹ Sawla hawi Davida nini leu arum hawi chum baly, Sawla i chapo Jonathan ly Davida ai khri pa-rei khrei na i, amymy ai tamen nai kamta tamen nai ne.

² Sawla ly huni kani dengdairei, Davida ai mymy sahawi y awm hai; yhm y vawi ai nai pei y leang bo.

³ Jonathan ly Davida ai khri pa-rei tamen nai deaungkho y, deungtasarei ahawi kamrawi asa ai nai vaineng adeu bo.

⁴ Ni ly my i amchiu nai baichu kangjiu hawi vanrei, tamo baichu, haisau, thailiho, khobaichi ai Davida teng y pei pi bo.

⁵ Davida ly Sawla i pataw nai kalop ngiereira y eaung jojo nai ne. Hunai deaungkho y Sawla ly my i tavai lura y khai. Huna nai sa nai ai Sawla i miteaung kehchi hawi mipuichi my py amo theu nai ne.

Davida ai Sawla my niu ngai y nai

⁶ Davida ly Koliatha ai padei pajau baly, tavaimi risachi hawi yhm mang y vawi i, tym nai marychira i neampachychi ly Sawla ai lamchung u bo. Khumichi ly amo theu khulym thui iy, lam naimy atymchi hawi tarochi beu u.

⁷ Huna nai eaung pawi sa naira y, neampachychi my, “Sawla padei nai sangsangrei, Davida padei nai meaungmeaungrei,” nanai khulym thui u.

⁸ Sawla ly hina nai khulym thui nai ai khrei y i kado theu iy, “Nichi my Davida ly meaung neangneang padei iy, kai ly sang neangneang padei, nanai khulym thui u lawh bo. Ni ai samrang palyn ai nai awm khyh bo ly!,” nanai thui chum baly,

⁹ huni kani dengdairei Davida ai niu ngai y i, ym thai y nai paleung kun bo.

¹⁰ Kani pa-nyh y Tameuh teng i phailo hawi y, nai Sawla i tlang tleaung y tym hai i, kamthu kamleaung kamta ly my i yhm angtheung y aeu nai ne. Davida ly my i kani tleirei sa nai kamta taro beu pi; Sawla ly my i kiu y tivi syn naimy,

¹¹ “Kai ly ni ai angpang hawi abicheng na pa-rei kathun ai,” nanai dawn iy tivi hawi tlen nyhrei takhu bo. Na i py Davida ly tlen nyhrei aheng pi vui nai ne.

¹² Sawla ly Davida ai jei bo. Ati mana nai mo nabaly Areng ly Davida hawi vanrei awm iy, mymy ai ly khai su veng nai deaungkho y ne.

¹³ Hunai deaungkho y Sawla ly Davida ai, khumi leaung sangrei peang nai tavailu areng pei iy, kamlo y pato vui bo. Davida ly my i tavaimi risachi hawi vanrei tavai keung y kun i,

¹⁴ Areng ly ni hawi vanrei awm nai deaungkho y, ni i sa nai ngierei ly eaung nai ne.

¹⁵ Huna nai eaung nai ai Sawla my niu nai khala y, Davida ai jei tleaung y jeira bo.

¹⁶ Na i py Israela hawi Juda khuchira i khumi bawibawichi my ly Davida ai khrei u. Ni ly khumichi ai hawihai palai lu sa pajauiy, tavai thau pajau nai khumi ne nai deaungkho y ne.

Davida hawi Sawla i chaniu apom nai

¹⁷ Naibaly Sawla ly Davida ai palau iy, “Kai teng y chaniu kalen Merab awm. Nang ly Areng i tavaichira y vam parai naimy atiu iy, kai i kalop sa pi ai nabaly, kai ly nang ai hini chaniu hawi apom hai ai,” napi. (My i kiu y padei y naimy, Philistia chengchi kiu y dei hai ai nai paleung ka-kawi kun bo.)

¹⁸ Davida my, “Kai i cheng theaung ly ati mo, kai py ati mo, samrang i meaungcha lawm ai nai ataing na a?,” nanai pathang.

¹⁹ Na i py neng tym nai khala y, Sawla ly chaniu ai Davida teng y pei y naimy, Meholah mary i Adriela teng y pei vui nai ne.

²⁰ Hunai bo y Sawla i chaniu Mikhala ly Davida ai khrei nai ne. Huni satang ai Sawla pany nai khala y, khri pa-rei amo theu.

²¹ Mymy i paleung theung y, ““Kai ly Mikhala ai Davida teng y kapei ai; ni ai deaung kamta palawn iy, Davida ai Philistia chengchi kiu y dei hai ai,” nanai dawn bo. Hunai deaungkho y Sawla ly pa-nyh Davida teng y, “Nang ly kai i meaungcha lawm takengkei ai mang,” napi.

²² Ni ly my i bangtangchi ai palau iy, “Nangchi ly Davida teng y, samrang ly nang ai khrei nai ne. Miteaung kehchi my py khrei; hunai deaungkho y huni neng ly samrang i chaniu hawi apom ai nai, nang i vui neng kahawi ne, nanai leu kamsyh y thui pi u,” nanai leu taviu bo.

²³ Hunaibaly nichi ly samrang i taviu nai kamta, Davida teng y amti pi. Davida my, “Samrang i meaungcha lawm nai ly khri pa-rei tahm awm nai ne. Kai kamta ati sai py ny y nai khumi kamawn leaungrei i vui ly pipi ataing y nai ne,” napi.

²⁴ Miteaung kehchi py, Davida i thui nai leu ai Sawla teng y amti pi teang.

²⁵ Naibaly Sawla my nichi teng y thui pi bi nai ly “Nangchi my Davida teng y, Samrang ly nang ai chaniu pei ai i, tamo muivang palawn ai nai, nang ly Philistia khumi kadei leaung chungvaireichi teng i lengkhym syn pi sy; huni ly paleung ka-echi ai vawitheung tha nai, palawn ai nai aly ngai nanai thui pi,” nanai leu pei bo. (Sawla hina nai sa nai ly Davida ai, Philistia khumichi i kiu y dei hai ai nai tau sa nai ne.)

²⁶ Samrang Sawla yhm i miteaung kehchi ly samrang i leu pei nai kamta, Davida teng y amti pi nai khala y, Davida ly samrang i meaungcha lawm ai nai molam adawn i, amo theu nai ne. Apom ai nai kani tym y rai khala y,

²⁷ Davida ly my i risachi hawi theu jo i, Philistia khumi leaung chungvai nyhrei ai padei bo. Ni ly samrang i meaungcha lawm ai nai i vui y, nichi i lengkhym angym pa-rei, samrang teng y syn pi. Hunai deaungkho y Sawla ly my i chaniu Mikhala ai Davida hawi apom hai bo.

²⁸ Areng ly Davida hawi vanrei awm nanai hawi, Mikhala ly Davida ai khrei nanai py, pany hawihai nai deaungkho y,

²⁹ Sawla ly Davida ai jei tleaung jeira i, my deungrei Davida ai paleung ka-e khai bo.

³⁰ Philistia tavaimichi ly jeu iy tiu reng nai ne. Na i py Davida ly tavai atiu nai tleirei y, Sawla i tavaimi miteaung kehchi tleaung y eaung keh nai deaungkho y, Davida ly khri pa-rei amyn amthang nai ne.