1 SAMUELA 16 - Khumi Common Language Bible

Davida ai asitui lei iy samrang palyn nai

¹ Areng my Samuela teng y, “Nang ly Sawla i vui y mana tanrei paleung si hai jo ai mo? Kaimy ni ai ly Israela samrang i nai kapala vui bo; na i py Olive asitui syn iy, Bethlehem mary y awm nai Jesai napi nai khumi leaungrei teng y chei; kai ly ni i chapo leaungrei ai, samrang lawm ai nai vawi takhra yb veng bo,” napi.

² Samuela my, “Huni kalop kai ly mana kasa pajau ai mo? Sawla my huni satang thai lawh baly, kai ai ang tleh ai bo!,” napi. Areng my, Nang ly sicho harei syn iy chei ly nang ly Areng teng y apathyp ai nai tym nai ne, nanai thui;

³ Apathyp nai ra y Jesai ai palau; nang mana sa ai nai tla ai mo, nanai kaimy kang thui pi ai. Kai i kang thui pi nai khumi ai, samrang y palyn nai asitui leih ba,” nanai leu pei bo.

⁴ Samuela ly Areng i leu pei nai kamta sa ai nai, Bethlehem mary y chei bo. Huni mary i lu sa nai miteaung kehchi ly kaso theu u naimy lamchung u i, “Areng awi, nang ly paleung awmnem naimy jeu nai a?,” nanai deng.

⁵ Samuela my, “Paleung awmnem naimy kang jeu nai ne; kai ly Areng teng y apathyp ai nai kang jeu nai teu; nangchi ly nangmychi naimy apachai iy, kai hawi vanrei abang u,” napi. Jesai i chapochi ai py mychi apachai iy, apathyp naira y jeu ai nai palau bo.

⁶ Nichi tym u nai khala y Samuela ly Jesai i chapo Eliaba ai niu baly, “Areng i mo y angdo nai, hini khumi ly mymy i vawi pi takhra nai ne ngaw khyh,” nanai adawn.

⁷ Na i py Areng my ni teng y, “Hini khumi i jeng asang nai hawi, mo-cha hawi nai ly khen moh; kai ly khumi kamta chih nai ny y; huna nai y kai aly ngai y; khumi ly angam mang i awm nai sai khen reng; kai ly paleung ai khen nai ne,” napi.

⁸ Naibaly Jesai ly my i chapo Abinada ai palau iy, Samuela teng y tym hai; na i py Samuela my, “Ni ai py Areng my vawi y leang,” napi.

⁹ Jesai ly Shammah ai palau; huna nai khala, “Hini khumi ai py Areng my vawi y leang,” nanai Samuela my napi bi.

¹⁰ Huna nai kamta Jesai ly my i chapo leaung saryhreichi ai Samuela teng y tym hai bo. Naibaly Samuela my ni teng y, “Hinichi theung i leaungrei ai py, Areng my vawi y leang,” napi iy,

¹¹ “Nang teng y chapo awm rai a?,” nanai deng. Jesai my, “Chapo kasawi keh awm; ni ly beramchi typ nai ne,” napi. Samuela my, “Ni ai jeu hai, ni tym y ryrei ly achi apathyp nai pawira y kun ai ny y,” napi.

¹² Hunai deaungkho y Jesai ly palau ai nai khumi pato; ni ly mo-cha hawi iy no-na by y nai thawndeang deaungdi leaungrei ne; ni i mei py a-ai chei na. Areng my Samuela teng y, “Kai i vawi takhra nai khumi ly hini ne; hini khumi ai asitui leih ba!,” napi.

¹³ Samuela ly Olive asitui la iy, Davida ai amjo amnauchi i mo y asitui leih pi. Huni kani dengdairei Areng i phailo ly Davida teng y tym. Naibaly Samuela ly Ramah mary y vawi ali teang bo.

Sawla i yhm y Davida tym nai

¹⁴ Areng i phailo ly Sawla teng i nai theu veng bo. Areng my phailo hawi y nai pato i, ni ai patang hai nai ne.

¹⁵ My i miseaungchi my, “Tameuh ly phailo hawi y naichi my, nang ai patang hai ai nai ang pato pi nai ne, nanai kaichi pany bo.

¹⁶ Hunai deaungkho y, samrang awi, nang ly kaichi ai leu pei baly, taro beu kawp nai khumi ai kaichi my kanghau pi ai; nimy phailo hawi y nai kun nai thym khala y taro beu pi baly, nang ly kari kamta hawi ali teang ai,” nanai thui pi u bo.

¹⁷ Sawla my nichi teng y, “Taro beu kawp nai khumi ai hau u ly kai teng y jeu hai,” napi.

¹⁸ My teng y awm nai miseaung leaungrei my, “Bethlehem mary y awm nai Jesai teng y, taro beu kawp nai chapo leaungrei awm; ni ly sorai paleung awm nai, mo-cha hawi nai, tavai atiu kawp nai, leu haidau awm nai khumi ne. Areng ly ni hawi vanrei awm,” napi.

¹⁹ Sawla ly Jesai teng y savaichi pato i, Jesai teng y, “Beram typ nai nang i chapo Davida ai ly kai teng y pato,” nanai leu pei.

²⁰ Jesai ly tako syn nai keaungngo kano kasau harei, kreip hang kawityh nai mawipeih adym harei hawi mi-icho harei ai, Davida hawi vanrei Sawla teng y pato jo bo.

²¹ Davida ly Sawla teng y tym nai khala y, my i amtaw thau pi; Sawla my py ni ai khri pa-rei khrei nai deaungkho y, my i tavai ateaung syn pi nai keung y vawi takhra bo

²² Naibaly Sawla my Jesai teng y khumi pato i, “Kai ly Davida ai paleung bi nai ne, kalop sa ai nai kai teng y awm sy,” nanai khumi pato iy leu pei bo.

²³ Huni kani i dengdairei Tameuh my phailo hawi y nai Sawla i tlang tleaung y tym nai khala y, Davida ly my i taro beu pi. Naibaly phailo hawi y nai ly theu vui i, Sawla ly hawi ali teang nai ne.