1 SAMUELA 14 - Khumi Common Language Bible

Jonathan i vam nai sai

¹ Kanirei nai khala y Jonathan ly my i tavai ateaungchi syn pi nai thawndeang teng y, “Philistia tavaimichi i tai naira mang y kun hawi sina,” napi. Huna nai thui i py, Kibeah mary hawi palo y nai Mikron avang thaisi keung anui y,

² tai iy awm nai ampo Sawla teng y ly thui pi y; Sawla ly hu y khumi leaung chungvai tariurei hawi awm nai ne.

³ (Ephod amchiu nai pathyp pi nai keung ly Ahijah ne; ni i ampo ly Ikabo i amjo Ahitub ne. Ahitub ly Phineha i chapo ne; Siloh mary Areng i pathyp pi nai keung Eli i katu ne.) Jonathan theu jo nai py khumichi pany u y.

⁴ Mikhama mawi sala lam tengteng mang y, lengseaung para kachawn pui ha harei awm; lengseaung para kachawn pui harei ly Boze, nanai amyn pathi; huni ly mawi sala lam i tosyh mang y awm i, Mikhama mary ai motha nai ne. Takhra lengseaung para kachawn pui ly Seneh, nanai amyn pathi.

⁵ Huni ly mawi sala lam tokalawi mang y awm i, Keba mary mang y motha; Jonathan ly Philistia tavai taira y kun ai nai, hini lam tako ai nai tla.

⁶ Jonathan my thawndeang teng y, “Tameuh by y nai Philistia chengchi i tai naira mang y kun hawi sina; Areng my ani ai sabawm lym ai; mymy ang sabawm lawh baly, ani ly khumi di parai teu i py eaung naira nga ai,” napi.

⁷ Thawndeang my, “Nang i ngai nai kamta so ba; kai ly nang hawi vanrei abang ai,” nanai pathang.

⁸ Jonathan my, “Hawi mang, ani chei iy Philistia chengchi teng y mo patei ai;

⁹ nichi my ani ai, ajeng hawi rai ang napi baly, ani ly amyni i tym nai meingtym y ajeng ai.

¹⁰ Na i py nichi my, mychi teng y ani ai jeu hawi ang napi baly, ani ly nichi awmra y chei ai. Ati mana nai mo nabaly hini ly Areng my, achi ai ang eaung hai ai nai ka-ma-ra ne pajau,” napi.

¹¹ Hunai baly nini ly Philistia chengchi ai mo niu hai i, Philistia chengchi my, “Khen u cham! Hebrai cheng phyreichi ly mychi abyh nai khaileaung kho theung i dengdairei ang theu u bo,” nanai thui u.

¹² Naibaly nichi my Jonathan hawi thawndeang teng y, “Hi y jeu hawi kalau! kaichi my nangni teng y thui pi ai nai awm,” nanai aeu iy palau bo. Jonathan my thawndeang ai ly “Kai nithun abang, Areng my Israela chengchi ai eaung hai bo,” nanai thui pi chum baly,

¹³ mawi sala lam dengdairei ava naimy theu hawi bo; thawndeang py ni i nithun abang bo. Jonathan ly Philistia chengchi ai khyh pakhau iy nui pawn, thawndeang py nichi ai tleh nai ne.

¹⁴ Huni tengtang y Jonathan hawi thawndeang my padei manme nai, huni meingtym kakau hlau nyhrei awm naira y, khumi leaung apomrei padei hawi nai ne.

¹⁵ Tavai prangra y awm nai Philistia cheng bawibawichi ly khri pa-rei jei u; tai theung y awm nai tavaimichi hawi, tavai kang aleaung nai risachi ly athengra nanai ne. Khaileaung malawn py amchyh na i, paleung ka-echi ly ahei u phro phra bo.

Philistia chengchi tavai sum nai

¹⁶ Benjamin khu ka-peang Kibeah mary y awm nai Sawla i tamcheaung typ nai khumichi ly Philistia chengchi ahei khrikhra naimy preang nai niu u.

¹⁷ Huna nai khala y Sawla ly my i khumichi teng y, “Tavaimi kamkawm theung i tama nai pany ai nai kati cham,” nanai leu pei nai khala y, khumi kati cham i, Jonathan hawi ni i tavai ateaung syn pi nai thawndeang by y nai pany u bo.

¹⁸ Sawla my pathyp pi nai keung Ahijah teng y, “Ephod hi y jeu hai,” napi. (Huni kani y Ahijah ly Ephod ai, Israela chengchi i mo y syn pi.)

¹⁹ Sawla ly pathyp pi nai keung hawi leu arum nai thym y, Philistia chengchi i tai naira y ahei khrikhra nai sai ly typra typra nai deaungkho y Sawla my ni teng y, “Areng hawi adeng ai nai neng by y leang bo!,” napi.

²⁰ Naibaly ni hawi ni i risachi ly khrukhra nai theung y, mychi tengtawi atamang meungmang naimy atleh u nai Philistia chengchi theung y kun iy tiu u bo.

²¹ Philistia chengchi mang y amkawm iy, nichi i tavaira y kun u jo nai Hebrai chengchi ly Sawla hawi Jonathan nini teng y amkawm u teang nai ne.

²² Ephraim mawitleaung mang y aheu u nai khumi phyreichi ly Philistia chengchi angpreng u pawn nai satang thai u baly, hui u iy tiu u teang.

²³ Israela chengchi ly Philistia chengchi ai Bethavan mary katlen nai ryrei tiu u; huni kani y Areng ly Israela chengchi ai atleu nai ne.

Tavai atiu pajau nai khala y avum nai saichi

²⁴ Sawla my, Vaini paleung ka-echi ai kai, vawitheung tha teang y ryrei ly teicha teinei cha nei nai khumi ly amsawi lawi kalei sy,” nanai vaineng abeu kheih nai deaungkho y, huni kani y Israela chengchi ly kajeu alam nai y atho bai u na bo. Kani khengrei ami py teicha teinei cho u y.

²⁵ Nichi bawibawi ly daichi thengreung theung y tym u nai khala, meingtym tleitleirei y khawiphichi niu u.

²⁶ Daichi theung y khawi hang awm mang i py, Sawla i pasawi nai ai jei nai deaungkho y, ami py cho vam y.

²⁷ Na i py Jonathan ly ampo i pasawi kheih nai ly thai y; huna nai y ni ly cheaungkau hawi khawiphi thun iy pajawp, khawi bym phyrei py cha. Naibaly ni ly vaimy khesere nai ne.

²⁸ Na i py risa leaungrei my, “Achi bawibawi ly atho bai na veng bo; na i py nang i ngampo my kaichi ai,’ Vaini teicha teinei cha nai khumi ly amsawi lawi kalei sy,’ nanai pasawi kheih nai ne,” napi.

²⁹ Jonathan my, “Achi cheng theaungchi i vui y, ngaai i sa nai kalop ly pipi teng y nai ne; khawi hang maidenrei kacha nai y, mana tanrei khesere na mo, nanai khen u cham!

³⁰ Leu kabeaung y achi cheng bawibawi ly paleung ka-echi teng i nga nai teicha teineichi cha ai nai nga lawh teu baly, mana tanrei hawi ai mo? mana tanrei tleh pajau ai mo, nanai phai adawn iy khen u!,” napi.

³¹ Huni kani y Israela chengchi my Philistia chengchi ai Mikhama mary dengdairei Aijalon mary y tym pa-rei, lam jeungrei tiu u prei nai chum baly, teicha teinei ngo y nai deaungkho y atho bai u nai ne.

³² Hunaibaly nichi ly paleung ka-echi teng i nga nai vawnsaichi mang y angpreng u i, sichi, beramchi, mi-ichi la u iy, huni meingtym y my tleh u i, thinai hawimy cha u.

³³ Huna nai khumichi ly thinai hawimy cha nei nai y Areng i tlang tleaung y kamngo sa u bo, nanai Sawla teng y amti pi nai khala y, Sawla my, “Nangchi ly vaineng takan u lawh bo ly! lengseaung pui ai hini meingtym y pali iy jeu hai u,” napi

³⁴ Naibaly ni my, “Khumichi teng y chei iy, nichi i sichi hi y jeu hai sy; nichi ly tawnbawichi ai hini meingtym y tleh iy, cho u sy; thi abawi nai mawi cha nai molam y, Areng ai tiu nai kamngo so u moh sy,” napi. Naibaly huni vum y khumichi ly mychi i tawnbawichi, huni meingtym y syn iy tleh u bo.

³⁵ Sawla ly Areng i vui maicham sa; huni maicham ly my i sa angchei nai maicham ne.

³⁶ Sawla ly my i khumichi teng y, “Achi ly Philistia chengchi teng vum y chei iy tiu u sina; khutawi pa-rei vawnsaichi lawm iy padei u pawn sina,” napi baly khumi mipuichi my, “Nangmy dawn nai kamta so ba,” napi u. Na i py pathyp pi nai keungchi my, “Achi my Tameuh teng y deng u man sina,” napi.

³⁷ Naibaly Sawla ly Tameuh teng y, “Kaichi ly Philistia chengchi ai tiu ai a? nang ly kaichi ai eaung hai ai a?,” nanai deng. Na i py huni kani y Tameuh ly pathang pi y.

³⁸ Hunanai khala y Sawla ly khumichi ai lu sa nai keungchi teng y, “Hi y jeu u, vaini achi ati kamngo sa mo, nanai pany ai nai adeng u.

³⁹ Kamngo sa nai khumi ly kai i chapo Jonathan ne lawh teu i py padei vui ai, nanai Israela chengchi ai atleu nai keung, heng nai Areng teng y kai, leu adeu bo,” napi. Na i py ami py tlau y.

⁴⁰ Naibaly Sawla my nichi teng y, “Nangchi bawibawi ly hu mang y angdo u, kai hawi Jonathan ly hi mang y angdo ai,” napi. Mipuichi my py, “Ati py ne sy, nangmy i paleung y dawn nai kamta so ba,” nanai pathang u.

⁴¹ Sawla ly Israela chengchi i Areng teng y, “Aw Areng, vaini nang ly ati mana nai deaungkho y, kaichi ai pathang pi y nai mo? Aw Israela chengchi i Areng Tameuh, lengseaung kachaichi mang my kaichi ai pathang pi kyh ba; Jonathan py ne sy, kamngo awm lawh baly Urim mang pathang pi kyh ba. Nang i khumi Israela chengchi teng y kamngo awm lawh baly, Thummim mang pathang pi kyh ba,” napi. Huna nai khala y Sawla hawi Jonathan nini teng y kamngo awm, nanai ka-ma-ra pany nai deaungkho y, Israela chengchi ly kamngo lawi u bo.

⁴² Naibaly Sawla my, “Kai hawi kai i chapo Jonathan sala y chih pi kyh ba,” napi. Naibaly Jonathan teng y avah nai ne.

⁴³ Naibaly Sawla my Jonathan teng y, “Nang ly ati sa mo?,” nanai deng. Jonathan my, “Kai ly khawi hang maidenreichy kacha; leu pei nai kamta kadei ai nai angveirym bo,” napi.

⁴⁴ Sawla my ni teng y, “Kai ly nang ai padei y lawh baly, Tameuh my kai ai padei sy,” nanai thui.

⁴⁵ Na i py khumichi my Sawla teng y, “Israela chengchi ai eaung hai nai keung Jonathan ai padei vui ai lawh bo a? Ni i lu tleaung i sam amairei py, khaileaung y tlo y ai nai kaichi ly heng nai Areng i amyn y leu adeu bo; vaini, ni i sa nai kalop ly Tameuh my sabawm nai kalop ne,” napi u. Huna nai hawimy khumichi ly Jonathan ai atleu u bo.

⁴⁶ Huni bo y Sawla my Philistia chengchi ai preng iy tiu nai ly anawn bo; khumichi py mychi i khu ka-peang mang y vawi u akyhkyh bo.

Sawla i peang nai hawi yhm dengtheung

⁴⁷ Sawla ly Israela pri y samrang lawm nai bo y, ni ly meingtym tleirei y awm nai, my i paleung ka-echi napi nai Moba khumichi, Ammon khumichi hawi Edom khumichi ai py, Zobah samrangchi hawi Philistia khumichi ai py, tavai tiu nai ne. Ni ly mani meingtym y atiu nai py ne sy, tavai eaung.

⁴⁸ Ni ly khri pa-rei vam parai naimy atiu nai ne. Amalek chengchi ai malawn py, tiu pajau nai ne. Ni ly Israela chengchi ai, paleung ka-echi teng i nai atleu pi bo.

⁴⁹ Sawla i chapochi ly Jonathan, Isavi, Malakhishuachi ne. Chaniu kalen ly Merab, chaniu katheang ly Mikhala, nanai amyn pathi.

⁵⁰ My i aju amyn ly Ahinoam i chaniu Ahima ne; my i tavailu areng keh ly my i ampochy Nera i chapo Abana ne.

⁵¹ Sawla i ampo Kisa hawi Abana i ampo Nera ly Abiela i chapochi ne.

⁵² Sawla ly my i heng nai ryrei, Philistia khumichi hawi khri pa-rei tavai atiu; hunai deaungkho y ni ly atho awm nai khumi, sorai paleung awm nai khumi ai avum baly, my i tavaimi theung y, nichi ai pakun dudu nai ne.