1 SAMUELA 13 - Khumi Common Language Bible

Philistia chengchi hawi tavai atiu nai

^1-2 Sawla ly khumi leaung sang thomrei vawi takhra iy, leaung sang nyhrei ai ly mymy hawi vanrei, Mikhama mary hawi bethela mawitleaung meingtym i vui khai patyp bo. Leaung sangrei ai ly my i chapo Jonathan hawi vanrei, Benjamin khu ka-peang Kibeah mary mang y pato nai ne. Huni bo i khumichi ai ly Sawla my yhm mang y vawi hai teang bo.

³ Jonathan ly Keba mary Philistia chengchi i tavailu areng ai padei vui bo. Huni satang Philistia cheng bawibawichi thai u; huna nai khala y Sawla ly savaichi ai Israela pri verei y pato i, Hebrai chengchi ai tavai keung y kun u ai nai baw eng iy angym hai bo.

⁴ Philistia tavailu areng ai Sawla my padei vui nai satang hawi, Philistia chengchi ly Israela chengchi ai niu ngai y nai satang ai Israela chengchi thai u i, Sawla i leu pei nai kamta, Kilakala mary y jeu u achu bo.

⁵ Philistia chengchi ly Israela chengchi ai tiu ai nai akachu u. Nichi teng y keaungngo ka-ri 30,000 rei, keaungngo atang nai risa leaung 6,000 reichi hawi, pangli peang i spryh kamta kati pajau y na pa-rei, nawi nanai tavaimi risachi awm. Nichi ly amsa u i, Bethavan nisi mang i Mikhama mary y tai u bo.

⁶ Naibaly nichi ly Israela chengchi ai athorei my tiu u i, ahei hai phro bo; Israela cheng phyreichi ly tapiuchi, lengseaung sala, tuikan, khaileaung khochira y aheu u bo.

⁷ Phyreichi ly Jordan tavo angpeang u iy, Kad hawi Kilead khu ka-peangchi mang y preang u; Sawla ly Kilakala mary y awm jo rai. Naibaly ni hawi vanrei awm nai risachi ly jei naimy kaso theu u bo.

⁸ Sawla ly Samuela my leu pei nai kamta kani saryhrei ajeng i py, Samuela ly Kilakala mary y tym y. Nichi ly Sawla teng i nai angpreng ai nai yhyh na bo i,

⁹ Sawla ly leng patlum nai kapathypra hawi amkawm nai kapathyprachi, my teng y jeu hai ai nai khumichi ai pato chum baly, leng patlum nai kapathypra talam bo.

¹⁰ Huna nai apathyp nai pajau ai enten nai khala y, Samuela tym ryp bo. Sawla my lamchung i py,

¹¹ Samuela my, “Nang ly mana sa vui lawh mo?,” nanai deng. Sawla my, “Khumichi ly kai teng i nai preang u dudu bo; nang ly adeu nai neng y tym y lawh; naibaly Philistia chengchi ly Mikhama mary y a-engchu na bo.

¹² Hunai deaungkho y nichi ly kai i awm naira Kilakala mary y ang tiu u ai nanai hawi, Areng teng y hnei takeng y rai nanai py ka-dawn bo. Huna nai y apathyp y baly avo y leang bo i, apathyp vui nai ne,” napi.

¹³ Samuela my, “Nang i sa nai kalop ly akhum nai ne; nang ly nangmy i Areng my leu pei nai tangai y; tangai lawh baly mymy ly nang hawi vanrei, nang i katu chanauchi ai, Israela pri y deungrei peang hai ai.

¹⁴ Na i py vai nang ly samrang deung sau y leang bo; nang ly nangmy i Areng Tameuh my leu pei nai akhi vui lawh bo i, mymy ly my i khumichi ai peang hai ai nai, my i paleung kangai hawi avum nai khumi ai khai ai,” napi.

¹⁵ Samuela ly Kilakala mary i nai theu iy, khuleaung amsa bo. Hu y awm nai khumi phyreichi ly Sawla hawi vanrei, my i tavaimichi awm nai mang y abang u. Nichi ly Kilakala mary i dengdairei, Benjamin khu ka-peang theung i Kibeah mary y chei u. Sawla ly my i tavaimichi ai kati cham i, leaung chungvai tariurei vi awm nai ne.

¹⁶ Sawla ly my i chapo Jonathan hawi, myni teng y awm nai tavaimichi ai, Benjamin khu ka-peang i Keba mary y tai hai bo. Philistia tavaimichi ly Mikhama mary y awm u.

¹⁷ Philistia tavaimichi ly phy thomrei phy iy, tavai tai naira i nai theu u. Kamkawm harei ly Shual khu ka-peang theung y awm nai Ophra mary awm nai mang y,

¹⁸ vai kamkawm harei nai ly Beth Horon mary awm nai mang y, takhra kamkawm harei nai ly Zeboim leaunghawi hawi daichi ka-vym mang y motha nai khujyh lam mang y hui u nai ne.

¹⁹ Hebrai chengchi i tivi, haisauchi sa nai ly Philistia chengchi my paka nai deaungkho y, Israela pri y vaini khrairei, thip kawp nai sara by y.

²⁰ (Israela chengchi ly li thawn naira tamo, phalavachi, atiuchi hawi cheaungchenchi kata ai nai ly Philistia chengchi teng y chei iy pataw u ai nai tla.

²¹ Atiu bo sa hai nai hawi, tivi apheung sa hai nai vang ly tangkacho tlaurei pei ai nai tla. Naibaly li thawnra tamo hawi phalava bo sa hai nai vang ly tangkacho tlau nyhrei pei ai tla.)

²² Hunai deaungkho y tavai atiu ai nai kani y ly Sawla hawi my i chapo Jonathan teng y ny y baly, Israela chengchi teng y haisauchi, tivichi by y nai ne.

²³ Philistia chengchi my tavaimi kamkawm harei pato iy, Mikhama mawi sala i lam y amo hai bo.