1 SAMUELA 10 - Khumi Common Language Bible

¹ Naibaly Samuela ly Olive asitui adym sa iy, Sawla i lu y lei chum baly ni ai pachawm naimy, “Areng ly nang ai mymy i khumi Israela chengchi i samrang y khai takhra pi bo; nang ly mymy i khumichi ai peang iy, paleung ka-echi my ana naira i nai, ama ha ai nai tla ai. Areng ly nang ai mymy i khumichi ai peang nai keung lawm hai iy khai takhra pi bo, nanai ka-ma-ra ly hini ne.

² Vaini nang ly kai teng i theu nai khala y, nang ly Benjamin khu ka-peang theung i Zelzah mary y awm nai Rakeli i tapreaung sahawi y, khumi leaung nyhrei avum ai; nini my nang i hau nai keaungngo kano kasauchi niu teang bo i, ngampo ly keaungngo kano kasauchi i vui paleung mawn y naimy, nang i vui y naini paleung mawn nai satangpy,’ kai i chapo molam y mana kasa ai mo?’ nanai tangam nai satang py, nang ai ang thui pi ai.

³ Nang ly huni meingtym i dengdairei Tabor leaunghawi i, ngopraibiu keung y tym pa-rei tako ai nai tla; hu y khumi leaung thomrei ai avum ai; nichi ly Bethela mary y Tameuh teng apathyp ai chei nai khumichi ne. Nichi theung i leaungrei ly mi-i thomrei ryh naimy, leaungrei ly tako phi thomrei syn naimy, takhra leaungrei ly kreip hang kawityh nai mawipeih adym syn naimy ang jeu ai.

⁴ Nichi my nang ai leu preng chum baly tako phi nyhrei ang pei ai i, nang ly talam ai nai tla.

⁵ Naibaly nang ly Philistia khumichi i tai nai meingtym Kibeah mary Tameuh i mawi y chei kalau ai nai tla. Mary apai pa-khora y nang ly taro katheang kalen, byhlyhchi, eng nai beu naimy, mawi saleung maicham i dengdairei, ang satla kathiu nai amochi hawi avum ai; nichi ly lam naimy aeu u ai.

⁶ Huna nai khala Areng i phailo ly nang teng y ang tym ai i nang ly nichi hawi vanrei lam naimy aeu iy, takhra vui nai khumi lawm ai.

⁷ Huni atitichi ang tym nai khala y, Tameuh my lam patei nai kamta so.

⁸ Nang ly kai i mo y Kilakala mary mang y chei man ai nai tla. Kai ly huni mary y nang hawi vanrei avum iy, leng patlum nai hawi amkawm nai kapathyprachi talam ai. Nang ati sa ai mo, nanai kai, kang jeu iy kang thui pi y ryrei ly huni mary y kani saryhrei ajeng ba,” napi.

⁹ Sawla ly Samuela teng i nai theu nai khala y, Tameuh my Sawla ai paleung kangtha pei nai ne. Naibaly Samuela my thui pi nai bawibawi ly huni kani y tym ryp bo.

¹⁰ Sawla hawi miseaung ly Kibeah mary y tym hawi nai khala, amo kamkawm phyreichi my, nini ai lamchung bo. Tlenrei khyhmy Tameuh i phailo ly Sawla teng y tym nai deaungkho y, ni ly amochi hawi vanrei lam naimy aeu bo.

¹¹ Ni ai vaichi khala y pany nai khumichi my, hina nai lam aeu nai niu u baly, “Kisa i chapo ly mana vui lawh mo? Sawla py amo lawm rau lawh bo a?,” nanai mychi tengtawi adeng u lengleang.

¹² Huni meingtym y awm nai khumi leaungrei my, “Takhra amochi i ampochi ly amichi mo?,” napi. Huna nai ly “Sawla py amo lawm bo a?,” nanai thui achih nai kamteaung awm nai ne.

¹³ Lam aeu chum nai khala y Sawla ly mawi salo maicham mang y lyn kalau jo bo.

¹⁴ Sawla i ampochy my Sawla hawi miseaung ai niu baly nini teng y, “Nangni ly ma mang i nai vawi hawi nai mo?,” nanai deng. Sawla my, “Keaungngo kano kasau hau hawi nai ne; kaini ly niu y nai deaungkho y, Samuela teng y kachei hawi nai ne,” nanai pathang bo.

¹⁵ Sawla i ampochy my, “Ni my mana ang thui pi mo?,” nanai deng.

¹⁶ Sawla my, “Nimy ly huni tawnbawi ly niu bo, nanai ang thui pi,” napi. Na i py Samuela my thui pi nai, pri peang ai nai satang ly ampochy teng y thui pi y nai ne.

Sawla ai samrang palyn iy tahm pasang nai

¹⁷ Samuela ly khumichi ai Mizapa mary y palau achu hai i,

¹⁸ Nichi teng y, “Israela chengchi i Areng Tameuh my thui nai ly ‘Nangchi ai Aikupta pri i dengdairei kaimy pahawi iy, nangchi ai ana kalikachi nai Aikupta khumichi hawi, takhra khumi bawibawichi teng i nai atleu bo.

¹⁹ Kai ly nangchi i Tameuh, ngari kamtangchi hawi rai naichi theung i, nangchi ai atleu nai Tameuh ne. Na i py nangchi ly kai ai khai su iy, kai teng y samrang hnei u bo. Hawi mang, nangchi ly Areng i mo y cheng theaung ka-thui, nupai ka-thui angym u,’ nanai leu pei bo,” napi.

²⁰ Naibaly Samuela ly cheng theaungchi ai ka-thui ka-thui mo mang y jeu hai iy tambe va i, Benjamin cheng theaung ai vawi takhra bo.

²¹ Hunaibaly Samuela my Benjamin cheng theaung i yhm dengtheungchi ai, mo mang y jeu hai iy, Matari i yhm dengtheung ai vawi takhra bo. Naibaly Matari yhm dengtheung i neampachochi ai, momang y theu hai bi iy, Kisa i chapo Sawla ai vawi takhra bo. Na i py ni ai hau nai niu y nai khala y,

²² khumichi ly “Sawla ny y naimy khumi takhra leaung leaungrei awm a?,” nanai Areng teng y deng u. Areng my, “Sawla ly hi y awm; ni ly vawnsaichi khai nai anui y aheu vui,” napi.

²³ Naibaly nichi my angpreng iy Sawla ai khumichi theung y patheu nai khala y, ni ly takhra khumi bawibawichi tleaung y, lu harei cho nai niu u bo.

²⁴ Samuela my khumichi teng y, “Areng my vawi takhra nai ly hini khumi ne he! achi theung y ni hawi atawm nai khumi leaungrei py by y,” napi. Khumi bawibawichi my py, “Samrang ly heng sau sy!” nanai aeu u bo.

²⁵ Samuela my khumichi teng y samrang i peang nai reitachi hawi samrang i nga ai avo naichi thui pi pachai bo. Naibaly huni leaungsaichi ai cha-iu theung y tajiu typ iy, meingtym kachaira y kry me bo. Naibaly khumichi ai ly mychi i yhm mang y pato akyhkyh.

²⁶ Sawla py Kibeah mary my i yhm mang y vawi ali teang bo. Khumi sorai phyreichi i paleung ai Tameuh my amtlau hai nai deaungkho y, nichi ly Sawla hawi vanrei abang u bo.

²⁷ Na i py khumi hawi y naichi my, “Hini khumi ly kaichi ai ati kahawi ang sa pi pajau ai mo?,” napi u. Nichi ly Sawla ai tahm khai u y i, ati langseaung py pei u y.