1 NENG SATANG 25 - Khumi Common Language Bible

Achura yhm i katyn kapau beu kawp naichi

¹ Davida my Levi theaung miteaung kehchi ly chiu sa naira y lu sa ai nai Asap, Heman hawi Jeduthun nupaichi ai vawi takhra u bo. Nichi ly taro katyn, sa-ra katynchi hawi amkawm iy, Tameuh i leu thui u. Chiu sa naira y lu sa ai nai vawi takhra naichi hawi, nichi i sa ai nai kalopchi ly anui

² mang i chi ne.

³ Jeduthun i chapochi napi nai Kedalia, Zeri, Jeshaia, Shimei, Hashabiah hawi Matithiachi ly mymychi ampo my leu pei nai tangai iy, taro katyn hawi amkawm naimy Tameuh i leu thui nai, Areng ai palo nai, kawn naimy palo naichi sa u bo.

⁴ Heman i chapo leaung holai palyhreichi ly: Bukia, Mattniah, Uziela, Shebuela, Jerimoth, ananiah, Hanani, Eliatha, Kidalti, Romamti Eza, Joshabekasha, Malothi, Hothira, hawi Mahaziohchi ne.

⁵ Samrang i amo Heman ai Tameuh ly mymy i adeu nai kamta, tahm pasang ai nai chapo leaung holai palyhrei hawi chaniu leaung thomrei pei pi bo.

⁶ Nichi bawibawi ly ampo i leu pei nai kamta, sa-ra hawi tarochi ai Achura yhm theung y chiu sa nai hawi amkawm iy beu u bo. Asap, Jeduthun hawi Hemanchi ly samrang i leu pei nai kamta sa naichi ne.

⁷ Hini khumi bawibawichi hawi nichi i amjo amnau Levi theaungchi ly amtiu yb nai katyn kapau beu nai keungchi ne i, kawp keh nai khumichi ne. Nichi bawibawi ly leaung 288 rei awm.

⁸ Nichi ly theang nai len nai, kawp nai kawp y nai khawi takhra y naimy, sa ai nai kalopchi ai tambe va iy sa u bo.

^9-31 Hini khumi leaung 288 reichi ai, kamkawm harei y leaung holai nyhrei abawi nai kamkawm apom phai palyhrei phy pi bo. Kamkawm hareira y lu leaungrei awm. Hinichi ly kalop sa naira y kamkawm luchi ne. 1. Asap i yhm dengtheung Josepha 2. Kedalia 3. Zakura 4. Zeri 5. Nethaniah 6. Bukia 7. Asharela 7. Jeshaia 9. Mattaniah 10. Shimei 11. Uziela 12. Hashabiah 13. Shebuela 14. Matithia 15. Jerimoth 16. Ananiah 17. Joshabekasha 18. Hanani 19. Malothi 20. Eliatha 21. Hothira 22. Kidalti 23. Mahazioth 24. Romamti Ezachi ne.