1 NENG SATANG 23 - Khumi Common Language Bible

¹ Davida ly khri pa-rei miteaung cheang nai khala y, chapo Solomon ai Israelachi i samrang y palyn nai ne.

Levi theaungchi i kalop

² Samrang Davida ly Israela cheng miteaung keh ngiereichi, pathyp pi nai keungchi hawi Levi theaung bawibawichi ai angym hai bo.

³ Saneng phairei hawi leng Levi theaung khumichi i amyn vuikanai la i, bawibawi leaung 38,000 rei awm.

⁴ Samrang ly hunichi theung i khumi leaung 24,000 reichi ai, Achura yhm theung y chiu sa naira y kalop pei. Khumi leaung 6,000 reichi ai ly recordchi kry hai iy, tara chih nai kalop sa hai bo.

⁵ Khumi leaung 4,000 reichi ai ly katheu pa-kho typ nai kalop pei iy, takhra leaung 4,000 reichi ai ly samrang my pei nai katyn kapauchi hawi Areng ai palo ai nai kalop pei nai ne.

⁶ Davida ly Levi theaungchi ai mymychi nupaichi theung y Kerashon, Kohath hawi Merari, nanai phy thomrei sa pi bo.

⁷ Kerashon ly Ladan hawi Shimei napi nai chapo leaung nyhrei awm.

⁸ Ladan ly Jehiela, Zetham hawi Joela napi nai chapo leaung thomrei awm.

⁹ Nichi ly Ladan i kangpreang cheng theaungchi ai lu sa naichi ne. (Shemei ly Shelomoth, Haziela hawi Haran napi nai chapo leaung thomrei awm.)

^10-11 Shemei ly Jahath, Zin, Jeusha hawi Beria napi nai chapo leaung palyhrei awm. Jeusha hawi Beria nini ly kangpreang nawi y. Nini ai ly theaung harei palawn iy tabimei nai ne.

¹² Kohath ly Amaram, Izaha, Hebron hawi Uziela napi nai chapo leaung palyhrei awm.

¹³ Ni i chapo chalu Amaram ly Aron hawi Mosi nini i ampo ne. (Aron hawi ni i kangpreangchi ly tahm pateng nai vawnsai ateaung alangchi kry ai nai, Areng ai chiu naira y mui katuichi leng patlum ai nai, mymy i kalop sa pi ai nai hawi mymy i amyn y khumichi ai amtheaung naira pei ai nai kalop pei takhra nai keungchi ne.

¹⁴ Na i py Tameuh i khumi Mosi i chapochi ly Levi theaung amyn vuikanai theung y abawi nai ne.)

¹⁵ Mosi ly Kerashon hawi Eliaza napi nai chapo leaung nyhrei awm.

¹⁶ Kerashon i chapochi theung y Shebuela ly lu sa nai ne.

¹⁷ Eliaza ly Rehabia napi nai chapo leaungrei awm khyh. Na i py Rehabia ly katu chanau neangneang awm.

¹⁸ Kohath i pa-nyh chapo Izaha ly Shelomith napi nai chapo leaungrei awm. Ni ly cheng theaungchi ai lu sa nai ne.

¹⁹ Kohath i pa-thom chapo Hebron ly Jeria, Amariah, Jahaziela hawi Jekamem napi nai chapo leaung palyhrei awm.

²⁰ Kohath i palyh chapo Uziela ly Mikha hawi Ishia napi nai chapo leaung nyhrei awm.

²¹ Merari ly Mahli hawi Mushi napi nai chapo leaung nyhrei awm. Mahli ly Eleaza hawi Kisha napi nai chapo leaung nyhrei awm.

²² Na i py Eleaza ly chapo ngo y, chaniuchi naini nga khyh. Ni i chaniuchi ly mymychi amprochi hawi yhmtheaung sa u. Hunichi ly Kisha i chapochi ne.

²³ Merari i pa-nyh chapo Mushi ly Mahli, Eda hawi Jerimoth napi nai chapo leaung thomrei awm.

²⁴ Hini khumichi ly cheng theaung hawi yhm dengtheung kangpreang Levi theaungchi ne. Huni khumi bawibawichi ai leaung leaungrei amyn vuikanai khai typ nai ne. Saneng apomrei hawi leng awm nai Levi i kangpreang bawibawichi ly Areng i Achura yhm y kalop sa u nai ne.

²⁵ Davida my, “Israela chengchi i Areng Tameuh ly mymy i khumichi ai tlamsa naira pei iy, mymy py Jerusalem mary y awm pi jojo ai.

²⁶ Naibaly Levi theaungchi ly Areng i awmra Taichy ai py, chiu sa naira y teaung nai vawnsai ateaung alangchi ai py, angjeaung bi ai nai aly ngai y leang bo,” napi.

²⁷ Davida i kangkhym leu pei nai kamta, saneng apomrei awm nai Levi theaung bawibawichi ly kalop sa ai nai amyn pei u bo.

²⁸ Nichi sa ai nai kalopchi ly Achura yhm theung y chiu sa nai khala, Aron i kangpreang pathyp pi nai keungchi ai sabawm ai nai, Achura yhm apai theung y hawi takunchi kry ai nai, tahm pateng nai atitichi ai kachai khai ai nai kalopchi ne.

²⁹ Nichi ly Tameuh teng y talam nai tako, katalamra tako dei, angbo abawi y nai tako phichi, mai hawi paawp nai katalamrachi, asitui hawi katlen nai takodeichi sa naira y lu sa nai ne. Nichi ly Achura yhm theung y katalamrachi neh naira py abawi ai tla.

³⁰ Nichi ly dym tlei, khawn tleirei Anawn kani, lo si pawi kanichira y kapathyprachi talam nai neng tleirei, Areng i nang parai nai ai palo ai tla nai ne.

³¹ Hini kalop tlenreira y Levi theaung leaung majirei sa ai nai tla mo, nanai pasym yb nai reita awm. Levi theaungchi sa jojo ai nai kalopchi ly Areng ai chiu ai nai ne.

³² Nichi ly Areng i awm naira Taichy hawi Achura yhm kry ai nai py, mymychi i amjo amnau Aron i kangpreang pathyp pi nai keungchi ai, Achura yhm theung y chiu sa naira y sabawm ai nai py sa ai tla nai ne.