1 NENG SATANG 18 - Khumi Common Language Bible

Davida i tavai eaung naichi

¹ Naibaly neng kra kyh nai bo y samrang Davida ly Philistia chengchi hawi atiu i eaung bo. Ni ly kath mary tengpang i avangchi py peang nai ne.

² Moba chengchi ai py tiu i, eaung nai deaungkho y nichi ly ni i peang nai anui y awm u iy, kahmchi pei u bo.

³ Hunaibaly samrang Davida ly Hamath mary sahawi y Zobah samrang Hadadeza ai tiu. Ati mana nai mo na baly Hadadeza ly Euphrat tavo tleaung mang i khu peang vui ai nai atho sa nai deaungkho y ne.

⁴ Davida ly huni samrang i tavai ka-ri sangrei, keaungngo atang nai risa leaung 7,000 rei hawi tavaimi risa leaung 20,000 reichi ai patiu nai ne. Ni ly tavai ka-ri chungvairei i vui aly ngai nai keaungngochi la vui chum baly, takhra keaungngochi ai ly kheu pakhaupe vui iy, kheu tabai hai vui bo.

⁵ Damaska mary i Suria chengchi ly samrang Hadadeza ai sabawm ai nai tavaimi kamkawm harei pato u. Samrang Davida ly nichi ai tiu iy, khumi leaung 22,000 reichi ai padei nai ne.

⁶ Hunaibaly huni khumichi i khu theung y tavai tairachi sa. Nichi py samrang Davida i anui y awm u i, kahm pei u ai tla. Areng ly samrang Davida ai meingtym tleirei y eaung hai bo.

⁷ Davida ly Hadadeza i miteaung kehchi syn nai khopuichi la pi vui iy, Jerusalem mary y syn vui nai ne.

⁸ Ni ly Hadadeza i peang nai Tibahath mary hawi Kun marychira i, kheupaja neangneangchi py la pi pawn. (Kangkhym i neng y huni kheupajachi ai samrang Solomon my tuikan yhmmawm puichi, Achura yhm i vui khauchi sa nai ne.)

⁹ Samrang Davida ly samrang Hadadeza i tavaimi kamkawm vereichi ai pajau vui bo, nanai Hamath samrang Toi thai nai khala,

¹⁰ samrang Davida teng kawn nai leu thui ai nai hawi tavai eaung nai molam y amo theu nai sai pany hai ai nai chapo Joram ai pato. Joram ly samrang Davida i vui muku, tangka, kheupajachi hawi sa nai langseaungchi syn.

¹¹ Samrang Davida ly huni vawnsaichi ai mymy i tavai eaung nai Edom pri, Moba pri, Ammon pri, Philistia pri hawi Amalek pri y awm nai khumi cheng cheaungkhangchi teng i nga nai muku, tangka hawi vanrei, chiu sa naira y teaung ai nai talam bo.

¹² Zeruiah i chapo Abisai ly palawi leaunghawi ra y Edom khumi leaung 18,000 reichi ai padei bo.

¹³ Ni ly Edom pri verei y tavai tairachi sa iy khai nai deaungkho y, huni meingtym y awm nai khumichi ly Davida anui i khumichi lawm u bo. Areng ly Davida ai meingtym tleirei y eaung naira pei nai ne.

¹⁴ Davida ly Israela pri verei y peang iy, mymy i khumi bawibawichi tlang tleaung y leu meitang adyh adawi naimy peang jojo bo.

¹⁵ Abisai i amnau Juaba ly tavailu areng keh ne iy, Ahilud i chapo Jehoshapha ly recordchi kry nai keung ne.

¹⁶ Ahitub i chapo Zadok hawi Abiatha i chapo Ahimelek ly pathyp pi nai keungchi ne. Seraiah ly samrang yhm secretary ne.

¹⁷ Jehoiada i chapo Benaia ly Davida i tamcheaung risa, samrang Davida i chapochi ly tahm asang nai meingtymchira y samrang i kalopchi sa u nai ne.