1 NENG SATANG 16 - Khumi Common Language Bible

¹ Nichi ly Leu Maikawm Pawm ai samrang Davida my sa rym nai tai mang y angjeaung iy, huni tai theung y khai u bo. Naibaly leng patlum nai katalamra hawi amkawm nai katalamrachi Tameuh teng y talam u.

² Samrang Davida ly hina nai katalamrachi talam chum khala, Areng i amyn y khumichi ai amtheaung hai i,

³ teicha teineichi pei pi. Samrang ly Israela pri y awm nai neampacho, neampachy bawibawichi ai tako phirei, mawi akawirei hawi kreip athai kajei maidenreichy paji sei bo.

⁴ Israela chengchi i Areng Tameuh i Leu Maikawm Pawm mo y chiu sa nai khala, khulym thui nai, palo naira y lu sa ai nai, Davida ly Levi theaung phyreichi ai khai takhra bo.

⁵ Nichi i luchi ly Asap ne iy ni i bangtang ly Zekhariah ne. Naibaly Jeiela, Shemiramot, Jehiela, Matithia, Eliaba, Benaia, Obed Edom hawi Jeielachi ly tarochi beu u. Asap ly sa-ra thip iy,

⁶ pathyp pi nai keung Benaia hawi Jahaziela nini my bawchi ai, Leu Maikawm Pawm mo y eng hawi nai ne.

⁷ Hini ly Areng ai palo iy khulym thui ai nai Asap hawi mymy i ahawi Levi theaungchi ai, samrang Davida my kalop pei angchei nai ne.

Palo nai khulym

⁸ Areng ai ly kawn naimy palo u; mymy i nang parai nai sai ly amthang hai u.

⁹ Areng ai ly khulym thui iy palo u. Mymy i sa nai lyh ai nairachi amti pi u.

¹⁰ Achi ly mymy i khumichi ne i, amo theu u; mymy ai chiu nai khumi bawibawichi ly amo theu u sy!

¹¹ Sabawm naira nga ai nai Areng teng y chei u; mymy ai ly chiu u jojo.

^12-13 Tameuh i miseaung Jakob i kangpreangchi awi, Tameuh my vawi takhra nai Israela kangpreangchi awi, mymy i sa nai lyh ai naira rengrang ka-ma-rachi ai py, mymy i khai pi nai tara chih nairachi ai py, pany u jo ba.

¹⁴ Areng ly achi i Tameuh ne; mymy i leu pei naichi ly khaileaung pri verei i vui ne.

¹⁵ Deungtasarei khaw hai ai nai mymy i Leu Maikawm napi nai

¹⁶ Abraham hawi asa nai Leu Maikawm ai py, Isaka teng y leu adeu nai ai, mana khala py tami u moh.

¹⁷ Areng ly Jakob hawi deungtasarei khaw ai nai Leu Maikawm asa bo.

¹⁸ Mymy ly “Kaimy kanan pri kang pei ai; nang ly huni pri amtym ai,” napi.

¹⁹ Tameuh i khumichi ly di parai iy, Kanan pri angvyn kamta awm u nai ne.

²⁰ Nichi ly pri harei dengdai pri harei mang y, cheng harei dengdai cheng harei mang y amki u bo.

²¹ Na i py Tameuh ly leaungrei ai py ana ai nai pei y; nichi ai kry ai nai samrangchi teng y leu pei bo.

²² Mymy ly “Kaimy vawi takhra nai miseaungchi ai ka-jeira tym hai moh; kai i amochi ai nam u moh,” napi.

²³ Khaileaung prichi awi, khulym thui iy Areng ai palo u! Mymy i achi ai atleu nai satang kahawi ly kani tleirei amthang hai u.

²⁴ Khumi cheng cheaungkhangchi teng y mymy i nang parai nai ai py, khumi bawibawichi teng y mymy i lyh ai nairachi py, amthang hai u.

²⁵ Areng ly nang parai nai ne i, achi ly mymy ai palo ai nai tla; achi ly mymy ai tameuh takhrachi tleaung y tahm khai ai nai tla.

²⁶ Khumi takhrachi i tameuhchi ly mynchi ne; na i py Areng ly kani khusang ai sa nai keung ne.

²⁷ Nang parai nai hawi sa thai naira ly mymy ai taki teungtareung naimy awm. Mymy i Achura yhm ly amo theu nai raawi kawi na bo.

²⁸ Khaileaung pri khumi bawibawichi awi, Areng ai palo u; mymy i nang parai nai hawi sa thai naira ai palo u.

²⁹ Nang parai nai keung Areng i amyn palo u. Katalamra syn naimy mymy i Achura yhm y kun u. Chai parai nai keung ang jeu nai khala lu meung u.

³⁰ Khaileaung pri khumi bawibawichi awi, mymy i mo y jei hyn u! Khaileaung pri ly asyh pajau y na pa-rei, my i meingtym y anui cheng bo.

³¹ Khaileaung hawi kani mang ichi awi, amo theu u! Areng ly samrang ne, nanai khumi cheaungkhangchi teng y thui pi u.

³² Pangli hawi pangli theung y awm nai tui theung i mawichi awi, katyn amsau u. Pangli hawi pangli salo y awm nai ngiereichi awi, amo theu u!

³³ Areng ly khaileaung pri y peang ai nai ang jeu nai khala, daichi theung y awm nai dengkeaungchi ly amo theu u ai.

³⁴ Areng ly hawi nai deaungkho y, kawn naimy palo u. Mymy i tamen nai ly deungtasarei ne.

³⁵ “Kaichi ly kawn naimy palo iy nang i amyn kachai palo ai nai kaichi i atleu keung Tameuh, kaichi ai atleu kyh ba. Kaichi ai pangym iy kaichi ai khumi cheaungkhangchi kiu i nai atleu kyh ba,” nanai mymy teng y takeng u.

³⁶ Israela chengchi i Areng Tameuh ai palo u! Mymy ai ly vai py, deungtasarei py palo u! Huna nai khala khumi bawibawichi ly “Amen,” nanai thui iy Areng ai palo u nai ne.

Jerusalem mary hawi Kibeon mary y chiu sa nai

³⁷ Samrang Davida ly Asap hawi my i ahawi Levi theaungchi ai Leu Maikawm Pawm awm nai meingtym ra y, chiu sa nai molam y kalop pei nai ne. Nichi ly kani tleirei mymychi i kalopchi sa u.

³⁸ Jeduthun i chapo Obed Edom hawi ni i nupaichi theung i khumi leaung 68 reichi ly Asap hawi Levi theaungchi ai sabawm hai bo. Hosah hawi Obed Edom nini ly katheu pa-kho tym naichi i lu ne.

³⁹ Pathyp pi nai keung Zadok hawi ni i ahawi pathyp pi nai keungchi ly Kibeon ra y Areng ai chiu nai meingtym ra y lu sa nai ne.

⁴⁰ Nichi ly Israela chengchi ai Areng my pei nai reita ra y tajiu nai kamta, kani tleirei khawn mang y tlenrei, dym mang y tlenrei, maicham salo y bom verei leng patlum u bo.

⁴¹ Areng i tamen nai ly deungtasarei ne nai deaungkho y, palo nai khulym hawi mymy ai palo ai nai vawi takhra nai khumi Heman, Jeduthun hawi takhra khumichi py, huni meingtym y pathyp pi nai keungchi hawi vanrei awm u bo.

⁴² Palo nai khulym thui nai thym khala, Heman hawi Jeduthun nini ly baw, sa-ra hawi takhra katyn kapauchi beu naira py lu sa. Jeduthun nupai theung i khumichi ly katheu pa-kho typ naichi ne.

⁴³ Naibaly khumi bawibawichi ly mymychi i yhm mang y vawi u bo. Samrang Davida py mymy i yhm dengtheungchi teng y vawi nai ne.