1 NENG SATANG 13 - Khumi Common Language Bible

Leu Maikawm Pawm ai Kiria Jarim mary i dengdairei tapyn nai

¹ Samrang Davida ly sangrei kamkawm, chungvairei kamkawmchi i tavailu areng bawibawichi hawi arum bo.

² Naibaly Israela mipui bawibawichi teng y thai hai nai ly “Nangchi my ngai u iy kai ai Areng Tameuh my py aly nga ai na baly, awm rai nai takhra achi i cheng bawibawichi hawi, marychira y awm nai pathyp pi nai keungchi, Levi theaungchi teng y, hini meingtym y jeu u ai nai savaichi pato iy palau u.

³ Naibaly samrang Sawla my peang nai thym khala, nawisu nai Tameuh i Leu Maikawm Pawm ai achi my lo u sina,” napi.

⁴ Khumichi ly huni leu ai ngai u bawibawi bo.

⁵ Hunai deaungkho y Davida ly tokalawi mang Aikupta khujyh dengdairei, tosyh mang Hamath mawi aleaung lam tym pa-rei, pri verei y awm nai Israela mipui bawibawichi jeu u ai nai palau bo. Nichi ly Kiria Jarim mary i dengdairei Jerusalem mary mang y Leu Maikawm Pawm tapyn ai nai ne.

⁶ Davida hawi Israela mipuichi ly kherubenchi salo y awm nai, Areng i amyn y Tameuh i Leu Maikawm Pawm la ai nai Juda pri i Bala mary napi nai Kiria Jarim mary y chei u bo.

⁷ Nichi ly Abinada yhm i dengdairei Leu Maikawm Pawm la u iy, ka-ri kangtha salo y tang u. Uz hawi Ahio nini my, huni ka-ri ryh hawi i,

⁸ Davida hawi Israela mipuichi ly khri pa-rei lam u iy, Tameuh ai tahm pasang naimy tako u bo. Nichi ly khulym thui iy taro, atym, sa-rachi beu i bawchi eng u.

⁹ Nichi ly Khidon choh ati nai talang prangra tym u nai khala, si kataichi athei nai deaungkho y, Uz ly kiu hawi Leu Maikawm Pawm ai dawmkhawn bo.

¹⁰ Areng ly vaimy kado theu i, Leu Maikawm Pawm y teaung lawh nai y, Uz ai padei bo. Uz ly huni meingtym y my, Tameuh i mo y dei bo.

¹¹ Hunaibaly huni meingtym ai Perez Uz,nanai vaini khrairei amyn pathi bo. Hunai kamta Areng ly Uz ai kado theu i, pajeng nai molam y Davida ly athengra na bo.

¹² Naibaly Davida ly Tameuh ai jei nai deaungkho y, “Vai kai ly Leu Maikawm Pawm ai ati mana syn ai mo?,” nanai thui.

¹³ Hunai deaungkho y Leu Maikawm Pawm ai ly mymy hawi vanrei Jerusalem mary y syn y leang bo. Syn ai nai tleaung y ly huni Leu Maikawm Pawm ai Kath mary i khumi Obed Edom napi nai i yhm y daw su bo.

¹⁴ Leu Maikawm Pawm ly huni yhm y lo thomrei awm iy, Areng ly Obed Edom i yhm dengtheung hawi ni i amtawn nai ngiereichi ai py amtheaung hai nai ne.