1 ARENG KEH 3 - Khumi Common Language Bible

Cheng naira nga ai nai samrang Solomon i chiu sa nai

¹ Samrang Solomon ly Aikupta samrang i chaniu ai pom nai deaungkho y, huni samrang hawi vuinai asa bo. Naibaly my i sa nai samrang yhm, Achura yhm hawi mary apai cheang y ryrei ly Davida mary y awm ai nai aju ai hawi bo.

² Areng i vui Achura yhm so y rai nai deaungkho y, khumichi ly maicham tlei tleirei y apathyp u.

³ Samrang Solomon ly Areng ai tamen iy, ampo Davida i taviu nai kamta sa nai ne. Na i py tawnbawichi tleh iy maicham takhra neangneangchi ra y apathyp bo.

⁴ Kibeon mary y khri pa-rei amyn amthang nai maicham awm i, kanirei nai khala ly apathyp ai nai huni meingtym y chei bo. Ni ly vaichi khala y py leng patlum nai kapathypra sang neangneangchi, huni maichamra y talam reng nai ne.

⁵ Huni vum y Areng ly amang mang y amteng i, “Nang ly ati ngai mo? kang pei ai,” napi.

⁶ Solomon my, “Nang ly nangmy i miseaung, kai i ampo Davida teng y khri pa-rei tamen naira ly avawrei amteng hai bo. Ni ly nang i mo y hawi naira hawi ka-ym awm naira hawimy atyp iy awm nai ne. Naibaly nang ly ni teng y chapo leaungrei pei iy, tamen naira ly amtawn hai jo bo. Vaini, huni chapo ly ampo i atehra tleaung y ateh naimy awm.

⁷ Aw Areng Tameuh, kai ly deaungdi ne i, pri peang ai nai kawp y teu i py, nang ly kai ai ngaai i meingtym y amtym hai iy, samrang palyn bo.

⁸ Vai kai ly nangmy vawi takhra nai khumichi theung y kaawm bo. Nichi ly kati pajau y na pa-rei nawi nai ne.

⁹ Hunai deaungkho y nang i khumichi ai leu meitang adyh adawi naimy peang kawp ai nai hawi, hawi nai hawi y nai khawilang thai nai cheng naira pei kyh ba. Huna nai pei y ai nabaly, kai ly huna tanrei nawi nai nang i khumichi ai mana peang pajau ai mo?” nanai hnei takeng bo.

¹⁰ Areng ly Solomon i hina nai hnei takeng nai ai kawn pi nai deaungkho y,

¹¹ mymy ly ni teng y, “Nang ly nangmy heng sau ai nai hawi nang chawn ai nai, ti y baly paleung ka-echi dei ai nai py hnei y naimy, leu meitang adyh adawi pa-rei peang thai ai nai cheng naira hnei bo;

¹² nang i hnei nai kamta kang sa pi ai. Nang ny y rai khala i ami py ngo vai y nai, nang i bo y py nga ai ny y nai cheng naira hawi pany thai naira ly nang ai kaimy kang pei ai.

¹³ Nang hnei y nai amtheaungra py kang pei ai; nang ly nangmy deungrei takhra mani samrang hawi py atawm y na pa-rei, nang chawn nai hawi tahm asang naira kang pei ai.

¹⁴ Nang ly nangmy i ampo Davida kamta, kai i reitachi hawi leu pei naichi tangai baly, kai ly nang ai heng sau ai nai py kang pei ai,” napi.

¹⁵ Solomon ly i anglaw i, amang mang y Tameuh my ni teng y thui pi nai ne, nanai pany bo. Naibaly ni ly Jerusalem mary y chei iy, Areng i Leu Maikawm Pawm mo y angdo i, leng patlum naichi hawi amkawm nai kapathyprachi talam nai ne. Huni bo y mymy i bangtangchi i vui cha nei pawi sa pi bo.

Solomon my rai nai leaungsai harei ai tara chih pi nai

¹⁶ Kanirei nai khala y bima leaung nyhrei ly samrang Solomon i mo y tym hawi bo.

¹⁷ Leaungrei my, “Samrang awi, kai ly hini neampachy hawi yhm vanrei awm nai ne. Huna nai awm nai thym khala y kai ly deaungdi neampacho leaungrei katapen bo.

¹⁸ Kai deaungdi tapen chum nai pa-nyh kani y, hini neampachy py chapo leaungrei tapen teang. Huni yhm y kaini leaung nyhrei awm khyh; takhra ami py by y.

¹⁹ Naibaly vumrei nai khala y hini neampachy ly athang khai y naimy, mymy i deaungdi ai aseaung hai cheng i, deaungdi ly dei vui bo.

²⁰ Ni ly vum y ang thau iy kai, i nai thym khala kaimy sahawi i deaungdi ai ly my i ira mang y tawn vui; naibaly dei nai deaungdi ai ly kai i ira y paseaung pi su bo.

²¹ Khawn khutawi kai ly i anglaw nai khala y, kaimy i deaungdi ai kanu panei ai nai sa baly, deaungdi ly dei su nai niu lawh; deaungdi ai khen hawihai i, huni deaungdi ly kai i deaungdi ny y, nanai kapany bo,” napi.

²² Na i py neampachy takhra my, “Nang i leu ly teng y leang! heng nai deaungdi ly kai i deaungdi ne iy, dei nai deaungdi ly nang i deaungdi ne!,” napi. Angchei i neampachy my ly “Nang i leu teng y leang! dei nai deaungdi ly nang i deaungdi ne iy, heng nai deaungdi ly kai i deaungdi teu!” nanai thui. Nini ly hina nai samrang i mo y a-ei hawi nai ne.

²³ Huna nai khala samrang ly. “Nangni leaung nyhrei my heng nai deaungdi ly kai i, dei nai deaungdi ly nang i, nanai thui hawi bo,” napi chum baly

²⁴ haisau la hai i tym hai nai khala,

²⁵ “Heng nai deaungdi ai umtang y bau thla ly leaungrei ai ka-hyh ka-hyhrei phy pi,” napi.

²⁶ Amhm kypkyp ly deaungdi ai khri pa-rei tamen nai deaungkho y, samrang teng y, “Samrang awi, deaungdi ai ly padei moh! huni neampachy teng y phai pei pi teu ba!,” nanai takeng. Na i py takhra neampachy my ly “Deaungdi ai ami py lo mo sy, ka-hyhrei phai bau thla ba,” napi.

²⁷ Naibaly Solomon my, “Deaungdi ai padei mo jau! angchei i neampachy teng y phai pei pi; huni neampachy ly deaungdi i amhm kypkyp ne,” napi.

²⁸ Solomon i tara chih nai sai ai Israela pri khumi mipuichi my thai nai khala, ni ai khri pa-rei tahm khai u bo. Ati mana nai mo nabaly leu meitang ka-dyh ka-dawi tara chih kawp ai nai, Tameuh my samrang ai pei pi bo, nanai nichi pany u nai deaungkho y ne.