Filimon 1 - Linjila

Lewa

¹ Wuma Bulus Isa Almasiwu nangaro kosoma-a Timoti kǝraminde-adǝ Filimon sawande kidaye rayiyenadǝ ye,

² Ya Afiya kǝraminde ye, Akifus sawande mǝlduye ye, koro jama Isaa gawu curo fannǝmben captaisodǝro:

³ Ala Bawande-a Kǝma Isa Almasiwu-adǝ nayiro ser-a nanlewa-a njado!

Filimonne kambǝrsenju-a kǝrawonju-a

⁴ Curo moduwaniyen nia tannjǝkkiya, sawi yaye Alania wusenǝkki,

⁵ dalilnjudǝ Kǝma Isa yea mǝrsanǝmma, muminna yea raamma fakkǝna nangaro.

⁶ Koro andi-a rokko mukkonǝm njakko curo kambǝrsedǝyen faidaaro waljo, ngainin awo ngǝla fi yaye Almasiwulan taiyenadǝa asunero Alaa korǝkki.

⁷ Kǝramini, kǝrawonǝm cakke karwuni ye jauro kǝjijǝna, roni ye duno cuwandǝna, niyen karwu muminnaye bojǝna nangaro.

Lowo Bulusse Onesim nangaro

⁸ Adǝma nangaro, Almasiwulan niro wada awo jussǝna dioye njoro rikkǝni yaye,

⁹ kǝla kǝrawoyen nia lowonjǝkki. Wu Bulus kiari ye, kǝrma Isa Almasiwu nangaro kosoma yedǝ,

¹⁰ tadani Onesim nangaro nia lowonjǝkki, ti duwon saɍgan tikkerǝkkǝnalan bawanjuro wallǝkkǝnadǝ.

¹¹ Calan niro faidanjǝgǝnni, amma kǝrma wu-a ni-a sammaro faidaa.

¹² Tia niro kalannjǝgǝkki, ti duwon karwuni tia ngojǝnadǝ.

¹³ Tia nanin rodu raakkǝna, wu kawuɍi kǝji nangaro kosolan duwon, cujunǝmbo wuro faidasuworo.

¹⁴ Adǝ yaye rawonǝm bawoalan awima dio raakkǝni, nanngǝlanǝmdǝ dolero gǝni, rawonǝmbero waljo.

¹⁵ Waneye dalil ni-a ti-a kawu ganaro faiduwwadǝ, kǝrma tia sawisoro fandero,

¹⁶ gadero kaɍea gai gǝni, kaɍeamaa kojǝnaro kǝrami tǝraana gai, masammanno nanin, ballema nanǝmlan, naptunju adamgǝnaye yen kal, naptunju Kǝmaa mǝrsadumaye yen kal.

¹⁷ Wua sawanǝm kidayero ngosǝmmaa, ti yea wu gairo mukko yindin moye!

¹⁸ Koro niro awo laa kuttu ngiddoa, bi awo laaro tia gamia, kǝlaniro gǝnagǝne!

¹⁹ Wuma Bulus, mukkonin adǝa ruwunǝkki, rǝmbǝkki yekko! Kǝla jiɍi ni kǝlanǝm ro sawisoye wuyen fandǝmmadǝyen awima wulnjǝgǝkkiwawo.

²⁰ Aaa, kǝramini, niyen Kǝma nangaro ser adǝa fandǝkko, Almasiwulan karwuni isabogǝne!

²¹ Manani gamiro mǝrsanǝkkǝna nangaro niro ruwunjǝgǝkki, koro awo wulnjǝgǝkkǝnadǝmaa kojǝnaa dimiro nokkǝna.

²² Koro jǝpturam wuro dabbarsǝgǝne, moduwandoyen wua mukkondoro sasakkiro tǝmani mbeji.

Lewa daryeye

²³ Abafaras sawani kosoye Isa Almasiwu nangaro nia lewanji,

²⁴ koro Markus-a Aristarkus-a Dimas-a Luka-a sawawani kidaye ye lewanjai.

²⁵ Ser Kǝma Isa Almasiwuye nayilan dǝga!