Zẹkaraya 9 - FỊAFỊA BAỊBỤLỤ

Sime ini na Kpeki Asịẹ ma Ḅẹrẹ-pẹlẹ-ḅịḅị

¹ Mie KỊNỊNYANAḄỌ ḅe oku: Ọ̀ tọn-pẹlẹ tẹ ò fomu-ḅara kẹ Hadịrakị amakiri mẹ na Damasịkọsị opu ama mẹ pịrị. Izirẹlị furo-ḅẹ-apụ ma kịngẹ-a, kụma Siriya ḅẹ Sịḅịda ama mẹ sọ sime KỊNỊNYANAḄỌ ḅe pịrịm.

² Hamatị tẹ Hadịrakị palị wararị ye mẹ sọ sime ọ̀ pịrịm, anie pịkị Taya na Sayịdọnị na opu ama ma sọ sime gbọrụ ḅara mẹ, ịna opu ḅara-ḍịn mamgba ḅụ.

³ Taya ama-ḍụayọ nama á ḅụụ pịrịtẹ, pịkị opuma seleḅa na golu na tan kpolimatẹ arị sara jua ḅara jua wararị!

⁴ Kụma KỊNỊNYANAḄỌ ḅe á nyana ye goyegoye ọkị so ḅa. Ori árị ngọ mamgba kẹ tọrụ-minji gbin ḅa, tẹ opu ama mẹ dọkịma ḅo kiri lama ḅa.

⁵ Asịkẹlọnị opu ama mẹ miemẹ ẹrị tẹ ḅalafaa ḅa. Gaza opu ama mẹ anị ẹrị tẹ opuma oju fụka ḅa. Anie anị pịkị sime Ẹkịrọnị pịrị ḅarị ḅara, tẹ arị aị mamgba kọsị faa ḅa. Gaza ḅarị amadaḅọ nyana ḅịa, tẹ kịnị mamgba Asẹkẹlọnị koroma mangị-so ḅa.

⁶ Gwamatẹ furo-ḅẹ-apụ Asịdọdị ḅio anga ḅa. KỊNỊNYANAḄỌ ḅe ḅẹẹarị, “Mịna ḅụụ-gelemarị Filisiteni apụ ma àrị ini iderima ḅa.

⁷ Ịn ḅarị jen kẹ ọmbie ḅụụ ḅio simearị nama pẹị ḅịa, anịanịa jen fị ma nwẹn ḅẹẹ fịye fị. Ịna ḅụ fịịa-so apụ mamgba ị̀ atomi ḅẹ pakịrị sọ ḅa tẹ Juda ḅẹ gbọrụ furo pembe ḅara sime ḅa. Ẹkịrọnị ị̀ atomi ḅẹ gbọrụ pakịrị sọ ḅa, Jebusayịtị apụ ma mịẹ ḅara.

⁸ Àrị ị̀ amakiri mẹ ḍikiḍiki ḅa tẹ ḅarị ḍụkụ tẹ ọmụ-ogbo-ogbo anị ḅio mẹnjị tolu-ḅọrọ ḅịa. À ḅarị ḍụkụ tẹ guda-guda atomi ḅarị jen kẹ ị̀ atomi ponoma ḅịa. Ị̀ atomi tọrụsiẹrị tẹ ḅara àrị ẹrị tẹẹ.”

Tọrọkọ-jụ Ḅo Ḅẹ Amadaḅọ Ḅe

⁹ Zayọnị ḅẹ apụ, ó ḍerekuu, ó ḍerekuu! Ọmịnị Jeruselemu ḅẹ apụ, ó ḍereku ḅụ olokuu! Ḍiki, ọmịna amadaḅọ ọ́ ḍọkụma-ḅoarị! Ò karakaraye mịẹ ḅọ pịkị owu-ḅara-iḅiḅọ ḅara kẹ ḅoarị, kụma ḅụụ-lẹgịma tẹ kala asụ kẹ mẹnjịarị asambịrịma ye ọgọnọ, ịwọ asụ.

¹⁰ KỊNỊNYANAḄỌ ḅe ḅẹẹarị, “Izirẹlị ḅụ à kirimẹnjị-ọmụarụ ma sakị-siin ḅa tẹ ọmụgbin asụ ma ọkị so ḅa Jeruselemu ḅụ; àrị ọmụgbin iboli ma guluguluma ḅa; Ị́ amadaḅọ ḅe dein mịẹ ḅa sịẹ-sịẹ ma ogboku; gbọrụ abajị ḅụ ọkị mu osi abajị la ḅụ ịkọlị ma la ḅụ.”

Siin Tamụnọ Atomi ma Kobiri Mẹ

¹¹ KỊNỊNYANAḄỌ ḅe ḅẹẹarị, “Ị̀ ọḅọkụ tẹ àrị ị́nịna na fị tẹ agba ọmbie kẹ mịẹ kụrọma ye mẹ ẹrẹsị, àrị omoni ḅara-ḅio ị́ atomi pakama-ḅo ḅa — jen sịẹ ḅụ anga kpakịkịtẹ olulu mẹ ḅio.

¹² Jen sịẹ ḅụ angarị tẹ mịọkụ ḅiokpọmaye nyanatẹ apụ, ọ́ pịkịma ḅoo, ọ́ pịkịma ọ́ kpaịn-sime ḅarị anga ḅoo, Mịọkụ à ḍuko ọ́ pịrịarị, à maa kiri kẹ ọ́ gbẹẹ wama ḅa ọmịnị ẹrị tẹ tọrụsiẹrị mamgba ḅụ ó boma ḅụ.

¹³ À Juda kẹ ọmụḅọ iboli kịkama tẹ ye mịẹ ḅa tẹ Izirẹlị kẹ ḍiein amẹẹ kịkama ḅa. À Zayọnị ḅẹ owiapụ ma kẹ okologie kịkama ḅa, kẹ Girisi ḅẹ owiapụ na owu-sọ.”

¹⁴ KỊNỊNYANAḄỌ ḅe ori atomi ọgọnọ-jụ ḅụ ḅụụ-pakama ḅa; ò so-ḅalapụ ḅara kẹ ori aḍịẹịn tẹịn ḅa. Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọdụ mẹ fiema ḅa; Abajị suku erise ma ḅio mie ọ̀ mẹnjị iwo ḅarịye.

¹⁵ Kụrọmamgba nyana KỊNỊNYANAḄỌ ḅe ori atomi gbaịn ḅọrọma ḅa, tẹ ini si kẹ ịn tọn apụ ma ḅaa guluguluma ḅa. Owu-kiri ḅụ ini iru-tọrụ-ḅaatẹ owiapụ kịka tẹ oloku ḅa tẹ si kẹ ịn tọn apụ ma ọmbie ọsụma ḅa; anị agba ọmbie tẹ kẹ bọlị ḅio sụa tẹ kẹ agbamịẹ-anga mẹ ḅụ sara tẹ ọsụma paka-ḅoarị ye kịka ḅa.

¹⁶ Anị ene mẹ ḅụ, KỊNỊNYANAḄỌ ḅe ori atomi ḅọrọma ḅa, anana-ḍikiḍikiḅọ ori anana-ogbo ḅọrọmarị ye ọkụ, ịn ḅaa ḅẹ ye ḅụ. Ori amakiri mẹ ḅio, ịn ḅịya paka ḅarị ḅara anie kịranị ḅirima ịkụta gẹnịma-gẹnịma ḅara.

¹⁷ Amakiri mẹ tọ-ḅara kẹ iḅi tẹ tọrụ-gbẹ ḅẹ! Asambịrịma apụ ma ḍụḅa paka-ḅo tẹ kụrọ ḅa anị ḅẹ mbịaka na iru na ḅụ.