Zẹkaraya 8 - FỊAFỊA BAỊBỤLỤ

KỊNỊNYANAḄỌ ḅe Mininiarị Ò siin Jeruselemu pakama ḅa

¹ Kụrọmamgba nyana KỊNỊNYANAḄỌ ḅe mị oku mẹ kẹ Zẹkaraya pịrịm:

² “À ḅii lama tẹ ḅarasụa Jeruselemu pịrị, à nyana árị atomi pịrị pokolotẹ ḅẹlẹma mẹ ẹrẹsị, mịẹ tẹ àrị ịganị nyana si kẹ á tọn apụ ma pịrịtẹ ḅẹlẹma mẹ.

³ À pịkịma-so Jeruselemu mu ḅa, ị̀ fịafịa opu ama mẹ, tẹ anị anga ḅa. Kịnị kẹ anị nimi ḅarị ẹrẹ, ‘Ḅioḅẹngbọ-Kẹ-Sịrẹrẹ-Niḅi Ama’, tẹ ịn nwẹnị Kụrọmamgba nyana KỊNỊNYANAḄỌ ḅe tụndụ mẹ sịn ḅa, ‘Tọn-tọn Ḅara Sime Tụndụ’.

⁴ Anị pịkị sin jen gbọrụ sakị kẹ paka ḅa, Omongitẹ owiapụ na ereme na, omongi ḅụra tẹ sịn kẹ ḅụụ dasịẹma tẹ mẹnjịarị apụ, opu ama mẹ ḅẹ tii anụngọ ma ḅụ lẹgị-sime ḅa.

⁵ Tẹ tii-arị owiapụ-awọmẹ na eremịna-awọmẹ ma pịkị jen kẹ etela ma ḅụ ḅin ḅa.”

⁶ “Miemẹ mịọkụ kirikọn-apụ ma ḅụụ inetẹ mịẹ ḅịa ye kịka ḅa, kụma ị̀ ḅụụ anị inetẹ mịẹ ḅịa ye sọ-a.

⁷ Àrị ị̀ atomi pụkọ-pakamaḅo ḅa ini ịn kẹ mu amakiri ma ḅụ,

⁸ tẹ àrị ịn kẹ pịkịma-ḅo ḅa ịrụa-saakịarị-anga mẹ ḅụ na anị tuuideriarị pakịrị mẹ ḅụ na tẹ in Jeruselemu ḅụ anga ḅa. Ini ị̀ atomi sọ ḅa, yẹrị ịna Tamụnọ sọ ḅa, nwẹnị ḅioḅẹngbọ-kẹ-sịrẹrẹ-niḅi ḅara na inoma ofori ḅara na kẹ ḅẹrẹtọn ịn pịrị.”

⁹ “Ọ́ tẹmẹ kụrọmaa! Mịọkụ ọ́ naarị ẹkwẹn ma anie paa gbọrụ ẹkwẹn ma tẹ ini ị̀ Warị mẹ ḅẹ suku mẹ nama saakịarị sakị ịkịankoroapụ ma kọn ọ́ pịrị aị ma.

¹⁰ Tẹrẹmẹ ḅo anị sakị la gbọrụḅọ-sọ inetẹ owiapụ anịanịa nama amẹẹ ọkọ-a, tẹ gbọrụḅọ ḍumo sọ ye ḅụụ la ḅịa ḅara sime-a si kẹ mḅọ tọn apụ ḅụ. À tomi pịkị tẹ ịn jụmọ-jụmọ jinem.

¹¹ Kụma mịọkụ à kịrị ḅara kẹ mị sịẹ mẹ ḅụ ḅẹ fịịa-so apụ ma na mịẹarị.

¹² In dein ḅụ ịna ḍiḅi aị ḍiḅi ḅa. Ịna vaịnị asịn ma girepu mgbọlụ sụa ḅa, kiri mẹ ye pakama ḅa, tẹ eene opuma koro ḅa. À ma boma mamgba kẹ ị̀ sịẹ mẹ ḅẹ atomi ma ḅụ fịịa-so apụ ma pịrị ḅa.

¹³ Juda na Izirẹlị na ḅẹ atomi! Ḅọrọtẹ sakị ḅụ igoniapụ ye karị jụmọ-jụmọ pịrị tẹ ḅẹẹ-ḅẹẹm, ‘yee Juda na Izirẹlị na ọgọnọ sara gbọrụ opu ḅụụ-fụka ma ḅo ọmịna ọgọnọ sọ sara!’ Kụma àrị ọ́ ḅọrọma ḅa, anịtẹso arị ja asịẹ ma jụmọ-jụmọ ḅẹẹ ḅa, ‘yee ọmịnị sọ ḅo Juda na Izirẹlị na pịrị aboma ma nyana!’ Mie ḅụ ọ́ tẹmẹ-kpọma tẹ ḅalafa ma.”

¹⁴ Kụrọmamgba nyana KỊNỊNYANAḄỌ ḅe ḅẹẹarị, “Ọmịna elemu aḍapụ ma ị̀ ịganịma sakị, à tọn pẹlẹ tẹ opu ḅụụ-fụka kẹ ịn pịrịm tẹ àrị ì kuroma ḍima-a, kụma à tọn ḅara mie à mịẹ ḅara.

¹⁵ Kụma mịọkụ à tọn-arị à Jeruselemu na Juda na boma. Mie ḅụ ọ́ ḅalafa ma.

¹⁶ Mịna aị ma mie ọ́ mịẹ ḅẹ aị: Ọ́ karakara mẹ ḍuko jụmọ-jụmọ pịrịị. Kọtị ma ḅio ḅụ ọmịnị inoma ofori ḅẹrẹkọn kọọn — anie dein dogi-ḅoarị ye.

¹⁷ Ó ye kẹ jụmọ-jụmọ lama ḅẹ aḅọkọ ḅẹ ḅẹrẹ-ḅiya ma. Ó ye karị tẹrẹmẹ iruo witinẹsị sọ ma. Àrị iruoye ḍuko na, inoma na kụrọ-kụrọ mịẹ na ḍiki-ḅioḅuarị.”

¹⁸ Kụrọmamgba nyana KỊNỊNYANAḄỌ ḅe mị oku mẹ kẹ Zẹkaraya pịrịm:

¹⁹ “Ọmịnị ọlọarị aḅuru-ịmọ ma anie ini, sọnọ, sọnọma, na oyi na karama akalụ ma ḅụ ḅo ḍereku na ḅioḅẹlẹma alalị sọ Juda ḅẹ apụ ma pịrị ḅa. Mịẹ ḅara mịẹ ḅara ọ́ karakara na dein na ḅẹlẹma nyanam.”

²⁰ Kụrọmamgba nyana KỊNỊNYANAḄỌ ḅe ḅẹẹarị, “Sakị mẹ ḅoarị, anie tọnwa-apụ opu ama-ama ma ḅụ sime tẹ Jeruselemu ḅo ḅarị sakị mẹ.

²¹ Gbọrụ opu ama ḅụ ḅo apụ osi anga ḅo apụ ḅẹẹ ḅa, ‘Wa sunsin Kụrọmamgba nyana KỊNỊNYANAḄỌ ḅe pịrị ḅẹ muarị, tẹ ọ̀ tẹkẹ tẹ ò boma ḅii. Ḅo wa mu!’

²² Tọnwa atomi na opu kụrọ nyana asịẹ na Jeruselemu ḅo tẹ sunsin Kụrọmamgba nyana KỊNỊNYANAḄỌ ḅe pịrị tẹ ò boma ḅii ḅa.

²³ Arị eneḅaka ma ḅụ, ja asịẹ ḅẹ oyi apụ gbọrụ Juu-ḅẹ ḅọ dama-ḅo tẹ ḅẹẹ ḅa, ‘Wa ḅiiarị ọ́ la ye wa la, wa naa tẹ mịnẹ Tamụnọ ọmịnị na emi ẹrẹsị.’”