Zẹkaraya 7 - FỊAFỊA BAỊBỤLỤ

KỊNỊNYANAḄỌ ḅe Tẹmẹ la-a Ḅuru-ịmọ si ḅara ḍukoarị

¹ Darịyọsị tomikiri da tẹ ini karama kụra mẹ ḅụ eseni karama akalụ (Kisilevu akalụ) mẹ ḅẹ ini karama ene mẹ ḅụ, KỊNỊNYANAḄỌ ḅe oku kẹ ị̀ pịrịm.

² Bẹtẹlị ḅẹ apụ Sariza na Rẹgẹmẹlẹkị na ịna owiapụ na kẹ Kụrọmamgba nyana KỊNỊNYANAḄỌ Warị mẹ fịrịma KỊNỊNYANAḄỌ boma ḅii ḅẹ mum

³ tẹ pịkị miemẹ kẹ agbamịẹapụ ma na ịkịankoroapụ ma na gbela ḅẹẹm: “Wa paa kururu tọrọkọ-tọrọkọ mu ḅẹ ịn Tamụnọ-warị mẹ kan guluguluma ye mẹ gotẹ, sọnọ akụra gbọrụ sakị-sakị kẹ ḅuru-ịmọ ḅụ wa tọnwa kụra kẹ mịẹ nwenii ḅo mịọkụ la tẹ ḅara mẹ?”

⁴ Mie KỊNỊNYANAḄỌ ḅe ḅara ḅụ ḅo ị̀ la oku mẹ.

⁵ Ori mẹẹ, “Ḍuko amakiri mẹ ḅẹ atomi ma na agbamịẹapụ ma na pịrị mịnẹ ịn sọnọ na sọnọma na karama akalụ ma kẹ ḅuru-ịmọ tẹ kururu sakị ma kụra tesi oyi finji ma ḅụ, ini ì kụn gotẹ mịẹ-a.

⁶ Tẹ ịn fị-na-ḅuu-na sakị ịna aḅụụ na-iḅi ḅẹ ḅara mie ịn ḍiki tẹ mịẹ yee.”

⁷ Mie KỊNỊNYANAḄỌ ḅe ọ̀ tarị pịrị-pịrị ḅẹ ịkịankoroapụ ma ḅụ ḅọrọ tẹ ḍuko ye Jeruselemu lọkọlọkọ wararị tẹ tọnwa atomi anị ḅio angarị sakị, opu ama mẹ ikelema-koro ama ma ḅio kịngẹ-a, kụma abajị-suku da anga ḅẹ iri ma na ịrụa-ideriarị-anga mẹ ḅẹ kala atụndụ ma ḅio na sọ.

Ḅịḅịpoki-a anie Kun-so Dogi-ḅoarị

⁸ KỊNỊNYANAḄỌ ḅe mị oku mẹ kẹ Zẹkaraya pịrịm:

⁹ “Alatẹ sakị kụra ḅio à ma oloko ma sụa ị̀ atomi pịrịm: ‘Ọmịnị ẹrị mịnẹ ọ́ jụmọ-jụmọ inoma-a, tẹ iḅi ḅara na ọkụrụkụrụ ḅara kẹ jụmọ-jụmọ na angarị.

¹⁰ Ó diapụ-fịtẹ-ereme na, ḍapụ na iyingiapụ na ofori awọmẹ na, ja sịẹ ḅẹ apụ tẹ ọmịna ogboku angarị apụ na ponoma ma, anịanịa ḅụụ-fụka ḅụụ ḅụ emi ḅọ goḅọ-goḅọ. Ó siye kẹ jụmọ-jụmọ mịẹ ḅẹ aḅọkọ ḅẹ ḅẹrẹ-ḅiya ma.’”

¹¹ “Kụma ị̀ atomi kọngọ-kụrọma tẹ ì poki ḍụkụ-a. Ini ịna akuroma gbaịnm

¹² tẹ ịna aḅioḅẹngbọ mịẹ tẹ arị ịkụ kụrọ ḅara kụrọm. Ini iḅere-iḅerea kụra ḅio ḍumo sime ịkịankoroapụ ma ḅụ ḅọrọ tẹ kẹ ịn fịrịma tolumaye mẹ poki ḍụkụ-a ẹrẹsị, à kpọma ịganịm.

¹³ Àrị ẹkwẹn sakị in poki-a ẹrẹsị ịn tẹkẹ sakị àrị ịn pakịrị-a.

¹⁴ Erise ḅara ḅụ àrị ini ọfịn so mu ja sịẹ ḅụ angamam. Mị iḅi amakiri mẹ nwẹnị papaa fatẹ gbin koro sime, gbọrụḅọ-sọ anị ḅio anga-a ḅara ḅụ.”