Zẹkaraya 6 - FỊAFỊA BAỊBỤLỤ

Inia Kirimẹnjị-ọmụarụ Ma Ịkịan Mẹ

¹ À jen ịkịan nyanam. Àrị ọgọnọ ḍiki sakị, àrị inia kirimẹnjị-ọmụarụ ẹrịm ịn maa ojo ḅịyarị tụndụ ogboku ḅụ sime tẹ paka-ḅoarị.

² Tarị kirimẹnjị-ọmụarụ mẹ awụ tọrụ sụa asụ amẹẹ anị fọnọ mẹnjịm, kurukuru tọrụ sụa asụ amẹẹ nwẹnị maaịn karama ye mẹ fọnọ mẹnjịm,

³ tẹrẹị karama ye mẹ pịna-pịna asụ amẹẹ tẹ ini karama ye mẹ oju gbọọn-gbọọntẹ asụ amẹẹ.

⁴ Anịtẹso àrị enjẹlị ḅe gbelam, “Ị̀ nyanaḅọ, mịna kirimẹnjị-ọmụarụ ma tiye fiearị?”

⁵ Ọ̀ pakịrịm, “Ma ma anie inia fẹrụ-aḅịḅị ma; ini ịna aḅụụ kẹ tomikiri mamgba nyana KỊNỊNYANAḄỌ ḅe ḍie tẹ paka-ḅoarị.”

⁶ Kurukuru asụ ma fọnọ mẹnjịarị kirimẹnjị-ọmụarụ mẹ so ọgọnọ-jụ Babịlonịya muarị, pịna-pịna asụ ma ịrụa-ideriarị-anga muarị, tẹ gbọọn-gbọọn oju sụa asụ ma abajị-suku da bebe amakiri mẹ muarị.

⁷ Gbọịn-gbọịn oju sụa asụ ma paka-ḅo sakị ini inema tẹ sakị ọkị tẹ mu tomikiri mẹ sime-ḅara sọkịrị ḍiki-a. Enjẹlị ḅe ḅẹẹm, “Ó mu tomikiri mẹ sime-ḅara sọkịrị ḍikii!” tẹ ini ọkọ mịẹm.

⁸ Anịtẹso enjẹlị ḅe oloku pakama ị̀ pịrịm, “Ọgọnọ-jụ Babịlonịya mu asụ ma KỊNỊNYANAḄỌ ḅe ịganị deinma tẹ.”

KỊNỊNYANAḄỌ ḅe Tọnm ịn Jọsụwa Kịranịị

⁹ KỊNỊNYANAḄỌ ḅe mị oku mẹ kẹ ị̀ pịrịm.

¹⁰ Ori mẹẹ, “Kun-soapụ, Ẹlịdaha na, Tobahịja na, Jidaya na aḅara seleḅa na golu na daa-ọkị, tẹ kẹ anị-gbọrụ-kirikiri Josaya, Zẹfanaya tụḅọ ḅe warị muu. Mịna owiapụ mamgba Babịlonịya ḅụ kun-ḅara ḅio sime tẹ pịkịma-ḅom.

¹¹ Ịn pịrị pakama tẹ seleḅa na golu na ma ḅụ ye ọkị tẹ kẹ kịranị mịẹ tẹ kẹ Sịḅịda-Agbamịẹḅọ Jọsụwa, Jehozadakị tụḅọ ḅe sure.

¹² Ḍuko ọ̀ pịrị mịnẹ Kụrọmamgba nyana KỊNỊNYANAḄỌ ḅe ḅẹẹarị, ‘Ịn kẹ Sịn Ḅara Ḅe sịn owiḅọ ḅe lolo ḅa ò simearị anga mẹ ḅụ tẹ ori KỊNỊNYANAḄỌ ḅe Warị mẹ nama ḅa.

¹³ Ori mie anị nama ḅẹ ḅọ ḅe tẹ sime amadaḅọ pịrị kụn nyana ḅa, tẹ ori ori atomi da ḅa. Agbamịẹḅọ ori emine akaka sịẹ ḅa, tẹ ịn nama kọrị gboloma ḅa dein na gbọrụ-ḅịḅị-fie na ḅụ.’

¹⁴ Kịranị mẹ KỊNỊNYANAḄỌ ḅe Warị ḅio ḅụ kẹ ḅiokoromaye sọ tẹ kụn kẹ Ẹlịdaha na, Tobahịja na, Jidaya na Josaya na pịrị ḅa.”

¹⁵ Iḅere-iḅerea anga ḅụ angarị owiapụ ḅo ḅarasụa tẹ KỊNỊNYANAḄỌ ḅe Warị mẹ siin nama ḅa. Tẹ in siin anị nama sakị ó nimi ḅa mịnẹ Kụrọmamgba nyana KỊNỊNYANAḄỌ ḅe ị̀ kẹ ọ́ fịrịmam. Mie-mẹmgba paka ḅa ó ḅintẹ ḅara kẹ KỊNỊNYANAḄỌ ọmịna Tamụnọ ḅe oloko ma kokoarị ḅẹḅẹ.