Zẹkaraya 5 - FỊAFỊA BAỊBỤLỤ

Fiin-arị In-ikoarị-abịlala mẹ ḅẹ Ịkịan

¹ À siin ḍikim, tẹ mị sakị à fẹrụ ḅio fiin ḅọrọarị in-ikoarị-abịlala ẹrịm.

² Enjẹlị ḅe àrị ẹrị ye kẹ ì gbelam. À pakịrịm, “Fẹrụ ḅio fiin ḅọrọarị in-ikoarị-abịlala; anị ḅẹ nangwọ eseni amita tẹ finji nwẹnị ini amita na pakịrị na.”

³ Anịtẹso ori ị̀ ḅẹẹm, “Anị ḅụ paka mu bebe amakiri mẹ ikelema ḅarị wori-nume kẹẹ wararị. Gbọrụ pakịrị ḅụ anị ḅẹẹarị mịnẹ furuḅọ nwẹn-sịn ḅọ sịn ḅọ ini mḅọ sakị-siin ḅa amakiri mẹ ḅụ, tẹ osi pakịrị anị pịkị ḅẹẹarị mịnẹ ye karị tẹrẹmẹ iruoarị ḅọ iruoarị ḅọ ini mḅọ ọkị so ḅa.

⁴ Kụrọmamgba nyana KỊNỊNYANAḄỌ ḅe ḍukoarị mịnẹ ọ̀ mị wori-nume mẹ fịrịma pakama ḅa, tẹ anị furuḅọ sime warị goyegoye na ye karị tẹrẹmẹ iruo ye ḍukoarị ḅọ sime warị goyegoye na so ḅa. Anị ịna awarị ḅio sime tẹ warị ma fama ḅa.”

Kana ḅio sime Ẹrẹḅọ ma Ịkịan mẹ

⁵ Enjẹlị ḅe siin tolu-sịẹ tẹ ḅẹẹm, “Ḍikii! Jen kịrị ye ḅoarị!”

⁶ À gbelam, “Ḅọrọ tiye?” Ọ̀ pakịrịm, “Kana, tẹ anị sịẹ bebe amakiri mẹ ḅẹ si mẹ pịrịm.”

⁷ Kana mẹ ḅịḅị-gbaịnye nyanam, lẹjị nwẹn-sịn ye kẹ mịẹ ye. À kweinma ḍikiarị ḅẹ sakị, ịn ḅịḅị-gbaịnye mẹ finjim, tẹ kana mẹ ḅio ḅụ gbọrụ ẹrẹḅọ lẹgị simem!

⁸ Enjẹlị ḅe ḅẹẹm, “Ma ẹrẹḅọ ma sịẹ si-sịḅịḅio-sụa pịrị wararị.” Anịtẹso ori á sukuruma kana mẹ ḅio suu tẹ ḅịḅị kẹ siin gbaịn koromam.

⁹ À ḍiki tẹ maa ereme ẹrịm ini opu kụrọ nyana apamba, ekule aị pembe aị, kẹ fiin ị̀ dama-ḅoarị. Ịn kana mẹ kpopu saakị tẹ anị kẹ fiin som.

¹⁰ Àrị enjẹlị ḅe gbelam, “Ini anị kẹ tọ-anga muarị?”

¹¹ Ọ̀ pakịrịm, “Ịn kẹ Babịlonịya muarị, ịn tamụnọ-warị nama anị pịrị ḅẹ anga. Ịn tamụnọ-warị mẹ nama fama tẹ ḅẹḅẹ, ịn kana mẹ kẹ anịanga koroma tẹ sunsin anị pịrị ḅa.”