Zẹkaraya 3 - FỊAFỊA BAỊBỤLỤ

Ịkịankoroḅọ ḅe ẹrị Ịkịan Sịḅịda-Agbamịẹḅọ ḅe ḅụ

¹ Jen ịkịan tẹ KỊNỊNYANAḄỌ ḅe kẹ ì ḍie ye ḅụ Jọsụwa Sịḅịda-Agbamịẹḅọ ḅe, paka-ḅom, ọ̀ KỊNỊNYANAḄỌ ḅe enjẹlị ḅe akaka sịẹ wararị. Tẹ anị anga Ekwesu Jọsụwa palị tẹ sịẹ simem, tẹlẹma wararị ḅẹrẹ ḍuko-ḍuko ori ọgọnọ gbana.

² KỊNỊNYANAḄỌ ḅe enjẹlị ḅe Ekwesu ḅẹm, “Ekwesu, yee KỊNỊNYANAḄỌ ḅe ḅẹrẹ-ḅarasii pẹlẹ ị́ pịrị! Yee KỊNỊNYANAḄỌ, Jeruselemu ḅẹlẹmarịḅọ ḅe, ḅẹrẹ-ḅarasii pẹlẹ ị́ pịrị. Ḅị tomḅọ ḅe ọ̀ fịnị ḅio nụnụ pakama-ḅo sịn-pakịrị na kịkarị.”

³ Jọsụwa anịanga sịẹ wararị sakị mẹ ḅụ ọ̀ ḅụrụtẹ kapa sụam.

⁴ Enjẹlị ḅe So-ḅio ḅo ḅarasụa ọ̀ pịrịarị apụ ma ḅẹẹm, “Ọ́ ḅị tomḅọ ḅe sụa wararị ḅụrụtẹ kapa mẹ siin.” Anịtẹso ọ̀ Jọsụwa ḅẹẹm, “Àrị í si saakị sin tẹ ị́ ḅụụ, tẹ ịwọ kapa kẹ ị́ pịrị sụa ḅa.”

⁵ Ọ̀ tọn ḅarasụapụ ma pịrịm ịn fịafịa wararị kala ḅịtẹ sun kẹ Jọsụwa sịḅị sure. Ini ọkọ mịẹm, anịtẹso ini ịwọ kapa mẹ kẹ ọ̀ sụam KỊNỊNYANAḄỌ ḅe enjẹlị anịanga sịẹ sime wararị ogbo.

⁶ Anịtẹso enjẹlị ḅe ḍuko Jọsụwa pịrịm mịnẹ

⁷ Kụrọmamgba nyana KỊNỊNYANAḄỌ ḅe ḍuko tẹ, “Ị́ ị̀ ḅịḅị poki tẹ ì oloko ma na ị́ mẹnjị ḅẹ tẹ à tọn ị́ pịrị afịrị ma na mịẹarị ḅẹḅẹ, anị sakị rẹ mie í sime tọrọkọ mu tẹ ị̀ Warị mẹ na anị ḅẹ ogigo ma na daarị ḅọ sọ ḅarịye, tẹ arị ị́ atẹkẹ naa ḅa, arị ị̀ tọrọkọ sịẹarị enjẹlị ma atẹkẹ naarị gbọrụ ḅara mẹ.

⁸ Ọkọ ẹrẹsị, pokii Sịḅịda-Agbamịẹḅọ Jọsụwa. Ọmịnị ori na sọ tẹ agbamịẹ fịrịmẹnjịarị apụ ma sọ, ó pokii, ọmịnị ḅo ḅarị iḅi sakị ḅẹ elekima mẹ: àrị ị̀ fịrịmẹnjịḅọ ḅe mịẹfinji ḅa, kẹ Sịn Ḅara Ḅe sịn-arị ḅọ ḅe!

⁹ À sọnọma akuḅu sụa ḍụḅarị kẹ Jọsụwa tọrọkọ koromarị. Àrị anị ọgọnọ ye sọkị kẹẹ ḅa, tẹ kpọkpọ gbọrụ ene ḅụ à mị amakiri mẹ ḅẹ si mẹ saakị siin ḅa.

¹⁰ Anị ene mẹ ḅụ, ọmịna ḅụụ ọrụḅọ-ọrụḅọ mḅọ na kpeki tẹ anga ḅọ sịn ḅo dein na ye ḅụụ la-a na ḅụ ḍereku ḅa, ọmịna ḅara-kuḅu ḅẹ vaịnị na figi asịn na aḍụọ ọmịnị ikelemam.”