Zẹkaraya 11 - FỊAFỊA BAỊBỤLỤ

Guda-guda Atomi ma Ḅịkị mẹ

¹ Lẹbanọnị amakiri, ị́ aḅọkọ finjii, mịẹ tẹ fịnị inetẹ í sida asịn ma dọkịma gbin ḅarị ḅara!

² Sayịpẹrẹsị asịn, ọmịnị oloku-oloku owuu sida asịn ma ḅịkị tẹẹ; árị ebube nyana asịn ma in guluguluma tẹ! Basani ḅẹ oku asịn, ọmịnị oloku-oloku owuu Kpititẹ opu piri mẹ ịn pẹlẹ sara tẹẹ!

³ Ḅẹrẹtọn-apụ ma kururu kẹ oloku pakamarị; ịna ebube so tẹẹ! Idum ma olokuarị ye poki; Ịna opu piri sime-yọ Jodanị akaka mẹ ḅụ in guluguluma tẹẹ!

Maa Anana-ḍikiḍikiapụ Ma

⁴ KỊNỊNYANAḄỌ ị̀ Tamụnọ ḅe ị̀ ḅẹẹm, “Anana-ḍikiḍikiḅọ ḅara mịẹẹ, anie amịna anana-ogbo kẹ paka mu ḅaa ḅẹ-muarị ḅọ.

⁵ Ịn nyana apụ mie ịn ḅaarị, tẹ fomu-ḅara nyana-a. Ịn nama mẹ dẹrị-dẹrị tẹ ḅẹẹarị, ‘KỊNỊNYANAḄỌ ḅe tokinii! Wa kọn tẹẹ!’ In ḍikiḍikiarị apụ ma kịngẹ sọ in ḍiki-sịḅịjịrị-a.”

⁶ (KỊNỊNYANAḄỌ ḅe ḅẹẹarị, “À ḅarị jen kẹ sịḅị-jịrị nyana gbọrụḅọ-sọ pịrị ḅịa tomikiri ḅụ. Yẹrị ḅarana tomi mamgba kẹ ḅẹrẹtọn ịn pịrịarị apụ ma suku-ḅio suu ḅa. Árị ḅẹrẹtọn-apụ ma tomikiri mẹ fama ḅa, tẹ àrị ịn ḅọrọma ḅịa ịna kụrọ ḅara-ḅio.”)

⁷ Anana ma fẹ tẹ dẹrị-apụ ma ị̀ ọkọm, tẹ à nwẹnị ịn ḅaa ḅẹ-muarị anana ma ḍikiḍikiḅọ sọ. À nwẹnị maa sịn ikiḅa ọkị, à gberie sịnm “Iḅi-mịẹ,” tẹ osi ye “Gboloma.” Tẹ à nwẹnị anana-ogbo mẹ ḍikiḍiki.

⁸ À ḅarị inetẹ tẹra Anana-ḍikiḍikiapụ tẹ ì ḍiki-ḅioḅuarị apụ inema-a tẹ gbọrụ akalụ kịngẹ ḅụ fịrị ḅụ in siinm.

⁹ Anịtẹso àrị anana ogbo mẹ ḅẹẹm, “À ḅarị jen kẹ ó ḍikiḍikiḅọ sọ ḅịa. Yee fịị ḅẹ apụ, fịị. Yee in guluguluma ḅẹ apụ, gulugulu. Kiri kọn apụ jụmọ-jụmọ guluguluma ḅa.”

¹⁰ Anịtẹso àrị ịn kẹ “Iḅi-mịẹ” sịn sịn-ikiḅa mẹ ọkị tẹ anị anyịmam, kẹ KỊNỊNYANAḄỌ ḅe kẹ sịẹ-sịẹ ma na fị ọḅọkụ mẹ kan-siin.

¹¹ Mie ḅụ ọḅọkụ mẹ kaan-som anị ene ḅụ. Anana ma fẹ tẹ dẹrị-apụ ma à mịẹ ye kẹ elekima sụarị, tẹ nimim mịnẹ KỊNỊNYANAḄỌ ḅe à mịẹ ye mẹ ḅụ ḅọrọ tẹ ẹkwẹnm.

¹² Àrị ịn ḅẹẹm, “Ọ́ ḍụkụ ḅẹḅẹ ọmịnị ị̀ kọrịnama igbigi kẹ ị̀ gbẹẹ Kụma ọkọ-a ḅẹḅẹ ọmịnị anị ọlọọ.” Mie ḅụ ịn seleḅa pakịrị suei kẹ ị̀ gbẹm ị̀ kọrịnama igbigi ḅara ḅụ.

¹³ KỊNỊNYANAḄỌ ḅe ị̀ ḅẹẹm, “Árị kẹ mu Tamụnọ-warị mẹ ḅẹ igbigi-koko anga mẹ ḅụ suu.” Mie à seleḅa pakịrị suei ma ọkị mu Tamụnọ-warị mẹ ḅẹ igbigi-koko-anga mẹ ḅụ suu ye — in kuromam à la na-iḅi igbigi ḅịḅị mẹ.

¹⁴ Anịtẹso à maaịn karama sịn-ikiḅa mẹ anyịmam, kẹ “Gboloma” sịn ye mẹ, tẹ Juda na Izirẹlị na gboloma mẹ kọsị-saram.

¹⁵ Anịtẹso KỊNỊNYANAḄỌ ḅe ị̀ ḅẹẹm, “Pịkị jen gbọrụ sakị kẹ anana-ḍikiḍikiḅọ ḅara mịẹẹ, mị sakị ḅụ ye sọ-a ye.

¹⁶ Àrị anana-ḍikiḍikiḅọ kẹ ị̀ anana-ogbo mẹ ḍikiḍikiḅọ mịẹ tẹẹ, kụma ọ̀ ḅarasụa anana ma pịrị-a ịn ḅaa ḅẹ ye ḅo ini na bịama sakị; iri-faa aị ma sọ ọ̀ ḍọkị-a, anịanịa ye la aị ma gwọ, anịanịa fịye kẹ fịịa-so aị ma pịrị fị. Anie nakara, ọ̀ ḅẹlẹkị sụa tẹịn aị ma nama pẹịarị pịkị ịna aḅụọ ḅẹ okuro ma pịọnị sin-arị.

¹⁷ Anị kẹ mịẹ-mịẹ ye ofori anana-ḍikiḍikiḅọ ḅe ọ́ fa tẹẹ! Ori ori anana-ogbo mẹ koroma mangị-so tẹẹ. Ọmụ gbọrsịḅị ọ̀ ḅaa guluguluma ḅa. Ọ̀ ḅara kọngọ pẹlẹ so ḅa, tẹ ori ama-ḅara ḅẹ tọrụngbọ pụụn ḅa.”