Zẹkaraya 10 - FỊAFỊA BAỊBỤLỤ

KỊNỊNYANAḄỌ Ḅe Ḍụa-ḅọrọma Mininiarị

¹ KỊNỊNYANAḄỌ ḅe ḅara ḅụ eene ḅii, kụra aya-ḅịḅị mẹ ḅụ. KỊNỊNYANAḄỌ ḅe mie eene oḅuto ma na nwẹịn-nwẹịn eene ma na kẹ fịrịmarị, nwẹnị mịẹ tẹ ḍụọ ma ịwọ ḅẹḅọ-ḅẹḅọ pịrịarị.

² Tomi oru-afụḅara na ḅịrịapụ na ḅara ye gbelarị, kụma pakịrị-aḅịḅị tẹ ịn nyanarị aị iruo-aị na ofori-ofori aị na. Ja apụ ḍawọ puuarị, kụma ó toluma irima kịngẹ mie ịn mịẹarị; ịn pịrịarị dedema mẹ ye mịẹ-a. Mie ḅụ tomi ma iri-faa tẹ anana ikelekele ḅara ikelekelearị. Ịn ḅụụ-fụka ḅụ emi ịn sịḅịdaḅọ nyana-a ẹrẹsị.

³ KỊNỊNYANAḄỌ ḅe ḅẹẹarị, “Àrị ịganị nyana igoniapụ tẹ ḅẹrẹtọn ị̀ atomi pịrịarị apụ ma pịrị wararị, tẹ à fomu-ḅara kẹ ịn pịrị ḅẹ-yearị. Juda ḅẹ apụ ma ịn sime ị̀ pịrịm, tẹ yẹrị, Kụrọmamgba nyana KỊNỊNYANAḄỌ ḅe ịn ḍikiḍiki ḅa. Ini ị̀ kụrọ nyanatẹ ọmụgbin-asụ amẹẹ sọ ḅa.

⁴ Ịna ogboku ḅụ ḅẹrẹtọn-apụ na, sịḅịdapụ na, ọmụ-ogbo ḅẹ sịḅịdapụ na paka-ḅo tẹ ị̀ atomi gọvịna sọ ḅa.

⁵ Juda ḅẹ apụ ma owu-ḅara-iḅiapụ sọ ḅa, ọmụapụ tẹ si kẹ ịn tọn apụ nanga suu ḅara pembe ḅara etela ma ḅụ. Ini owu-sọ ḅa KỊNỊNYANAḄỌ ḅe ini na emi ẹrẹsị, tẹ si kẹ ịn tọn apụ ma ḅẹ asụ kẹ ọmụ gbin-arị apụ ma sọ nẹngịma ḅa.

⁶ “À Juda ḅẹ apụ ma mịẹ kụrọma ḅa; Àrị Izirẹlịapụ ma pụkọ-pakamaḅo ḅa. Àrị ọkụrụkụrụ nyana ịn pịrị ḅa tẹ ini ọkị pịkị-ḅo ama lama ḅa. In sime ḅarị ḅara gbala-gbala amụ arị ịn sịkị-a ye ọkụ. Yẹrị anie KỊNỊNYANAḄỌ ịna Tamụnọ ḅe arị ịna atẹkẹ pakịrị ḅa.

⁷ Izirẹlịapụ ma ọmụapụ kụrọ ḅara kụrọ ḅa, ini iru ḅuu sime apụ kịka tẹ ḅioḅẹlẹ ḅa. Ịna furo-ḅẹ-apụ mị owu-ḅara-iḅi mẹ kẹ ḅio kuroma tẹ ḅioḅẹlẹ ḅa KỊNỊNYANAḄỌ ḅe kọrị tẹ ye ẹrẹsị.

⁸ Àrị ị̀ atomi sịn tẹ in kobiri gboloma ḅa. Àrị ịn pụkọ-pakamaḅo tẹ ịn mịẹ tẹ ịna kịẹn-ḅịḅị sun ḅo anị la-la ḅiri la ḅa.

⁹ Karakaraye àrị ịn gala-galama sịẹ-sịẹ ogboku suu tẹ ḅẹ sọ, ịn paa ala fa wararị ayọ ma ḅụ sime tẹ ị̀ kẹ ḅiokoroma ḅa. Ini na ịna awọmẹ na fịị-a so tẹ gbọrụ ḅụ pịkịma ama ḅo ḅa.

¹⁰ Ijiputi na Asiriya na ḅụ arị ịn kẹ ama ḅo tẹ ịn kẹ ịna ḅara-kuḅu ḅẹ bebe amakiri ḅụ angama ḅa. Giliyadi na Lẹbanọnị na ḅụ sọ arị ịn kẹ angama ḅa; bebe amakiri mẹ tomi-tomi ḅin ḅa.

¹¹ Ini ịna aḅụụ-fụkamarị abajị mẹ saḅarị sakị, Yẹrị, KỊNỊNYANAḄỌ ḅe, ọnụngọ ma nẹngịma ḅa, tẹ Nayịlị tọrụ mẹ ḅẹ pokolo yọ mẹ ḅẹ kiri mẹ kpongbo-kiri sọ ḅa. Ḅụụ-gelemarị Asiriya ḅụụ-lẹgịma ḅa, anịsakị opu kụrọ nyana Ijiputi arị opu kụrọ fama ḅa.

¹² À mịẹ tẹ ị̀ atomi ma kụrọ ḅa; in sunsin ị̀ pịrị tẹ ị̀ ḅịḅị poki ḅa.” KỊNỊNYANAḄỌ ḅe ọkọ ḅẹẹm.