Zẹfanaya 3 - FỊAFỊA BAỊBỤLỤ

Jeruselemu Si Na Pakịrị-ḅo Na

¹ Jeruselemu fa tẹẹ, anị ḅụrụ-kọsị tẹ kọngọ-kụrọmarị opu ama mẹ tẹ amịna atomi ponomarị ye mẹ.

² Amụ anị KỊNỊNYANAḄỌ ḅe poki-a, anịanịa ò ḅeri nụnụ fomu-ḅara mẹ daa-ọkị. Amụ anị KỊNỊNYANAḄỌ ḅe kẹ ḅiokpọma-a, anịanịa ọ̀ ḅarasụa ḅii.

³ Anị ḅẹ fịrịmẹnjị-opuapụ ma oloku ma ḅọrọarị ọkụkụ kịkarị; anị ḅẹ ḅẹrẹkọn-apụ ma ḅuru-pọkọtarịarị anamakiri kịkarị, pẹịye-pẹịye pọkọ-ta-a ḅụra ḅara ḅụ ḅo dede la ḅẹ mgbe gbọrụmgbọ-sọ ịn kọnma-kọnma-a.

⁴ Ịkịankoroapụ ma ḅẹrẹtọn pịrị ḅọ ofori apụ ḅara kẹ amịna ḅụụ ọkị tẹ mbasịarị agbamịẹapụ ma fịafịa ye mẹ pilemarị, tẹ Tamụnọ oloko mẹ fangala ḅo anị sọye mịẹ ịn pịrị ḅẹ ḅara wẹrịarị.

⁵ Kụma KỊNỊNYANAḄỌ ḅe paa opu ama mẹ ḅio emi; kuraye, anie ọ̀ mịẹarị tẹ gbala-gbala iri-ye mịẹ-mịẹ-a. Dede goyegoye gbarị-a ḅara ḅụ, ori inoma ofori ye ọkị-ḅo ori atomi pịrịarị. Tẹ anịsọ anịanga ḅụ karakara mịẹ-a apụ ma paa iri-ye mịẹ tọrọkọ-tọrọkọ muarị tẹ ḅụụ-jịrị-a.

⁶ KỊNỊNYANAḄỌ ḅe ḅẹẹarị, “À sịẹ-sịẹ ḅaa fama tẹẹ; àrị ịna opu ama ma kan guluguluma tẹẹ, onu ma na tawa ma na tẹ kirikọn-aị ma sii kọsịtẹ simearị. Opu ama ma ini arị koroma mangị-so tẹẹ; etela ma kịnị ofori ḅara kẹ emi — kiri kọn gbọrụḅọ-sọ ofori.

⁷ À kuromam mịnẹ anịtẹso ị̀ atomi mangịma nyana ị̀ pịrị ḅa, tẹ arị ịn da karakarama gotẹ kẹ in fomu ye mẹ daa-ọkị ḅa, mịnẹ ịn ḅarị gbala-gbala à kẹ in toluma ye mẹ kẹ ḅioḅọrọma ḅịa. Kụma ala-a ịn paa elemu ịn mịẹ-mịẹ gbọrụ ḅara mẹ mịẹarị.”

⁸ KỊNỊNYANAḄỌ ḅe ḅẹẹarị, “Paa koruu; à saakị tẹ ḅẹrẹ ḍuko sịẹ-sịẹ ma sịḅị sẹịn ḅarị ene mẹ koruu. Àrị ì ḅioḅẹngbọ mịẹ kụrọma tẹ sịẹ-sịẹ ma na amadapụ daarị ayọ ma na kobiri ḅo, mịẹtẹ ị̀ ịganị mẹ kụrọ ini ịnọ ḅẹ ḅara. Ì owi ịganị mẹ ḅẹ kọrị-fịnị bebe tomikiri mẹ guluguluma ḅa.”

⁹ “Anịtẹso à sịẹ-sịẹ ma ḅẹ atomi ma ḍima tẹ ini yẹrị kịngẹ tẹkẹ ḅa; ịn ḅarị oru-atamụnọ tẹkẹ ḅịa. Inimgba ị̀ ḅịḅị poki ḅa.

¹⁰ Sụma-jụ simearị Ẹtịyopịya ḅụ sọ ị̀ atomi gala-gala wararị apụ ma ḍiepịrị-aị ọkị-ḅo ị̀ pịrị ḅa.

¹¹ Anị ene mẹ ḅụ, ọmịnị ị̀ atomi ma gotẹ ḅụụ-jịrị-jịrị ye ḅarị paka ḅịa, mịnẹ ọ́ kọngọ kụrọma ị̀ pịrịm. Ḅẹḅọ-ḅẹḅọ tẹ ḅụụ-gelema tẹ opu ẹkwẹn kọn-arị ḅo arị mḅọ saakị siin ḅa, anịsakị gbala-gbala ọ́ ḅarị jen kẹ kọngọ kụrọma ị̀ pịrị ḅịa ị̀ fịafịa tụndụ mẹ ọgọnọ.

¹² Anị anga ḅụ à ḅụụ-lẹgịmarị simini atomi kẹ koroma ḅa, ḅarasụa gotẹ ị̀ ḍọkụma-ḅo ḅẹ apụ.

¹³ Izirẹlịapụ ma tẹ fịịa-so ḅarị apụ ma ini iri-ye kẹ gbọrụḅọ-sọ mịẹ ḅịa, ini iruo aị ḍuko ḅịa, pịkị oḅori-kẹ-kịnịsịn ḅẹ ḍọkị ḅịa. In lolo tẹ ye ịn la ḅịa ḅara sime ḅa, gbọrụḅọ sọ gotẹ ḅalafa-a ḅara.”

Ḍereku Nume

¹⁴ Izirẹlịapụ, ó nume-su-su ḍereku oloku kọọn! Ó ḅioḅẹngbọ mamgba kẹ ḍerekuu, Jeruselemu!

¹⁵ KỊNỊNYANAḄỌ ḅe ọmịna fomu-ḅara dasịẹma tẹẹ; Ò si kẹ ọ́ tọn apụ mamgba saakị sin tẹẹ. KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ọmịnị na emi; Mịọkụ ḅụ ó gotẹ ḅalafa ḅẹ ye ofori.

¹⁶ Anị ene mẹ ḅụ, in Jeruselemu ḅẹẹ ḅa, “Ḅalafa ma, Zayọnị opu ama! Ị́ aḅara kẹ kpọrọkọtọma gbin koroma ma!

¹⁷ KỊNỊNYANAḄỌ ị́ Tamụnọ ḅe ị́ na emi; Ọ̀ kụrọ owu-ḅara-iḅi kẹ ị́ pịrịarị. KỊNỊNYANAḄỌ ḅe í ḍiki tọrụ-ḅẹlẹ ḅa, tẹ ọ̀ ḅẹlẹma ḅụ ori ịwọ ḍumo kẹ ị́ pịrị ḅa. Ori í gotẹ nume-su tẹ ḍereku ḅa.

¹⁸ Alalị fị apụ ḍereku ḅara.” KỊNỊNYANAḄỌ ḅe ḅẹẹarị, “À kịnị fama ọhọm mẹ dasịẹma tẹẹ, tẹ ọmịna tọrụ-tuu mẹ saakị sin tẹẹ.

¹⁹ Sakị mẹ ḅoarị! Àrị í ponomarị apụ ma fomu ḅa; àrị í ekeliapụ mamgba pụkọ-pakamaḅo ḅa tẹ kun-so apụ ma kẹ warị ḅo ḅa. Àrị ịna ḅụụ-jịrị mẹ kẹ kụn sọma ḅa, tẹ bebe tomikiri mẹ in tokini ḅa.

²⁰ Sakị mẹ ḅoarị! Àrị í gala-galatẹ atomi ma kẹ warị ḅo ḅa; àrị ị́ mịẹtẹ ị́ ereso ḅa bebe tomikiri mẹ ḅụ pịkị mịẹtẹ í jen kẹ lọkọlọkọ ḅa.” KỊNỊNYANAḄỌ ḅe ọkọ ḅẹẹm.