Zẹfanaya 2 - FỊAFỊA BAỊBỤLỤ

¹ Ḅụụ-jịrị nyana-a sịẹ, ó kuroma nyana ọmịna ḅụụ pịrị

² tẹrẹmẹ ó ḅo fịlawa kịka tẹ kpatụ tẹ fịị, tẹrẹmẹ KỊNỊNYANAḄỌ ḅe ịganị mẹ tẹ fịnị kọrị ḅara kọrịarị ye mẹ ḅo ọmịna ọgọnọ sara, tẹrẹmẹ ori owi-ịganị mẹ ene mẹ la.

³ Ọ́ pịkị KỊNỊNYANAḄỌ ḅe da, ọmịnị-mgba tẹ ḅụụ-lẹgịmarị apụ ama kiri mẹ, ọ̀ tọn koroma aị ma poki tẹ mịẹarị apụ. Ó kuraye mịẹ tẹ ọmịna aḅụụ lẹgịmaa, KỊNỊNYANAḄỌ ḅe tọrọkọ ḅụ. Ẹbịsịya KỊNỊNYANAḄỌ ḅe ori ịganị ḍie-pakama ḅarị ene mẹ ḅụ fomu-ḅara ọ́ gbarị ḅarị ḅoto.

Izirẹlị ikelema-koro wararị Asịẹ ma la ḅarị Opu Ḅụụ-fụka

⁴ Gbọrụḅọ-sọ kiri kọn ḅịa Gaza opu ama mẹ ḅio. Asẹkẹlọnị ḅẹ apụ anị koroma mangị-so ḅa. Ene maa anga ḍie ḅarị sakị ini Asịdọdị ḅẹ apụ dee pakama fama tẹẹ, tẹ ini Ẹkịrọnị ḅẹ apụ ma dee siin ḅa ịna opu ama ḅụ.

⁵ Filisiteniapụ ọ́ fa tẹẹ, ọmịnị tọrụ akaka angarị apụ. KỊNỊNYANAḄỌ ḅe ḅẹrẹ-pẹlẹ ọmịna ọgọnọ gbana tẹẹ. Ori ọ́ ḅaa guluguluma ḅa, tẹ ọmịna ḅụ gbọrụḅọ-sọ kiri kọn ḅịa.

⁶ Ọmịna amakiri mẹ tẹ abajị akaka simearị ye mẹ papaa koro simearị ḍụọ-kọrị-kiri sọ tẹ anana-ḍikiḍikiapụ obokoro na anana koko onu na nama sara wararị yọ sọ ḅa.

⁷ Juda ḅẹ apụ tẹ fịị-a so ḅarị apụ ma ọmịna amakiri ḅụ koro sime ḅa. Ini anịanga kẹ ini anana ogbo-ogbo ma ḍikiḍiki yọ sọma ḅa, tẹ Asịdọdị ḅẹ awarị ma ḅio mono ḅa. KỊNỊNYANAḄỌ ịna Tamụnọ ḅe ini na sime tẹ ịn mịẹ tẹ in siin lolo ḅa.

⁸ Kụrọmamgba nyana KỊNỊNYANAḄỌ ḅe ḅẹẹarị, “À naa tẹ Mohabụ na Amọnị na ḅẹ apụ ma kẹ ị̀ atomi mịẹ sima-sima tẹ kẹ ịna ḅụụ-sịnịsịnịmarị ye mẹ, pịkị ịn ḅụụ bomarị ye mẹ na, mịnẹ, ịn kụrọ ḅara kẹ ịna kiri ọkị ḅa.

⁹ Piki-pikiye-ofori ḅara ḅụ yẹrị anie Izirẹlị ḅụ ḍumo wararị Tamụnọ ḅe sakị goyegoye, à karị tẹ ḅẹẹarị mịnẹ ịn Mohabụ na Amọnị na ḅaa guluguluma ḅẹ-yearị ịn Sọdọmụ na Gomora ḅaa guluguluma ḅara mẹ kịka ḅara. Arị ḅe fụn otolo-otolo yọ sọ ḅa, sii kọsị gbamaso ḅarị yọ, piri gbaịntẹ anga. Ị̀ atomi ḅụ fịị-a so ḅarị apụ ịna aị fọịn tẹ ịna kiri ọkị ḅa.”

¹⁰ Mị-ḅara mie Mohabụ na Amọnị na ḅọrọ tẹ fomu-ḅara da ḅarị ḅara, ịna ḅụụ-gelema na opu ẹkwẹn na ḅụ, pịkị ịn kẹ Kụrọmamgba Nyana KỊNỊNYANAḄỌ ḅe atomi ma mịẹ sima ye ẹrẹsị.

¹¹ KỊNỊNYANAḄỌ ḅe ịna tẹmẹ-naịn-naịnma ḅa. Ò tomikiri ḅẹ atamụnọ ma iderima-ḅo papaa aị sọ ḅa, anị tẹso, sịẹ goyegoye sunsin ọ̀ pịrị ḅa, ọrụ-na-ọrụ-na amịna amakiri ḅụ.

¹² KỊNỊNYANAḄỌ pịkị Sudanị ḅẹ apụ sọ mịẹ tẹ ịn fịị ḅa.

¹³ KỊNỊNYANAḄỌ ḅe ọ̀ kụrọ kẹ Asiriya guluguluma ḅa. Ọ̀ mịẹ tẹ Ninive opu ama mẹ sii kọsị tẹ kịnị koroma mangị-so tẹ ịkpa sọ ḅa, minji ofori ịkpa.

¹⁴ Anị anana ogbo-ogbo na, opu anama ogbo-ogbo na, piri-ḅio-ḅẹ anama ḅara-ḅara na ḅọlọlọ simearị anga sọ ḅa. Anị ḅẹ kan-saratẹ ayọ ma ḅụ mgbukumgbuku anga tẹ ikiḅa-aḅọkọ ma ḅụ sime tẹ ḅio fiema ḅa. Ḍin feni warị-ḅọkọ-amasịn ma ọgọnọ sime tẹ oloku ḅa. Sida ḍụḅọ tẹ ịn kẹ árị awarị ma nama aị ma kịnị kpakpa so ḅa.

¹⁵ Anie anị sime opu ama mẹ tẹ amịna soku-ḅẹ kụrọ ḅụ ḅụụ-gelema tẹ kuromarị mịnẹ anị la-la ye ofori ḅarịye mẹ ḅụ paka ḅarịye. Anị ḅẹ atomi ma kuromarị tomikiri ḅụ ịna opu ama mẹ ḍụḅa tẹịnm. Anị gulugulu fa tẹ koro-sime ḅarị ḅara ḍiki, piri-ḅio-ḅẹ anama ḅọlọlọ tẹ ịnyọsara ḅarị anga! Mẹnjị-ḅọrọarịḅọ goḅọ-goḅọ ọḅụ-na-isema ḅa sịḅị-kanakana ḅụ.