Tayịtọsị 3 - FỊAFỊA BAỊBỤLỤ

Kịrayịsị Ḍukamẹnjịapụ Ye-mịẹ-ḅara

¹ Kẹ ị́ atomi ma ḅiokoroma tẹ ịn sịḅị-tuu ḅẹrẹtọn-apụ na, kụrọ-ḅara ḅụ simearị apụ na pịrị, tẹ ịna ḅịḅị poki, pịkị tẹlẹma tẹ iḅiye goyegoye mịẹ, ḅọkọ, ḅọkọ ḅụ.

² Ḍuko ịn pịrị ịn gbọrụḅọ ḅụ sọ siye ḍuko ma, kụma dein na ikia na ḅara simee, tẹ sakị mamgba gbene ḍumo kẹ ḅẹḅọ-ḅẹḅọ na anga.

³ Kẹ gotẹ ọkọ ḍukoarị, sakị ḅẹ gbọrụ sakị ḅụ wamịnị ḅioju sọ oḅori-sọ tẹ, ḅịḅịpoki-a ḅara kẹ irima-irima simem. Wa omoni-sọ ye goyegoye pịrị gotẹ lẹlẹ akuroma na tomikiri ḅẹ tọrụ-ḅẹlẹ kịrị-kịrị na nyana simem. Wa wamịna aḍumo kẹ mịẹye jen-a, si kuroma na, jụmọ sime-ḅara ḍiki tọrụ fụka na famam; ja apụ nwẹnị wa ḍiki-ḅioḅu, tẹ wamịnị pịkị ịn ḍiki-ḅioḅum.

⁴ Kụma wamịna Tamụnọ wamịna Ḅọrọmaḅọ ḅe ori iḅi-yemịẹ-ḅara na, ḅẹlẹma na mịẹfinji tẹso,

⁵ ọ̀ nwẹnị wa ḅọrọma. Wamịnị ḅarana mịẹ gbọrụ iḅi mịẹye sọ ẹrẹsị-a, kụma ori ọkụrụkụrụ ẹrẹsị ọ̀ wa ḅọrọmam, ọ̀ Fịafịa Tẹmẹ ḅe ḅụ, anie sin iyi na ịwọ ḍumo na kẹ wa pịrịarị ḅọ ḅe, wa sịkịrị ḅụ.

⁶ Tamụnọ, wamịna Ḅọrọmaḅọ Jizọsị Kịrayịsị ḅe ḅụ ḅọrọ tẹ ḅaka ḅara kẹ ọ̀ Fịafịa Tẹmẹ ḅe ọsụma wamịna ọgọnọ saram,

⁷ mịẹtẹ ò ḍiki-ḅụụjịrị ḅụ wa ḅo Tamụnọ na kura tẹ wa kẹ ḅiokpọmarị sime gbamaso ḍumo mẹ nyana ḅẹm.

⁸ Miemẹ karakara ẹkwẹn. À ḅiiarị ị́ mịna aḅẹrẹ ma ḍuko, ḍuko kụrọma, mịẹtẹ Tamụnọ ḅụ minini nyana apụ ma ịna sakị kẹ iḅi amịẹaị pịrị mẹ kẹ ye-sịn, anie iḅi kẹ ḅẹḅọ-ḅẹḅọ mịẹ ḅẹ aị.

⁹ Kụma kịnị na nimi ofori aḅẹrẹ nụnụama ḅọrọ kọkọrọọ, paka-furo kịẹn nangwọma, kamụ-sọ, na oloko mẹ gbolomaye gotẹ owu sọ na. Arị kẹ mịẹ-mịẹ ye ofori, pịkị gberie-sọ la-a.

¹⁰ Ị́ maa sakị pembe ye kẹ puua dogi-ḅoarị ḅọ ḅeri nụnụ tẹ ọ̀ ḍụkụ-a ḅẹḅẹ, ḅarị ori na gbọrụ mịẹye sọ nyana gboloma ma.

¹¹ Í nimi wararị mịnẹ ọkọ sime tomḅọ mẹ iḅi tomḅọ-a, mḅọ mịẹarị asi ma mḅọ sime si ḅara kẹ kịnị ḍiearị.

Kunoma Ḅụ Mịẹ Ḅẹ Ḍuko Aị

¹² À ḅiiarị arị Atimasị na Tịkịkọsị na kẹ ị́ fịrịma sakị, í inetẹ ḅara, inetẹ ḅara mịẹ tẹ ḅo ị̀ la Nikopolisi ḅụ, arị anịanga okiringa sakị mẹ sime ḅẹ ẹrẹsị.

¹³ Sisi, í inetẹ ḅara, inetẹ ḅara mịẹ tẹ ḅarasụa Zenasi, oloko nimi ḅọ ḅe na Apọlọsị na pịrị tẹ ịn ḅọrọ-so in muarị anga mu, tẹ ẹrị mịnẹ ịna ḅụụ-fụkama ḅẹ ye goyegoye ịn nyanam.

¹⁴ Wamịna jụ ḅẹ atomi ma mịẹ, ịn ḍawọ tẹ ịn nyana sakị goyegoye kẹ iḅi mịẹ-mịẹ tẹ ịn pịrị ḅarịye mẹ ḅo karakara ḅụụ-fụka mịẹ ḅarị ḅara, ḍụkụ tẹ ini iḅi kẹ gbọrụḅọ-sọ mịẹ-a aḍumo kọnma.

¹⁵ Ị̀ na mị anga emi apụ mamgba í ḅiim. Ḅii-ḅịḅị kẹ mininiye mẹ ḅụ wamịna ikiapụ ma pịrịị. Tamụnọ ḍiki-ḅụụjịrị ọmịnị-mgba na simee.