Tayịtọsị 2 - FỊAFỊA BAỊBỤLỤ

Karakara Tolumaye

¹ Karakara tolumaye na, kuraye na tolumaa.

² Omongi owiapụ ma toluma tẹ ịn tọrụ dein tẹ sịḅịḅio kuḅu ḅara sime, tẹ ịna ḅụụ ọlọ; ịn karakara minini na, ḅẹlẹma na ye-inema alama na nyana-a.

³ Anị gbọrụ ḅara ḅụ, omongi ereme ma toluma tẹ ini ereme kẹ ye mịẹ na-iḅi ḅara kẹ ye mịẹ, tẹ fịafịa ḍumo kọn. Ịn kịnị kẹ oḅukulo worima ḅọrọma, pịkị omoni sọ iru pịrị ma. Ini iḅiye tolumaa,

⁴ mịẹtẹ ini iriawọ ma kẹ ịna diapụ na ịna awọmẹ na ḅẹlẹma ḅẹ ḅara kẹ in toluma pakama-ḅoo,

⁵ ịn pịkị ḅụụ ọlọ na kpaịn ḅara na sime tẹ iḅiọkụ diapụ warị ḍikiḍikiarị ereme sọ tẹ sịḅị-tuu ịna diapụ pịrịị, mịẹtẹ gbọrụḅọ-sọ ḅarị Tamụnọ ḅara ḅo oku mẹ ḅụ siye ḍuko ḅịa ḅara.

⁶ Anị gbọrụ ḅara mẹ ḅụ ḍuko kụrọma asawọ ma pịrị tẹ ini ịna ḅụụ ọlọ.

⁷ Ma mamgba ḅụ ị́yẹrị ḅioju in ḍiki tẹ iḅi ḍumo kọn ḅarị ḅọ sọọ. Í ye-tolumarị sakị, aka na epele na ofori ḅara na, anị ị́ tẹmẹ-la wararị ḅara na kẹ tolumaa.

⁸ Ẹkwẹn mgbọ mgbọ ma tẹ ị́ kẹ ẹkwẹn ḅụ suuarị aị ma yela aị sọọ, kịnị inetẹ kura-aye ḍọkị-ẹrị ḅịa ḅara, anie si kẹ ị́ tọn apụ ma ḅụụ-jịrị ḅarị ḅara, ini ị́ ḅụụ ḍuko ḅẹ siye ḅarị ofori sakị.

⁹ Omoni ma, ịn sịḅị-tuu ịn nyana apụ pịrịị, tẹ ịna ḅụụ ḅẹlẹ ḅẹ ye mịẹ, ye goyegoye ḅụ. Ini ịna ḅịḅị pakịrị ma,

¹⁰ pịkị ịna aị furu ma. Anie nakara, sakị mamgba ịn mịẹtẹ ini ẹrị mịnẹ ini iḅi atomi, pịkị ḅioḅẹngbọ kẹ ḅụụ ḅụ gbana na-iḅi apụ, mịẹtẹ ịn mịẹarị ye, mịẹarị ye ḅụ tomi Tamụnọ, wamịna Ḅọrọmaḅọ ḅe gbolomaye tẹ wa tolumarị ye mẹ tokini ḅarị ḅara.

¹¹ Kẹ gotẹ ọkọ ḍukoarị, Tamụnọ ọ̀ kẹ tomi mamgba ḅọrọma ḅẹ ḍiki-ḅụụjịrị mịẹfinji tẹ.

¹² Anị ḍiki-ḅụụjịrị mẹ wa tolumarị mịnẹ wa Tamụnọ nimi-a ḍumo na tomikiri ḅẹ aị na gotẹ lẹlẹ akuroma na ḅụ ḅara-siin, tẹ ḅụụ ọlọ na, kịnị mingirima-a na, Tamụnọ nimi na ḍumo kọn, mị tomikiri ḅụ,

¹³ anie wa sime tẹ wa kẹ ḅiokpọmarị bomatẹ Ene mẹ koruarị sakị mẹ, tẹ wamịna opu Tamụnọ ḅe na wamịna Ḅọrọmaḅọ Jizọsị Kịrayịsị ḅe na ebube mẹ tolu paka ḅarị sakị mẹ.

¹⁴ Ọ̀ wa gotẹ ọ̀ ḅụụ saakị pịrịm, tẹ si-sịḅịḅio mẹmgba ḅụ wa pụkọ-pakamaḅo, tẹ wa mịẹtẹ wa kpaịntẹ atomi sọ tẹ sime ori kịngẹ pịrị, tẹ iḅiye ngẹrị mịẹ ḅẹ ḅio-sẹsẹ nyana.

¹⁵ Mịna aị ma toluma, tẹ ị́ nyana kụrọ mẹmgba kẹ mịẹye ḅụ suu, í í pokiarị apụ ma ḅiokpọmarị sakị na, í in ḍiki ịganịarị sakị na. Ḍụkụ tẹ gbọrụḅọ sọ í ḍiki-iderima ma.