Suku-saakị 44 - FỊAFỊA BAỊBỤLỤ

Ịn Josẹfụ Minji ḅuu Kọpụ Kẹ Ḅọịm

¹ Anịtẹso ọ̀ nwẹnị tọn ọ̀ warị mẹ ḅẹ ḅio-koru fịrịmẹnjịḅọ pịrị, “Fịye kẹ tomi ma akpa ma ḅio sụa, sụa ḅinmaa, ini inetẹ dogi ḅarị ḅara tẹ ọrụḅọ-ọrụḅọ igbigi kẹ mḅọ akpa ḅịḅị ḅụ sụa.

² Ì seleḅa minji-ḅuuye mẹ kẹ ịrụ-tẹịn ḅọ ḅe akpa ḅịḅị ḅụ sụa na pịkị ọ̀ kẹ fịye mẹ fẹẹ ḅẹ igbigi mẹ.” Tẹ ò Josẹfụ ḍuko ọ̀ pịrị ḅara mịẹm.

³ Ene mẹ paa pụkẹẹ finji gbọrụ sakị mie ịn tomi ma na, ịna yedogi-anama ma na fịrịma pakama ye.

⁴ Ini opu ama mẹ ḅụ mẹnjị so tẹ paa kẹlẹ mu tẹso, Josẹfụ nwẹnị ò ḅio-koru fịrịmẹnjịḅọ ḅe ḅẹẹ, “Saakịị, arị owiapụ ma ḍukaa, tẹ í mu ịn la sakị, ịn gbelaa ‘Ó tiegotẹ si kẹ iḅi gbẹẹ? Ó tiegotẹ ì seleḅa minji-ḅuuye mẹ furu ọkị?

⁵ Miemẹ anie ị̀ nyanaḅọ kẹ minji ḅuuarị, tẹ pịkị kẹ iru sararị ye mẹ anị-a? Ọ́ nwẹn mịẹ ye mẹ ó kura-aye mịẹ tẹ.’ ”

⁶ Ò mu ịn la tẹso, ọ̀ mịna ẹkwẹn-aḅịḅị ma kọn ịn pịrịm.

⁷ Ịn nwẹnị ọ̀ pakịrị, “Wa nyanaḅọ ḅe tiegotẹ nwẹn sime ẹkwẹn-aḅịḅị kọn? Iḅieri, mịnẹ ị́ afịrịmẹnjịapụ ọkọsime ye mịẹ ḅarị mẹ.

⁸ Ḍikii, anị igbigi mẹ tẹ wa wamịna akpa ḅịḅị ḅụ ḍọkị-ẹrị ye mẹ Kenanị ḅụ, wa kọkọ anị pịkịma-ḅo ị́ pịrị; wa anịtẹrẹmẹ tọ-ḅara kẹ ị́ nyanaḅọ ḅe warị ḅụ seleḅa, anịanịa golu furu ọkị ḅẹ?

⁹ Ị́ afịrịmẹnjịapụ ma ḅụ, ḅẹḅọ-ḅẹḅọ tẹ ị́ ḅara ḅụ anị ḍọkị ẹrị ḅọ ẹrị ḅọ, yee anị ḅọ mẹ fịị, tẹ wamịnị sọ wa nyanaḅọ ḅe omoniapụ sọ.”

¹⁰ Ori nwẹnị pakịrị, “Yee anị ị́ ḅẹẹ ḅara sime; anị ḅọ mẹ tẹ anị ḅara ḅio paka-ḅo ḅarị ḅọ mẹ ì omoniḅọ sọ ḅa, anịsakị ye ḅarị ọmịna ḅụ kirikọn-apụ ma ọlọ ḅịa.”

¹¹ Anịtẹso owiḅọ go ḅọ, go ḅọ sarama amịna akpa iderima kiri-ḅio koromam, tẹ ọrụḅọ-ọrụḅọ mḅọ akpa finjim.

¹² Josẹfụ ḅio-koru fịrịmẹnjịḅọ ḅe omongi-tẹịn ḅọ ḅe akpa mẹ ḅio ḍọkị kẹ suku-saakịm, tẹ ḍọkị ma-mu ịrụ-tẹịn ḅọ ḅe akpa mẹ kẹ kunomam, tẹ Benijamịnị akpa ḅio minji-ḅuuye mẹ ḍọkị-ẹrịm.

¹³ Anịtẹso ịn nwẹnị ịna akapa nụnụ-nụnụ kan, tẹ ọrụḅọ-ọrụḅọ amịna nye kẹ mḅọ yedogi-nama ọgọnọ gbana, tẹ ịn pịkịma-so opu ama mẹ mum.

¹⁴ Juda na ori owiapụ-amịnapụ na ḅo Josẹfụ warị la sakị ọ̀ paa anịanga (warị ḅio) emi, tẹ ịn nwẹnị ọ̀ tọrọkọ ḅịkị kiri-ḅio koro;

¹⁵ tẹ Josẹfụ nwẹnị ịn ḅẹẹ, “Miemẹ tẹ ọ́ mịẹ ye mẹ anie tọ mịẹ ye? Ó nimi-a mịnẹ à sime-ḅara sime owiḅọ inetẹ piki-pikiye-ofori ḅara ḅụ iru sara ḅẹ?”

¹⁶ Juda nwẹnị pakịrị, “Wa tiye ḍuko ị̀ nyanaḅọ pịrị ḅẹ? Wa tiye ẹkwẹn ḅẹ? Anịanịa, ndẹẹ wa wamịna-aḅụụ fima ḅarị ḅara? Tamụnọ ị́ afịrịmẹnjịapụ si mẹ pakama ama ḍie tẹ; ḍikii, wamịnị na oriḅe tẹ minji-ḅuuye mẹ ḅara ḅụ paka-ḅo ḅọ ḅe na sọ ḅo ị̀ nyanaḅọ ḅe omoniapụ sọ tẹ.”

¹⁷ Kụma Josẹfụ nwẹnị pakịrị, “Iḅieri, mịnẹ yẹrị ọkọ mịẹ ḅarị mẹ! Owiḅọ ḅe tẹ ịn ḅara ḅụ minji-ḅuuye mẹ ḍọkị-ẹrị ḅọ ḅe ngẹrị mie ì omoniḅọ sọ ḅarị ḅọ! Kụma ọmịnị kirikọn-apụ, ó dein na so ọmịna ḍaḅọ ḍọkụma-muu.”

Juda Benijamịnị Gotẹ Ịgbanịm

¹⁸ Anịtẹso Juda nwẹnị so Josẹfụ dama-mu tẹ ọ̀ ḅẹẹ, “yei ị̀ nyanaḅọ, àrị ị́ tẹkẹm, minini ị́ fịrịmẹnjịḅọ pịrịị, arị ẹkwẹn gbọrụmgbọ kọn ị̀ nyanaḅọ ḅe ḅeri ḅio ḅụ, anịsakị yee ị́ ịganị kọrị ị́ fịrịmẹnjịḅọ ḅe dọkịma ma kẹ gotẹ ọkọ ḅẹẹarị, ị́yẹrị ḅe anie gbala Fero ḅe ḅioju.

¹⁹ Ị̀ nyanaḅọ ḅe ori afịrịmẹnjịapụ gbelam, ‘Ọmịna ḍaḅọ, anịanịa ọmịna jen iyimbere emi?’

²⁰ Tẹ wa nwẹnị ị̀ nyanaḅọ ḅe pakịrị, ‘Wamịna ḍaḅọ tẹ omongitẹ ḅọ emi pịkị kala iyimbere, ori omongi sakị ḅẹ tụḅọ. Ori iyimbere fịị tẹ, anịsakị ò iyingi iyi awọmẹ ḅụ ori ngẹrị kọnm, tẹ ọ̀ ḍa ọ̀ ḅẹlẹmam.’

²¹ Anịtẹso ị́ nwẹnị ị́ afịrịmẹnjịapụ ḅẹẹ, ‘Ọmịnị ori ọkị-ḅo ị̀ pịrịị, mịẹtẹ arị ị̀ atọrụngbọ kẹ ori ẹrị ḅarị ḅara.’

²² Wa nwẹnị ị̀ nyanaḅọ ḅe pakịrị, ‘Kalatụḅọ ḅe ori inetẹ ọ̀ ḍa koroma-so ḅẹ ọkụ ofori, kẹ gotẹ ọkọ ḅẹẹarị, ori nwẹnị ọ̀ ḍa koroma-so ọkụma, ọ̀ ḍa ḅe ọ̀ fịị ḅa.’

²³ Anịtẹso ị́ nwẹnị ị́ afịrịmẹnjịapụ ḅẹẹ ‘Ọmịna iyimbere ịrụ-tẹịn ḅọ ḅe ọmịnị na ḅo sikima, ọ́ ḅarị jen-maaịn kẹ ị́ tọrụkuḅu ẹrị ḅịa.’”

²⁴ “Wa pịkịma-so ị̀ ḍa, ị́ fịrịmẹnjịḅọ ḅe ḍọkụma-mu tẹso, wa ị̀ nyanaḅọ ḅe ẹkwẹn-aḅịḅị ma ḍuko ọ̀ pịrịm.

²⁵ Tẹ wamịna ḍaḅọ, ‘Ọ́ pịkị siin mu fịye kalịye fẹẹ ḅoo’ kẹ wa ḅẹẹ tẹso,

²⁶ wa ḅẹẹm, ‘Wamịna ịrụ-tẹịn iyimbere ḅe wamịnị na mu-mu, anịrẹ wa mu ḅa, anieofori wa inetẹ mu ḅịa. Wamịna ịrụ-tẹịn iyimbere ḅe wamịnị na emi sikima, wa inetẹ owiḅọ ḅe tọrụkuḅu ẹrị ḅịa.’

²⁷ Anịtẹso wamịna ḍaḅọ ị́ fịrịmẹnjịḅọ ḅe nwẹnị wa ḅẹẹ, ‘Ó nimi wararị ị̀ ta maa owiapụ-awọmẹ iyi ị̀ pịrịm;

²⁸ gbọrụḅọ ì koroma-som, tẹ à ḅẹẹm, Tụkụma ḅara ḅụ ini ọ̀ kanị-kọsịma tẹ, tẹ Anịngẹ-kụraḅio à ḅarị gbala-gbala ori ẹrị-a.

²⁹ Ọ́ nwẹnị ị̀ ḅara ḅụ pịkị ḅị gbọrụḅọ ḅe sọ ọkị tẹ ye ọ̀ la-laa, anị kururu ḅụ mịẹtẹ à fị ḅa.’”

³⁰ “Anịẹrẹsị à nwẹnị mịọkụ ị̀ ḍa ị́ fịrịmẹnjịḅọ ḅe ḍọkụma-ḅo tẹ kalatụḅọ ḅe wamịnị na ofori, tẹ ori ẹrịm mịnẹ kalatụḅọ ḅe wamịnị na ofori — gbala ò ḍumo mẹ kalatụḅọ ḅe ḍumo na fịnama wararị ẹrẹsị,

³¹ ori ẹrịm mịnẹ kalatụḅọ ḅe wamịnị na ofori gbọrụ-kirikiri ọ̀ fịị ḅa; tẹ wamịnị ị́ afịrịmẹnjịapụ ma mịẹtẹ wamịna omongitẹ ḍaḅọ ḅe kururu ḅụ fịị ḅa.

³² Kẹ gotẹ ọkọ ḅẹẹarị, ị́ fịrịmẹnjịḅọ ḅo kalatụḅọ ḅe onyo-sẹịnḅọ sọ ị̀ ḍa pịrịm, tẹ ḅẹẹm, ‘Àrị ọ̀ pịkịma ḅo ị́ pịrị-a ḅẹḅẹ, yee ị̀ ḍa tọrọkọ ḅụ ḅẹrẹ-ḅarasii ị̀ ọlọ, ì ḍumo-ene mamgba ḅụ.’

³³ Anịẹrẹsị mịọkụ àrị ị́ tẹkẹm, yee kalatụḅọ ḅe nakara ị́ fịrịmẹnjịḅọ omoni mẹ sọ tẹ sime ị̀ nyanaḅọ ḅe pịrị; tẹ yee kalatụḅọ ḅe ori owiapụ-amịnapụ ma na pịkịma-so.

³⁴ Kẹ gotẹ ọkọ ḅẹẹarị, ndẹẹ kalatụḅọ ḅe ị̀ na ofori ọkụma à pịkịma-so ị̀ ḍa ḍọkụma-mu ḅarị ḅara? Siye mẹ tẹ ḅo ị̀ ḍa ḅe la ḅarịye mẹ ẹrị ị̀ ḅalafamarị.”