Suku-saakị 4 - FỊAFỊA BAỊBỤLỤ

Keni Na Ebẹlị Na

¹ Mịọkụ Adamụ ọ̀ ta Ivu na gbolomam, tẹ á fura tẹ Keni iyim. Á nwẹnị ḅẹẹ, “KỊNỊNYANAḄỌ ḅe ḅarasụa ḅụ à gbọrụ owiḅọ iyi tẹ.”

² Sakị kẹlẹ ḅọrọ tẹso, á pịkị ori iyimbere Ebẹlị iyim. Ebẹlị anie anana ḍikiḍikiḅọ, anịsakị Keni anie ḍụọ-kọrịḅọ

³ Sakị kẹlẹ ḅọrọ tẹso, Keni ọ̀ ḍụọ mẹ ḅio ò soku ḅo fịaị kẹ ḅo agba mịẹ KỊNỊNYANAḄỌ ḅe pịrịm,

⁴ tẹ Ebẹlị pịkị ori anana ma ḅẹ tarị iyi aị ma ḅẹ jaị ḅụ ḅẹlẹkị sụa apakịrị ma ọkị-ḅo KỊNỊNYANAḄỌ ḅe pịrịm. KỊNỊNYANAḄỌ ḅe nwẹnị Ebẹlị na ọ̀ mịẹ agba mẹ na daa-ọkị;

⁵ kụma Keni na ọ̀ mịẹ agba mẹ na ọ̀ daa-ọkịa. Mie ḅụ Keni nwẹnị ịganị lama, tẹ tọrụ-fụrụma.

⁶ KỊNỊNYANAḄỌ ḅe nwẹnị Keni ḅẹẹ, “Í tiegotẹ ịganịarị, anịsakị ị́ tọrụ tiegotẹ fụrụ?

⁷ Ị́ iḅiọkụ mịẹ kụma, arị ị́ daa-ọkị ḅịa? Anịsakị ị́ iḅiọkụ Mịẹ-a ḅẹḅẹ, si ị́ ḅọkọ anga kpụmbụlụ sime wararị; anị ḅiiarị ị́ anị ḅii ye, ḅii ye mịẹ, kụma ị́ anị nẹngịma nyanam.”

⁸ Keni nwẹnị ori iyimbere Ebẹlị ḅẹẹ, “Yee wa paka-so piri-ḅio mu.” Ịn piri mẹ ḅio simearị ogbo, Keni nwẹnị saakị tẹ owu kẹ ori iyimbere Ebẹlị paka tẹ ọ̀ ḅaa.

⁹ Anịtẹso KỊNỊNYANAḄỌ ḅe nwẹnị Keni gbela, “Í iyimbere Ebẹlị ọ̀ tọ-anga emi?” Ọ̀ nwẹnị pakịrị, “À nimi-a; yẹrị ḅọrọ ì iyimbere ḅe ḍikiḍikiarị?”

¹⁰ KỊNỊNYANAḄỌ ḅe nwẹnị ḅẹẹ, “Í tiegotẹ nwẹn sime ye mịẹ? Í iyimbere ọmbie mẹ pọkọ kiri mẹ ḅio sime tẹ owu ị̀ pịrịarị.

¹¹ Anịsakị mịọkụ kiri mẹ tẹ amịna ḅịḅị finji tẹ ị́ ḅara ḅụ í iyimbere ḅe ọmbie mẹ daa-ọkị ye mẹ ḅụ í wori tẹ.

¹² Í kiri mẹ tẹkẹ ma tẹ fịye ḍiḅi sakị, ḍiḅi sakị anị ḅarị amịna ịnyọ pakama-ḅo ị́ pịrị ḅịa. Tomikiri mẹ ḅụ ị́ karakara nimi-a ḅọ sọ tẹ ikelekelema-ḅọrọ ḅa”.

¹³ Keni nwẹnị KỊNỊNYANAḄỌ ḅe ḅẹẹ, “Ì fomu-ḅara mẹ ḍụḅa àrị inetẹ dogi ḅẹ ḅara nẹngịm.

¹⁴ Ḍikii, mị gbọrụ ene mẹ ḅụ í kiri mẹ ḅụ ì dee-siin tẹ, anịsakị à pịkị ị́ tọrọkọ ḅụ ị̀ ḅụụ ḅọị ḅa; tẹ karakara nimi-a ḅọ sọ tẹ tomikiri mẹ ḅụ ikelekelema-ḅọrọ ḅa, anịsakị ị̀ ẹrị ḅọ ẹrị ḅọ nwẹnị ị̀ ḅaa ḅa.”

¹⁵ Anịtẹso KỊNỊNYANAḄỌ ḅe nwẹnị ọ̀ ḅẹẹ, “Ọkọ-a, ḅẹḅọ-ḅẹḅọ tẹ Keni ḅaa ḅọ ḅaa ḅọ, sọnọma apụ Keni sịḅị ḅẹ gbẹẹfị ḅụ fịị ḅa.” Tẹ KỊNỊNYANAḄỌ ḅe nwẹnị elekima kẹ Keni oju ḅụ pakama, mịẹtẹ ḅẹḅọ-ḅẹḅọ tẹ ḅo ori na donia ḅọ, donia ḅọ ọ̀ ḅaa ḅịa ḅara.

¹⁶ Anịtẹso Keni KỊNỊNYANAḄỌ ḅe tọrọkọ ḅụ mẹnjị-som, tẹ mu Ideni sin anga mẹ ḅẹ ịrụa-saakịarị-anga ịn kẹ Nọdị sịn anga ḅụ angam.

Keni Furo-ḅẹ-apụ Ma

¹⁷ Keni ọ̀ ta na gbolomam, tẹ á fura tẹ Ẹnọkụ iyim; tẹ ọ̀ nwẹnị gbọrụ opu ama pakama, tẹ nwẹnị ori owiḅọtụḅọ ḅe ẹrẹ kẹ anị koro — Ẹnọkụ.

¹⁸ Ịn nwẹnị Iradị iyi Ẹnọkụ pịrị, anịsakị Iradị anie Mẹhujahẹlị ḍa, anịsakị Mẹhujahẹlị anie Mẹtusẹla ḍa, anịsakị Mẹtusẹla anie Lamẹkị ḍa.

¹⁹ Lamẹkị nwẹnị maa ereme sime, ini ḅẹ gbọrụḅọ ẹrẹ anie Ẹda, anịsakị osi-ḅọ ma ẹrẹ anie Zila.

²⁰ Ẹda, Jebalị iyim; ori anie inima tẹ opu anama ḍikiḍikitẹ akpụrụ-awarị pike-pike tẹ angarị apụ ma.

²¹ Ori iyimbere ẹrẹ anie Jubalị anie inima tẹ nume-suapụ ma na, ọbọ farị apụ ma na, ye ofuro apụ ma na ḍaḅọ.

²² Zila, Tubalikeni iyim; ori anie ojo na, ikulele na kẹ kịrị-kịrị akọrịnama-kọrịaị tẹmẹḅọ Tubalikeni ịyịmbara anie Nahama.

²³ Lamẹkị nwẹnị ori ereme ma ḅẹẹ: “Ẹda na, Zila na, ọmịnị ị̀ pọkọ naa; ọmịnị Lamẹkị ereme, ọmịnị à ḍukoarị ye pokii; à gbọrụ owiḅọ ḅaa tẹ, ò ye kẹ ì lamam ẹrẹsị; gbọrụ asatụḅọ, ori ị̀ ḅakụm ẹrẹsị.

²⁴ Sọnọma apụ nwẹnị Keni sịḅị ḅẹ gbẹẹfị ḅụ fị-fịị, karakara-ḅara-ḅụ Lamẹkị sịḅị anie tẹra apụ fa kịnị inia si.”

Sẹtị Na Ẹnọsị Na

²⁵ Adamụ nwẹnị pịkị sin ọ̀ ta na gboloma, tẹ á nwẹnị gbọrụ owiḅọtụḅọ iyi, tẹ ẹrẹ kẹ ọ̀ sịn Sẹtị, anie árị mẹẹ, “Keni ḅaa Ebẹlị ḅe kiri ḅụ Tamụnọ jụmọ tọn ị̀ pịrị tẹẹ.”

²⁶ Ịn nwẹnị pịkị gbọrụ owiḅọtụḅọ iyi Sẹtị pịrị, tẹ ọ̀ nwẹnị ẹrẹ kẹ ọ̀ sịn Ẹnọsị. Anị sakị ḅụ mie tomi saakị KỊNỊNYANAḄỌ ḅe ẹrẹ sịn ye.