Suku-saakị 11 - FỊAFỊA BAỊBỤLỤ

Tomi Babịlọnị Ḅụ Geletẹ-warị Namam

¹ Mịọkụ bebe tomikiri mẹ gbọrụ ama ḅẹ ḅịḅị fiem, tẹ boowa ẹkwẹn-aḅịḅị nyanam.

² Tomi ịrụa-saakịarị-anga mẹ ḅụ mẹnjị ikelema-koroarị ogbo, ịn nwẹnị Babịlonịya nwẹn-sịn anga ḅụ tụndụ ofori lẹsẹrẹtẹ ye-yọ ḍọkị-ẹrị tẹ anịjụ koro anga.

³ Ịn nwẹnị jụmọ-jụmọ ḅẹẹ, “Ó ḅoo, yee wa biriki tẹmẹ tẹ iḅiọkụ arị fọị ẹkẹkẹ sọma.” Tẹ ịn nwẹnị kẹ ye nama ḅẹ biriki tẹmẹ, nwẹnị pịkị ịn kẹ Ta sịn-arị kurukurutẹ ye-oḅoloye nyana.

⁴ Anịtẹso ịn nwẹnị ḅẹẹ, “Ó ḅoo, yee wa gbọrụ opu ama nama wamịna-aḅụụ pịrị, na pịkị sịḅị mu so la tẹ gbọrụ kụrọtẹ gele-warị na, tẹ ẹrẹ nyana wamịna-aḅụụ pịrị, anieofori wa ḅofa bebe tomikiri tọrụ mẹ ḅụ gala-gala ọrụ-jụjụ da.”

⁵ Anịtẹso KỊNỊNYANAḄỌ ḅẹ nwẹnị ideri opu ama mẹ na, kụrọtẹ gele-warị mẹ na ḍiki ḅẹ ḅo, arị aị ma tẹ tomina owiapụ-awọmẹ ma nama tẹ aị ma.

⁶ Tẹ KỊNỊNYANAḄỌ ḅe nwẹnị ḅẹẹ, “Ḍikii, mịna tomi ma inimgba gbọrụ atomi, tẹ inimgba pịkị gbọrụ ama ḅẹ ḅịḅị fiearị; anịsakị miemẹ anie ịn tọrọkọ-jụ mịẹ ḅẹ aị ma ḅẹ suku-saakị. Ala-a ịn inetẹ ịn mịẹ ḅẹ tẹ tọn ye goyegoye mịẹ ḅa.

⁷ Ó ḅoo, yee wa ideri-mu tẹ anịjụ ịna ama ḅẹ ḅịḅị mẹ pikirima, mịẹtẹ ịn ḅarị jụmọ-jụmọ kọn ẹkwẹn fie ye naa ḅịa ḅara.”

⁸ Mị-ḅara mie KỊNỊNYANAḄỌ ḅe kẹ ịn gala-galama tomikiri tọrụ mẹmgba ikelema-koro ḅara, tẹ ịn nwẹnị opu ama mẹ nama mẹ wẹrịso.

⁹ Anịẹrẹsị ini ẹrẹ kẹ anị sịnm Babẹlị, gbala anịjụ mie KỊNỊNYANAḄỌ ḅe tomikiri mẹmgba ama ḅẹ ḅịḅị mẹ pikirima ye ẹrẹsị; anịsakị ḅụ mie KỊNỊNYANAḄỌ ḅe ịn gala-galama tomikiri tọrụ mẹmgba ikelema-koro ye.

Sẹmụ Furo-ḅẹ-apụ Ma

¹⁰ Mịna apụ ma anie Sẹmụ furo-ḅẹ-apụ ma. Opu minji mẹ ḅọrọ tẹ maa akụra ḅọrọ tẹso, Sẹmụ sịḅị kụra sọnọa asi lam, tẹ ori Apakịsadị iyim;

¹¹ tẹ Sẹmụ Apakịsadị iyi tẹso, ọ̀ kụra gbọrụ ẹndẹ na sọnọa asi finji (500) kẹ ḍumo-sime tẹ ja owiapụ-awọmẹ na eremịna-awọmẹ na iyim.

¹² Kụra suei sọnọa akụra finji (35) Apakịsadị sịḅị ḅọrọ tẹso, ọ̀ Sẹla iyim;

¹³ tẹ Apakịsadị Sẹla iyi tẹso, ọ̀ kụra gbọrụ ẹndẹ na tẹra akụra finji (403) kẹ ḍumo-sime tẹ ja owiapụ-awọmẹ na, eremịna-awọmẹ na iyim.

¹⁴ Kụra suei (30) Sẹla sịḅị ḅọrọ tẹso, ori Ẹba iyim;

¹⁵ tẹ Sẹla Ẹba iyi tẹso, ọ̀ kụra gbọrụ ẹndẹ na tẹra akụra finji (403) kẹ ḍumo-sime tẹ ja owiapụ-awọmẹ na, eremịna-awọmẹ na iyim.

¹⁶ Kụra suei inia akụra finji (34) Ẹba sịḅị ḅọrọ tẹso, ọ̀ Pẹlẹgị iyim;

¹⁷ tẹ Ẹba Pẹlẹgị iyi tẹso, ọ̀ kụra gbọrụ ẹndẹ na suei finji (430) kẹ ḍumo-sime tẹ ja owiapụ-awọmẹ na, eremịna-awọmẹ na iyim.

¹⁸ Kụra suei (30) Pẹlẹgị sịḅị ḅọrọ tẹso, ò Rehu iyim;

¹⁹ tẹ Pẹlẹgị Rehu iyi tẹso, ọ̀ kụra oyia asi na esenia akụra finji (209) kẹ ḍumo-sime tẹ ja owiapụ-awọmẹ na, eremịna-awọmẹ na iyim.

²⁰ Kụra asuei maa akụra finji (32) Rehu sịḅị ḅọrọ tẹso, ò Sẹrugu iyim;

²¹ tẹ Rehu Sẹrugu iyi tẹso, ọ̀ kụra oyia asi na sọnọma akụra finji (207) kẹ ḍumo-sime tẹ ja owiapụ-awọmẹ na, eremịna-awọmẹ na iyim.

²² Kụra suei (30) Sẹrugu sịḅị ḅọrọ tẹso, ọ̀ Nahọ iyim;

²³ tẹ Sẹrugu Nahọ iyi tẹso, ọ̀ kụra oyia asi (200) kẹ ḍumo-sime tẹ ja owiapụ-awọmẹ na, eremịna-awọmẹ na iyim.

²⁴ Gbọrụ kụra fa kụra asuei (29) Nahọ sịḅị ḅọrọ tẹso, ò Tera iyim;

²⁵ tẹ Nahọ Tera iyi tẹso, ọ̀ gbọrụ kụra fa kụra sonioa asi (119) kẹ ḍumo-sime tẹ ja owiapụ-awọmẹ na eremịna-awọmẹ na iyim.

²⁶ Kụra atesi oyi finji (70) Tera sịḅị ḅọrọ tẹso, ori Ebiramụ na Nahọ na Eranị na iyim.

Tera Furo-ḅẹ-apụ Ma

²⁷ Mịna apụ ma anie Tera furo-ḅẹ-apụ ma. Tera anie Ebiramụ na, Nahọ na, Eranị na ḍaḅọ; anị sakị Eranị anie Lọtị ḍa.

²⁸ Eranị ọ̀ ḍa Tera ḍumo wararị ogbo fịịm, Kalidisi (Babịlonịya) ḅẹ opu ama Họ ini ori iyi ama ḅụ.

²⁹ Ebiramụ na, Nahọ na nwẹnị ere-sime; Ebiramụ ta ma ẹrẹ anie Sẹrayị, anịsakị Nahọ ta ma ẹrẹ anie Milika, Eranị ẹrẹḅọtụḅọ ma, ori anie pịkị Isika ḍa.

³⁰ Sẹrayị furo pụnm; árị inetẹ awọ iyi-a.

³¹ Tera nwẹnị ori owiḅọtụḅọ Ebiramụ na, ò taa-owiḅọtụḅọ Lọtị anie Eranị owiḅọtụḅọ ḅe na, ò fụanḅọ Sẹrayị anie Ebiramụ ta na ọkị, tẹ ịn nwẹnị gbolomatẹ Kalidisi (Babịlonịya) ḅẹ opu ama Họ ḅụ saakị so Kenanị ama mẹ mu. Kụma ịn ḅo Eranị nwẹn-sịn ama mẹ la tẹso, ịn nwẹnị anịjụ koro-sime.

³² Tera sịḅị ḅọrọ aḍin anie kụra oyia asi na sọnọa akụra finji (205); tẹ Tera Eranị ḅụ fịịm.