Rufu 2 - FỊAFỊA BAỊBỤLỤ

Rufu Mu Bohazi Ḍụọ Ḅio Kọrịnama Kọrịm

¹ Mịọkụ Nahomi gbọrụ mịnaḅọ nyanam, á di Ẹlịmẹlẹkị furo mẹ ḅẹ ḅọ, ngọ-kọn wararị tomḅọ, oriḅe ẹrẹ anie Bohazi.

² Gbọrụ ene ḅụ, Rufu, Mohabụ ḅẹ ẹrẹḅọ ma nwẹnị Nahomi ḅẹẹ, “Sisi ḍụkụ ị̀ pịrị tẹ à ḍụọ mu, tẹ oriḅe tẹ à tọrụ ḅụ ḍiki-ḅụụjịrị ḍọkị-ẹrị ḅarị ḅọ ḍukamẹnjị tẹ sịn mgbọlị ma ogboku ḅara-kọnma-aị ma kolokolo.” Nahomi nwẹnị á ḅẹẹ, “Ị̀ ẹrẹḅọtụḅọ, inetẹ mu ḅa.”

³ Anieḅụ á nwẹnị saakị paka ḍụọ mu, tẹ fịye-sokuapụ ma ḍukamẹnjị-mẹnjịtẹ ḅara-kọnma-aị ma kolokolo ḍụọ mẹ ḅio; tẹ So tọn ḅara ḅụ, á nwẹnị ḅo sime Bohazi, Ẹlịmẹlẹkị furo-ḅẹ-ḅọ ḅe ḍụọ mẹ la.

⁴ Anị gbọrụ-kirikiri, Bohazi nwẹnị Bẹtịlịhẹmụ ḅụ sime tẹ ḅo la; tẹ sịn-ḅịḅị kẹ fịye-sokuapụ ma pịrị tẹ ḅẹẹ, “KỊNỊNYANAḄỌ ḅe ọmịnị na simee!” Ini nwẹnị pakịrị, “KỊNỊNYANAḄỌ ḅe í bomaa.”

⁵ Anịtẹso Bohazi nwẹnị ọ́ fịrịmẹnjịḅọ ḅe tẹ fịye-sokuapụ ma ḍikiḍikiarịḅọ ḅe gbela, “Mie tụḅọ ẹrẹḅọtụḅọ?”

⁶ Fịrịmẹnjịḅọ ḅe tẹ fịye-sokuapụ ma ḍikiḍikiarị ḅọ ḅe nwẹnị pakịrị, “Árị anie Mohabụ ḅẹ ẹrẹḅọtụḅọ ma tẹ Nahomi ḅụụ sọ tẹ Mohabụ ḅẹ sịẹ mẹ ḅụ ọḅụ pịkị tẹ ḅo ḅọ ma.

⁷ Á ḅọ tẹ ì tẹkẹm à paa á wẹrịso tẹ á fịye-sokuapụ ma ḍukamẹnjị-mẹnjịtẹ puku-puku ma ogboku ḅara-kọnma-aị ma kolokolo tẹ arị kobiri. Anieḅụ dede-funfun kụra-ḅio á namakọrịarị; mịọkụ anie á kẹlẹ kẹ ịnyọsararị.”

⁸ Anịtẹso Bohazi nwẹnị Rufu ḅẹẹ, “Ị̀ ẹrẹḅọtụḅọ, mịọkụ pokii, mu jen ḍụọ ḅio ḅara-kọnma-aị kolokolo ma, anịanịa mị ḍụọ mẹ wẹrịso, kụma namakọrị ị̀ pịrịarị eremịna-awọmẹ ma na simee.

⁹ Yee ị́ atọrụngbọ ḍụọ mẹ tẹ ịn ḅara-kọnma-aị kolokoloarị ḍụọ mẹ ḅụ sime, tẹ ịn ḍukamẹnjịị. À tọn ị̀ asambịrịma owiapụ ma pịrị tẹ ini ị́ ḅụụ fụkama ma. Anịsakị minji ḅuu ị́ tarị tarị, mu minji-sụaye mẹ ḅio asambịrịma owiapụ ma ḍuu sara minji mẹ ḅuu.”

¹⁰ Anịtẹso Rufu nwẹnị sịḅị-tuu, tẹ á tọrụkuḅu kẹ ḅịkị kiri-ḅio koro, tẹ ọ̀ ḅẹẹ, “À tiegotẹ ị́ tọrụ ḅụ ḍiki-ḅụụjịrị ḍọkị-ẹrị, tẹ ị́ ị̀ kẹ elekima sụa na-iḅi, yẹrị igoniḅọ ḅẹẹ sakị?”

¹¹ Kụma Bohazi nwẹnị á pakịrị, “Í di fịị kụra-ḅio ị́ mịẹ í iyingi pịrị aị mamgba na, ị́ wẹrịtẹ ị́ ḍa na, í iyingi na, ị́ paka wararị ama na, wẹrịso tẹ tarị ḅụ tomi tẹ amụ í nimi-a apụ ḍọkụma-ḅo ḅara mẹ ịn ḅintẹ ḅara kẹ arị ḍuko ị̀ pịrị tẹ.

¹² KỊNỊNYANAḄỌ ḅe ị́ mịẹ ḅara mẹ mịẹ ị́ pịrịị, anịsakị KỊNỊNYANAḄỌ ḅe, Izirẹlịapụ tẹkẹarị Tamụnọ ḅe ḅintẹ gbẹẹ-ye kẹ ị́ pịrịị, oriḅe tẹ í ḅo warị-ḅọkọ kẹ suha ḅọ ḅe.”

¹³ Anịtẹso á nwẹnị ḅẹẹ, “Ị̀ nyanaḅọ, ị́yẹrị ḍiki-ḅụụjịrị nyana ị̀ pịrị tẹịnm, kẹ gotẹ ọkọ ḅẹẹarị, ị́ ì ḅiokpọma tẹ, pịkị iḅi ẹkwẹn kọn ị̀ pịrị tẹ, yẹrị ị́ afịrịmẹnjị-ereme ma ḅụ ḅẹ gbọrụḅọ-sọ na gbasị-a nwẹn ḅẹsọ.”

¹⁴ Fịye fị sakị ḅụ Bohazi nwẹnị á ḅẹẹ, “Mịanga ḅoo, tẹ fịye fịị. Ị́ inetẹ anị paịn-paịntẹ kẹ ọḍụ fụlọ mẹ gbọn-gbọn-fị ḅa.” Anieḅụ á nwẹnị fịye-sokuapụ ma akaka lẹgị tẹ ọ̀ nwẹnị fịturu ḅọrọma mu á pịrị, tẹ á fịye fị nwenii á furo ḅinm, tẹ á pịkị fịye fị kọnmam.

¹⁵ Á saakị tẹ ḅara-kọnma-aị ma kolokolo ḅẹ tẹso, Bohazi nwẹnị fịrịmẹnjị-owiapụ ma mịẹ ḅẹ ye ḍuko ịn pịrị, tẹ ḅẹẹm, “Ọmịnị á wẹrịso tẹ puku-puku ma ogboku ḅụ sọ á ḅara-kọnma-aị kolokolo, anịsakị ọmịnị á ḅụụ-jịrịma ma.

¹⁶ Ọ́ fịna wararị apuku ma ḅụ sọ ye pịọnị-pịọnị pakama-ḅo koroma á pịrịị, tẹ arị wẹrịso tẹ á ḅo kolokolo, anịsakị ọmịnị á ḍiki ịganị ma.”

¹⁷ Anị ḅara ḅụ á ḍụọ mẹ ḅio ḅara-kọnma-aị kolokolo nwenii ene-ḅoḅirim; anịtẹrẹmẹ á mu á kolokolotẹ aị ma ḅụ mgbọlị ma fomu-fomu pakama-ḅom; anịsakị anị ịn kẹ Bali sịn fịye mẹ ḅẹ oyia kilogịramụ (10 kg) pembe ye lam.

¹⁸ Árị anị dogi ama mẹ ḅio sọ-mum; á nwẹnị á kolokolo ye kẹ á di iyingi ḍie, tẹ pịkị á fị furo ḅinmatẹ kọn wararị fịye mẹ sọ ọkị-ḅo á pịrị.

¹⁹ Tẹ á di iyingi nwẹnị á gbela, “Ị́ tọ-anga ḅụ ḅara-kọnma-aị kolokolo mịmgba? Anịsakị tọ-anga ḅụ í mu kọrịnama kọrị? Boma sime anịḅọ ḅe tẹ ị́ kẹ tọrụ gbarịma-a tẹ ị́ ḍiki-ḅụụjịrị ḅọ ḅe pịrịị.” Anieḅụ Rufu nwẹnị oriḅe tẹ á kọrịnama kọrị pịrị ḅọ ḅe ẹrẹ ḍuko á di iyingi pịrị tẹ ḅẹẹ, “Oriḅe tẹ mịmgba à kọrịnama kọrị pịrị owiḅọ ḅe ẹrẹ Bohazi nwẹn sịn ḅọ.”

²⁰ Nahomi nwẹnị á tụḅọ ta ma ḅẹẹ, “Oriḅe tẹ iḅi-yemịẹ-ḅara nyana ḍumo wararị apụ na fịtẹ-apụ ma na pịrị ḅo ḅe, KỊNỊNYANAḄỌ ḅe ḅụụ ḅo boma sime ọ̀ pịrịị!” Nahomi nwẹnị pịkị á ḅẹẹ, “Owiḅọ ḅe anie wamịna gbọrụ mịnaḅọ, wamịnị na kpekitẹịn-mịnapụ ma ḅẹ gbọrụḅọ.”

²¹ Rufu, Mohabụ ḅẹ ẹrẹḅọ ma nwẹnị ḅẹẹ, “Anie sikima, ori ị̀ ḅẹẹm, ‘Ị́ ị̀ afịrịmẹnjịapụ kpeki kpekitẹ ini akaka sime ḅa, nwenii ì fịye soku mẹ kụnụnụ ḅa.’ ”

²² Nahomi nwẹnị Rufu, á tụḅọ ta ma ḅẹẹ, “Í ori afịrịmẹnjị-ereme ma ḅụụ sọ tẹ ini na mu ḅara iḅim, Ị̀ ẹrẹḅọtụḅọ, anieofori jen ḍụọ ḅio ịn ḅofa ị́ ḅụụ-fụkama tọrọkọ jụụ.”

²³ Anieḅụ á Bohazi afịrịmẹnjị-ereme ma na kpeki-kpeki sime tẹ ḅara-kọnma-aị ma kolokolo nwenii ịn kẹ bali na witi na sịn afịaị ma soku mẹ kunomam, tẹ árị á di iyingi ma ḅụụ sọ tẹ árị na simem.