Rufu 1 - FỊAFỊA BAỊBỤLỤ

Ẹlịmẹlẹkị Na Ò Furo Na Mẹnjị-so Mohabụ Mum

¹ Alatẹ sakị ḅụ, Ḅẹrẹtọn-apụ ma Izirẹlị mẹ ḅio ḅẹrẹtọn-arị sakị, ama mẹ ḅio ịnụ pakam. Aniemẹ gotẹ, Juda ḅẹ Bẹtịlịhẹmụ ḅẹ gbọrụ owiḅọ ori na, ọ̀ ta na, ori maa owiapụ-awọmẹ na nwẹnị igoni ḅara kẹ so Mohabụ mu tẹ anịjụ anga.

² Ịn kẹ owiḅọ ḅe koro ẹrẹ anie Ẹlịmẹlẹkị, ịn kẹ ọ̀ ta kuro ẹrẹ anie Nahomi, anịsakị ịn kẹ ori maa owiapụ-awọmẹ ma kuro ẹrẹ anie Malọnị na, Kilọnị na: ini anie Juda ḅẹ Bẹtịlịhẹmụ-Ifirata ḅụ sime tẹ ḅo apụ. Ịn so Mohabụ opu sịẹ mẹ mu tẹ anịjụ angam.

³ Kụma Ẹlịmẹlẹkị, Nahomi di ḅe nwẹnị fịị, tẹ árị maa owiapụ-awọmẹ ma kọnma á pịrị.

⁴ Mịnapụ ma Mohabụ ḅẹ ereme simem; ini ḅẹ gbọrụḅọ ẹrẹ Ọpa, osi-ḅọ ma ẹrẹ Rufu. Ini anịjụ oyia akụra pembe ye simem,

⁵ tẹ Malọnị na Kilọnị na ini maa apụ ma nwẹnị fịị, anị ḅara ḅụ ẹrẹḅọ ma maa owiapụ awọmẹ na á di na fịị á koroma-som.

Nahomi Na Rufu Na Pịkịma-so Bẹtịlịhẹmụ Mum

⁶ Nahomi Mohabụ sịẹ mẹ ḅụ sime tẹ naam mịnẹ KỊNỊNYANAḄỌ ḅe toluma ori atomi Izirẹlị ḍiki tẹ fịye kẹ ịn pịrị tẹ nwẹn ḅẹẹ sakị, á nwẹnị árị owiapụ-awọmẹ ma tapụ ma ọkị á ḅụụ sọ tẹ Mohabụ sịẹ mẹ ḅio pịkịma-so.

⁷ Anieḅụ árị owiapụ-awọmẹ ma tapụ ma nwẹnị á ḅụụ sọ tẹ árị na á sime anga mẹ ḅụ nwẹnị saakị pịkịma-so Juda ama mu.

⁸ Kụma Nahomi nwẹnị arị owiapụ-awọmẹ tapụ ma ḅẹẹ, “Ó soo, ọrụḅọ-ọrụḅọ pịkịma so mḅọ iyingiḅọ warị muu. Yee KỊNỊNYANAḄỌ ḅe iḅi ḅara kẹ ọmịnị na mịẹ, ọ́ wẹrịtẹ iḅi ḅara kẹ fịtẹ-apụ ma na ị̀ na mịẹ ḅara.

⁹ KỊNỊNYANAḄỌ ḅe minini ọ́ pịrịị, mịẹtẹ ọmịna aḅụụ gbọrụḅọ-gbọrụḅọ pịkị siin iḅi owiḅọ sime, tẹ ḅụụ-dein nyana.” Anịtẹso á nwẹnị ḅaaḅaa! kẹ ịn ḅẹẹ ḅara ḅụ ekpe kẹ gbọrụḅọ gbọrụḅọ lama, tẹ ịn nwẹnị ịna apọkọ saakị tẹ tẹmẹ-la owu kọn.

¹⁰ Ịn nwẹnị á ḅẹẹ, “Ẹn-ẹn, wa ị́ ḅụụ sọ tẹ ị́ na pịkịma ị́ atomi ḍọkụma-mu ḅa.”

¹¹ Kụma Nahomi nwẹnị ḅẹẹ, “Ọmịnị ọḅụ pịkịị, ì eremịna-awọmẹ, ó tiegotẹ ị̀ ḅụụ sọ tẹ ị̀ na so ḅẹ? À paa pịkị inetẹ siin owiapụ-awọmẹ iyi tẹ ịn ḅo ọmịna adiapụ sọ ḅẹ?

¹² Ọmịnị ọḅụ pịkị tẹ so ọmịna etela daa, ì eremịna-awọmẹ, kẹ gotẹ ọkọ ḅẹẹarị, àrị omongi ḅaka tẹ owiḅọ sime ḅụ. À nwẹnị ḅẹẹm à ḅiokpọ wararị, tẹ mị ḍin mẹ ḅụ owiḅọ sime tẹ owiapụ-awọmẹ iyi sọ,

¹³ ọ́ ḅọrọ anịẹrẹsị koru nwenii ịn ḍụḅa tẹ ḅo ó sime ḅẹ? Ọ́ ḅọrọ anịẹrẹsị owiapụ kụnma ḅẹ? Ẹn-ẹn, ì eremịna-awọmẹ, anị akụ ị̀ pịrị ọ́ nẹngịm, kẹ gotẹ ọkọ ḅẹẹarị, KỊNỊNYANAḄỌ ḅe anie mị fomu-ḅara mẹ kẹ ị̀ pịrị yee.”

¹⁴ Anịtẹso ịn nwẹnị pịkị siin ịna apọkọ saakị tẹ tẹmẹ-la owu kọn; tẹ Ọpa nwẹnị á di iyingi ma fịnama tẹ ḅaaḅaa kẹ á ḅẹẹ tẹ pịkị-so; kụma Rufu á ḅụụ ḅụ oḅolo simem.

¹⁵ Nahomi nwẹnị Rufu ḅẹẹ, “Ḍikii, ị́ ịyịmbara ị̀ ma árị ọḅụ pịkị tẹ so árị atomi na árị oru-atamụnọ na ḍọkụma-mu tẹẹ, anịẹrẹsị ị́yẹrị sọ pịkịma ị́ ịyịmbara ma ḍuka-soo.”

¹⁶ Kụma Rufu nwẹnị ḅẹẹ, “Tẹmẹ-la ḅara kẹ àrị í koroma-soo ḅii ma, anịanịa í ḍukamẹnjị ḅụ pịkịma-so; kẹ gotẹ ọkọ ḅẹẹarị, í mu anga, mu anga à mu ḅa; ị́ anga yọ anga yọ, àrị anga ḅa; ị́ atomi, ị̀ atomi sọ ḅa; anịsakị ị́ Tamụnọ, ị̀ Tamụnọ sọ ḅa;

¹⁷ ị́ fịị anga, fịị anga ḅụ à fịị ḅa, anịsakị anịjụ ini ì ḍiḅi ḅa. Yee KỊNỊNYANAḄỌ ḅe ọkọ mịẹ ị̀ pịrị, pịkị ọkọ nẹngị ḅara sọ mịẹ, fịị nwẹnị ị́ ḅụụ ḅụ ì puu sikimam ḅẹsọ.”

¹⁸ Nahomi Rufu á ḅioḅẹngbọ mẹmgba kẹ minini tẹ á ḅụụ sọ tẹ árị na so ḅarịye mẹ lekiri tẹso, á ḅarị jen-maaịn kẹ, “pịkịma-soo” kẹ á ḅẹẹ-a.

¹⁹ Anieḅụ ini maa apụ ma mẹnjị ma-mu nwenii in mu Bẹtịlịhẹmụ lam. Ịn ḅo Bẹtịlịhẹmụ la tẹso, bebe ama mẹ nwẹnị ịn gotẹ jike; tẹ ereme ma nwẹnị gbela, “Karakaraye, mie Nahomi mọọ?”

²⁰ Á nwẹnị ịn ḅẹẹ, “Ọ́ ḅarị Nahomi kẹ ị̀ sịn ma, ọ́ Mara kẹ ị̀ sịịn, kẹ gotẹ ọkọ ḅẹẹarị, Kụrọmamgba Nyanaḅọ ḅe ḅẹlẹma ḅụụ akụma ḅara kẹ ị̀ na mịẹ tẹẹ.

²¹ À ḅintẹ ḅara kẹ paka-som, tẹ KỊNỊNYANAḄỌ ḅe footẹ ḅara kẹ ị̀ pịkịma-ḅo tẹ. Ó tiegotẹ Nahomi kẹ ì sịn-arị, Kụrọmamgba Nyana KỊNỊNYANAḄỌ ḅe ị̀ sịkị tẹ ḅụụ-fụka kẹ ị̀ ọgọnọ gbana tẹ nwẹn ḅẹẹ sakị?”

²² Mị-ḅara mie Nahomi pịkịma-ḅo ḅara, tẹ Rufu Mohabụ ḅẹ ḅọ, á tụḅọ ta, tẹ Mohabụ ḅẹ opu sịẹ mẹ ḅụ pịkịma-ḅo ḅọ ma á ḅụụ sọ tẹ árị na ḅom. Ịn ḅo Bẹtịlịhẹmụ lam ịn Suku-saakị ịn kẹ bali sịn fịye mẹ sokuarị sakị ḅụ.