Romu 7 - FỊAFỊA BAỊBỤLỤ

Ama-Na-Ere-Na Gboloma Oloko Kẹ Tọnma

¹ Ị̀ amịnapụ, piki-pikiye-ofori ḅara ḅụ ọmịnị-mgba à ḍuko ḅẹ-yearị ye mẹ fiearị ye naa ḅa, oloko gboloma ye nimi wararị apụ ḅara ḅụ. Tomi ḍumo wararị sakị ngẹrị mie oloko ịna ḅụụ kụrọ nyana ye.

² Kẹ tọnma ḅụ, owiḅọ sime wararị ẹrẹḅọ, á di ḅe ḍumo wararị sakị ḅụ mie oloko árị ọlọ ye ọ̀ ḅụụ ḅụ, kụma ọ̀ fịị tẹ ḅẹḅẹ á kẹ ọ̀ ḅụụ fịna sime oloko mẹ ḅarị á ḅụụ kụrọ nyana-a.

³ Á di ḍumo wararị tẹ á mu jen owiḅọ na anga, anga, ịn sẹfị-ẹrẹḅọ kẹ á sịn ḅa; kụma á di ḅẹ fịị tẹ ḅẹḅẹ oloko ḅarị árị ọlọ-a, á ḅarị pịkị sẹfị-ẹrẹḅọ ẹrẹ fị-a, á jụmọ sime sọ.

⁴ Ị̀ amịnapụ, mie anị sime ọmịnị sọ pịrị ḅara. Oloko mẹ kịngẹ kụma ọ́ Kịrayịsị ḅụụ sọ tẹ fịị anị pịrị tẹ mẹ, anị ḅarị ọmịnị ọlọ-a. Kụma mịọkụ ó sime fị-ḅụ-saakị tẹ ḅọ ḅe pịrị tẹ, mịẹtẹ ọmịnị iḅi kọrịnama kọrị Tamụnọ pịrị ḅẹ ḅara.

⁵ Wa wamịna si sime-ḅara mẹ ḅii ḅara anga sime sakị, Oloko mẹ oju mẹ sọlịmarị si-aị ma jike saakịmam wamịna oju ḅio tẹ anị kọrịnama kọrị fịị pịrịm.

⁶ Mịọkụ wa Oloko mẹ ikoli ḅio paka-ḅo tẹ, anie wa fịị anị pịrị tẹ ẹrẹsị. Wa ḅarị jen kẹ kẹẹ koro wararị oloko mẹ ḍukamẹnjị-a, kụma Tẹmẹ ḅe ịwọ etela mẹ mie wa ḍukamẹnjịarị.

Oloko Na Si Na

⁷ Ndẹẹ wa ḍuko ḅẹ ye? Oloko na si na gberie mụnọọ? Ọkọ-a. Kụma Oloko mẹ anie mịẹtẹ à si nimi ye. Oloko mẹ ḅẹẹm, “Jụmọ nye mọnị ma”, anieofori à tọ-ḅara mịẹ tẹ ye mọnị siye ḅara nimi ḅẹ?

⁸ Kụma anị oloko mẹ ḅụ mie si ḅọrọ tẹ ì oju ḅio ye sọlịma na-iḅi-a ye goyegoye na jike saakịma ye. Oloko mẹ ofori kụma si sọ fịị tẹ.

⁹ Oloko ofori sakị à ḍumo simem; kụma oloko ḅo tẹso, si nwẹnị virikama saakị,

¹⁰ tẹ à nwẹnị fịị. Tẹ ì ḍumoma ḅẹ ḅo oloko mẹ rẹ ḅo ị̀ ḅaa ye sọm.

¹¹ Oloko ḅụ mie si otolo ẹrị tẹ ḅo oḅori kẹ ị̀ sịn ye; Oloko ḅụ mie si ḅọrọ tẹ ị̀ ḅaa ye.

¹² Anie ḅụ Oloko mẹ fịafịam, anị tọn koroma ye mẹ sọ fịafịam, kuram, pịkị iḅim.

¹³ Anị kụma iḅiye mẹ rẹ ḅo ị̀ ḅaa ye sọ tẹ? Gbọrụ ḅọkọ sọ ḅụ-a. Si mie mịẹ ye. Iḅiye mẹ ḅụ mie fịị ḅọrọ ḅo ị̀ la ye, anị amịna sime si ḅara mẹ ḍie-pakama ḅẹ ḅara. Mie ḅụ oloko mẹ tọn koroma ye mẹ ḅụ mie si kpọma ḅalafama ḅara kẹ amịna ḅụụ ḍie giregirema ye.

Tomḅọ Oju Ḅio Simearị Nụnụa Mẹ

¹⁴ Wa nimi wararị Oloko mẹ anie tẹmẹ ḅụ ḅẹ ye; kụma yẹrị meni-oju sụa tomḅọ, tẹ ịn kẹ si dẹrị tẹ ḅọ.

¹⁵ À mịẹarị ye fiearị ye sọ à nimi-a. Arị à mịẹ ḅẹ ḅiiarị ye mẹ mịẹ ḅẹ nakara, à ḍiki-ḅioḅuarị ye mie à mịẹarị ye.

¹⁶ Arị à mịẹ ḅẹ ḅii-a ye mịẹarị ye mẹ fiearị mịnẹ Oloko mẹ karakara ḅụ emi.

¹⁷ Anie ḅụ ì oju ḅio koko sime wararị si mẹ, mie ye mẹ mịẹarị ye, yẹrị-yaa.

¹⁸ À pịkị nimi wararị mịnẹ ị̀ ḅụụ ḅio gbọrụ iḅi sọ ofori, anie ì tomina si sime-ḅara mẹ ḅụ mie à ḅẹẹarị ye. Kẹ gotẹ ọkọ ḅẹẹarị, arị iḅiye mịẹ ḅẹ tọn sọ arị inetẹ mịẹ-a.

¹⁹ À mịẹ ḅẹ-ḅiiarị iḅiye mẹ à mịẹ-a, anie nakara à mịẹ ḅẹ ḅii-a siye mẹ rẹ mie à mịẹarị ye.

²⁰ Àrị à mịẹ ḅii-a ye mịẹarị mẹ fiearị mịnẹ mịẹarị ḅọ mẹ yẹrị-yaa; anie nakara ị̀ ḅụụ ḅio angarị si mẹ.

²¹ Mie ḅụ à kẹ ye ẹrị ḅara, anị gbala ḅọrọ oloko sọ tẹ mịnẹ, arị iḅiye mịẹ ḅẹ ḅii sakị, ḅii sakị siye, siye mie à sẹlẹ-ọkị tẹ mịẹarị ye.

²² Ị̀ tẹmẹ suku-ḅio à Tamụnọ oloko mẹ ḍiki ḅioḅẹlẹarị,

²³ kụma arị ẹrị ḅara, jen oloko anie oju ḅẹ meni mẹ ḅio kọrịnama kọrịarị ye, tẹ anị oloko mẹ nwẹnị ị̀ tẹmẹ minini ọkị oloko mẹ na ye-nụnụarị, tẹ nwẹnị ị̀ kẹ omoni sọma ì oju ḅio simearị si oloko mẹ pịrịarị.

²⁴ Yei, à fa tẹẹ! Tụḅọ ị̀ kẹ ḅaa ḅẹ-muarị oju mẹ ḅara ḅio ị̀ pụkọ-pakamaḅo ḅẹ?

²⁵ Àrị ịmịẹtẹ kẹ Tamụnọ ḅẹẹm, anie Wanyanaḅọ Jizọsị Kịrayịsị ḅụ miemẹ kọrị ị̀ pịrịarị ḅọ ḅe! Mie gbala ye ị̀ na sime-ḅara: ì kuroma ḅụ ngẹrị mie arị inetẹ Tamụnọ oloko kokoarị ye, tẹ nwẹnị ì meni-oju ḅụ tomina si sime-ḅara ḅẹ oloko mẹ kokoarị.