Romu 5 - FỊAFỊA BAỊBỤLỤ

Tamụnọ Ḅụ Karakara

¹ Mịọkụ minini ḅụ wa ḅọrọ tẹ Tamụnọ ḅụ karakara tẹ ḅara, wa Nyanaḅọ Jizọsị Kịrayịsị ḅụ wa ḅọrọ tẹ Tamụnọ na dein anga kọn tẹ.

² Minini ḅụ ọ̀ mịẹtẹ wa Tamụnọ ḍiki-ḅụụjịrị mẹ nyana tẹ anị ḅụ ḍumoarị. Tamụnọ ebube mẹ ḅụ wamịnị sọ ḍiekiri nyana tẹ ye mẹ ḅụ ḅẹ ḅiokpọ mẹ wa anị kẹ ḅụụ-tọn-arị.

³ Wa wamịna ḅụụ-fụka ma sọ kẹ ḅụụ-tọn-arị, gotẹ ọkọ ḅẹẹarị, ḅụụ-fụka ḅụ mie wa ḅọrọ tẹ ye inema ḍawọarị ye,

⁴ tẹ ye-inema mịẹtẹ Tamụnọ wamịna ḍumo bomarị, tẹ anị nwẹnị ḅiokpọ kẹ wa pịrịarị.

⁵ Tamụnọ ọ̀ kẹ ḍie wa pịrị wararị Fịafịa Tẹmẹ ḅe ḅụ ḅọrọ tẹ ḅẹlẹma kẹ wamịna ḅioḅẹngbọ ḅụ ọsụma sara tẹ ẹrẹsị, wa nyana ḅiokpọ mẹ ḅarị papaaye sọ-a.

⁶ Gbala mịẹ-mịẹ ọkụ wamịnị na ofori ogbo mie Kịrayịsị ḅo Tamụnọ tọn sakị ḅụ si-sịḅịḅio-sụapụ gotẹ fịị ye.

⁷ Sarasara-a tomḅọ karakaraḅọ gotẹ fịị, tomi-juḅẹye ja sakị tomḅọ iḅi-ḅọ kọn ḅẹ fịị ọkị kọn ḅẹ ḍọkị ḍọkịm ḅẹsọ.

⁸ Kụma Tamụnọ kẹ ọ̀ wa ḅẹlẹma la ḅara kẹ wa ḍie ye anie, wamịnị paa si-mịẹapụ wararị ogbo, Kịrayịsị fịị wa pịrịm.

⁹ Ọ̀ fịị mẹ wa kẹ Tamụnọ tọrọkọ karakara atomi sọma tẹ. Ọkọ nẹngị ḅara ọ̀ pịkị nwẹn kẹ Tamụnọ ịganị ḅụ wa ḅọrọma ḅa.

¹⁰ Tarị tarị wamịnị anie Tamụnọ na fịya-a apụ, kụma ọ̀ Tụḅọ ḅe fịị ḅụ ọ̀ wa kẹ ori ikiapụ sọma tẹ. Mịọkụ wa ḅo Tamụnọ ikiapụ sọ tẹ ḅẹ sakị, Kịrayịsị pịkị ọkọ nẹngị ḅara kẹ wa ḅọrọma ḅa ò ḍumo ḅụ.

¹¹ Kụma anie ngẹrị-a, wa Nyanaḅọ Jizọsị Kịrayịsị ḅe tẹ wa kẹ Tamụnọ ikiapụ sọma ḅọ ḅe ḅụ, wa ḅọrọ tẹ Tamụnọ ḅụ ḅioḅẹlẹ nyana tẹ.

Adamụ Na Kịrayịsị Na

¹² Si gbọrụ tomḅọ ḅụ ḅọrọ ḅo tomikiri sọ tẹ fịị dogi-ḅom. Mị-ḅara ḅụ ḅẹḅọ-ḅẹḅọ si mịẹ tẹ ẹrẹsị, fịị bebe tomikiri mẹ kana-koro tẹ.

¹³ Oloko amụ sụa-a sakị si tomikiri simem, kụma oloko ofori anga ịn kẹ tomina asi kịẹn-kịẹn ye ofori.

¹⁴ Adamụ ḅụọ ḅụ ọkị mu Mozizi ḅụọ la tomi fịị simem, tẹ Adamụ Tamụnọ ḅịḅị kan tẹ mịẹ si mẹ mịẹ-a apụ sọ fịịm. Ḅị Adamụ ḅe anie ịn kẹ ḅo ḅarị ḅọ ḅe tọnma ḅọ.

¹⁵ Kụma maaịn ma gberie-a, kẹ gotẹ ọkọ ḅẹẹarị Tamụnọ kẹ papaa ḍie tomi pịrịarị ye na Adamụ si na kịka-a. Tomi-juḅẹye mịnẹ gbọrụ tomḅọ si ḅụ tọnwa-apụ ḅọrọ tẹ fịịm. Kụma Tamụnọ ḍiki-ḅụụjịrị mẹ ḅaka lama ḅara ẹrẹsị anị ḅị gbọrụḅọ, Jizọsị Kịrayịsị, ḅe ḅụ ḅọrọ mu tọnwa tomi la tẹ.

¹⁶ Tamụnọ ḍiepịrịye mẹ na gbọrụḅọ mịẹ si mẹ na ḅụ kịrị pịkị emii. Gbọrụḅọ mịẹ si ḅẹrẹ-ḅarasii dogi-ḅom, kụma tọnwa-apụ mịẹ asi ḅụ mie Tamụnọ ḍiki-ḅụụjịrị ḅụ tomi nyana gbẹẹ-a ḅẹrẹ-ḅaraiḅi ḍiepịrịye ḅo yee.

¹⁷ Karakaraye, gbọrụḅọ mịẹ ḅo si fị dogi-ḅo tomi mamgba pịrịm, kụma Jizọsị Kịrayịsị ḅe gbọrụ iḅi kọrịnama mẹ ḅụ ḅo iḅiye mẹ tẹịn lamam. Kụma Tamụnọ opu ḍiki-ḅụụjịrị mẹ nyana tẹ apụ mamgba, ịn mịẹ iḅi ofori ḅara ḅụ, tẹ Tamụnọ kẹ ọ̀ ḅụụ ḅụ karakara kiri ḅụ wẹrịtẹ apụ ma, ịn Kịrayịsị ḅụ ḅọrọ tẹ ḍumo tẹ ama-da ḅa.

¹⁸ Anie ḅụ, gbọrụḅọ si-mịẹapụ mamgba kẹ ḅẹrẹ-ḅarasii ḅụ suu ḅara, anie gbọrụ karakara mịẹ pịkị tomi mamgba ḅọrọma tẹ in ḍumo tẹ ḅara.

¹⁹ Anie anị pịkị sime-ḅara, gbọrụ tomḅọ ḅịḅị poki-a inweni-mgba kẹ si-mịẹapụ sọma ḅara anie gbọrụḅọ ḅịḅị poki pịkị Tamụnọ tọrọkọ inweni-mgba kẹ karakara kiri ḅụ sịẹma ḅarị ḅara.

²⁰ Oloko sụa ye anie kuraye mịẹ-a kẹ ḅin ye, kụma si ọkọ kẹ ḅin tẹ anga Tamụnọ ḍiki-ḅụụjịrị pịkị ḅin ḅaka tẹ.

²¹ Anị sime-ḅara ḅụ, si fịị ḅụ ḅọrọ tẹ ḅẹrẹtọn ḅara, anie Tamụnọ ḍiki-ḅụụjịrị mẹ sọ karakara mịẹ ḅụ ḅọrọtẹ ḅẹrẹtọn-arị ḅara, tẹ nwẹnị wa kẹ mu sime gbamaso ḍumo lamarị, Jizọsị Kịrayịsị wa Nyanaḅọ ḅe ḅụ.