Romu 4 - FỊAFỊA BAỊBỤLỤ

Ebira-amụ Ḍumo Mẹ Minini Nyana Kụrọ Ḍie-pakamarị

¹ Ó yee wa wamịna elemu ḍaḅọ Ebira-amụ kẹ tọnma, ọ̀ ḅụụ anị tọ-ḅara sime ḅoto.

² Ọ̀ kọrịnama anie Tamụnọ kẹ karakara kịẹn ọ̀ pịrị ye namịna, mimgbe ọ̀ kẹ ḅụụ-boma ḅẹ ye paka tẹ, kụma Tamụnọ tọrọkọ ḅụ-a.

³ Fịafịa Ḍiri mẹ ḅẹẹm, “Ebira-amụ Tamụnọ ḅụ nyana minini gotẹ Tamụnọ ọ̀ kẹ karakara mịẹḅọ ḅara ọkịm.”

⁴ Tomḅọ kọrịnama kọrị tẹ ịn kẹ mḅọ gbẹẹarị ye mẹ ḍiepịrịye-a, anie mḅọ nyana na-iḅi gbẹẹ-ye.

⁵ Tomḅọ nwẹnị minini ḅụ sịrẹrẹ, tẹ kọrịnama kẹ ḅiokpọma-a, tẹ Tamụnọ minini kụma, ori ḅị Tamụnọ ḅe tẹ si-mịẹapụ kẹ iḅi kiri sịẹmarị ḅọ ḅe, mḅọ minini mẹ kẹ karakara mịẹ sọma tẹ mḅọ kẹ karakara ḅụ wẹrịarị ọ̀ ḅụụ ḅụ.

⁶ Tamụnọ tomḅọ kọrịnama ḍiki-a ḅara kẹ karakara mịẹ tọrụ kẹ mḅọ ḍiki tẹ ḅẹḅẹ mḅọ ḅo Devidi ḅẹẹ ḅara mẹ sime tẹ mịnẹ:

⁷ “Tamụnọ mịẹ-irima ḍiki-tọrụsin pịrị tẹ apụ ma in ḅioḅẹlẹẹ, ini ma tẹ ò si-wẹrịso pịrị tẹ apụ ma!

⁸ KỊNỊNYANAḄỌ ḅe si kịẹn pịrị-a ḅọ mẹ mḅọ ḅioḅẹlẹẹ!”

⁹ Devidi nwẹn ḅẹẹarị boma mẹ anị sime tarị-ḅụụ sin tẹ apụ kịngẹ pịrị? Gbala-gbala ọkọ-a. Anị sime tarị-ḅụụ sin-a apụ sọ pịrịm. Mie Fịafịa Ḍiri mẹ tẹ gotẹ tẹ ye mẹ: “Ebira-amụ Tamụnọ ḅụ nyana minini anie Tamụnọ gotẹ ọ̀ kẹ karakara mịẹḅọ ḅara ọkị ye.”

¹⁰ Tọ sakị miemẹ mịẹ? Ebira-amụ tarị-ḅụụ sin tẹrẹmẹ Tamụnọ ọkọ kẹ ori ọkị mụnọọ, amụ ọ̀ tarị-ḅụụ sin-a ogbo? Amụ ọ̀ tarị-ḅụụ sin-a ogbo Tamụnọ ọkọ kẹ ori ọkịm, ò sin tẹrẹmẹ-a.

¹¹ Anie ḅọrọ tẹrẹmẹ ọ̀ tarị-ḅụụ siinm, tẹ ọ̀ tarị-ḅụụ sin mẹ nwẹnị amụ ọ̀ tarị-ḅụụ sin-a ogbo nyana tẹ Tamụnọ ọ̀ kẹ karakara mịẹ ḅọ ḅara ọkị ye mẹ ḅẹ elekima sọm. Mie ḅụ, tẹmẹ anga ḅụ, Ebira-amụ ḅo Tamụnọ ḅụ minini nyana apụ mamgba ḍaḅọ sọ tẹ, anie Tamụnọ kẹ karakaraye-mịẹapụ ḅara ọkị tẹ apụ ma, tomi-juḅẹye amụ ịn tarị-ḅụụ sin-a ḅẹ sọ.

¹² Ori anie pịkị tarị-ḅụụ sin tẹ apụ ma ḍaḅọ, anie tarị-ḅụụ sin tẹ pịkị wamịna ḍaḅọ Ebira-amụ ḅẹ amụ tarị-ḅụụ sin-a tẹ kọn minini ḍumo mẹ kọn-arị apụ ma.

Tamụnọ Minini Tomi Pịrị Ye Mẹ Minini Ḅụ Mie Anị Ḅo Ḅara La, La Yee

¹³ Tamụnọ minini Ebira-amụ na ò furo-ḅẹ-apụ na pịrịm mịnẹ ịn tomikiri mẹ nyana ḅa ḅẹẹ ye mẹ, ọ̀ mịẹm, Ebira-amụ Oloko mẹ koko ye ḅụ-a, kụma ò minini ḅụ mie Tamụnọ ọ̀ kẹ karakara mịẹḅọ ḅara ọkị ye.

¹⁴ Oloko koko apụ mie Tamụnọ minini tomi pịrị ye nyana, nyana ye ḅẹ kụma tomḅọ Tamụnọ ḅụụ nyana minini ḅo papaaye sọ tẹ, tẹ Tamụnọ minini ye mẹ sọ ḅarịye ḅụ ofori.

¹⁵ Tamụnọ ịganị anie Oloko mẹ dogi-ḅoarị ye, oloko ofori anga oloko kan pịkị ofori.

¹⁶ Mie ḅụ Tamụnọ minini ye mẹ sime Tamụnọ ḅụụ minini nyana apụ pịrịm, mịẹtẹ anị giregire ḅarị ḅara mịnẹ Tamụnọ ḍiki-ḅụụjịrị ḅụ mie anị sịrẹrẹ wararị ye ḅẹ sakị anị sime Ebira-amụ awọmẹ mamgba pịrịm, anị sime papaa Oloko koko apụ kịngẹ pịrị-a, kụma Ebira-amụ Tamụnọ ḅụ minini nyana ḅara kẹ minini nyana apụ sọ anị sime pịrịm. Anị sime-ḅara ḅụ Ebira-amụ ḅe anie wamịnị-mgba ḍaḅọ tẹmẹ anga ḅụ.

¹⁷ Anie Fịafịa Ḍiri mẹ ḅẹẹ ḅara, “Arị ị́ kẹ ḍa sọma tọnwa asịẹ pịrị tẹ.” Mie ḅụ, minini ye mẹ bebe ye sọ tẹ mẹ Tamụnọ ḅarana anị minini tẹ, anie Ebira-amụ ḅụụ ḅụ minini nyana Tamụnọ ḅẹ, fịtẹ-apụ saakịmarị Tamụnọ ḅe, tẹ tọn tẹ tarị tarị ḅụ ofori aị pakama-ḅo ḅọ ḅee.

¹⁸ Ebira-amụ minini nyana tẹ pịkị ḅiokpọm, ye ḅarị ḅiokpọma ḅara sime-a sakị sọ, tẹ anị ḅụ ḅọrọ tẹ “ḍaḅọ sọ tọnwa asịẹ pịrịm.” Anie Fịafịa Ḍiri mẹ paa ḅẹẹ ḅara, “Í furo-ḅẹ-apụ ma lolia sara ḅara sara ḅa.”

¹⁹ Ebira-amụ ḅe kụra sọnọa si pembe ye ọ̀ sịḅị ḅọrọ tẹ anị sakị ḅụ, tẹ ọ̀ kpọma omongi tẹ, ori oju sọ fịị fịị ḅara sime tẹ, ọ̀ ta Sera sọ ḅarị iyi ḅịa ḅara la tẹ sọ, ò minini paa jike-a Tamụnọ ḅụ.

²⁰ Tamụnọ ḅụ ọ̀ nyana minini mẹ ọ̀ ḅụụ so-a, ọ̀ pịkị Tamụnọ minini ye mẹ ḅụ ḅio-maaịn-tọn-a; ọ̀ nyana minini mẹ nwẹnị kụrọ kẹ ọ̀ ḅụụ ḅio suu, tẹ ọ̀ nwẹnị Tamụnọ tokini.

²¹ Ò nimi lamam mịnẹ Tamụnọ inetẹ ò minini tẹ ye mẹ mịẹ ḅa.

²² Anie mẹ mie Tamụnọ gotẹ Ebira-amụ nyana minini mẹ ḅụ ḅọrọ tẹ ọ̀ kẹ karakara mịẹḅọ ḅara ọkị ye.

²³ “Ọ̀ karakara mịẹ ḅọ ḅara kẹ ori ọkịm” nwẹn ḅẹẹ ẹkwẹn ma ori ngẹrị gotẹ kẹẹ koro-a.

²⁴ Arị kẹẹ wamịnị sọ pịrịm, anie fịị ḅụ wa Nyanaḅọ Jizọsị Kịrayịsị saakịma ḅọ ḅe minini tẹ ịn kẹ karakaraye-mịẹapụ ḅara ọkị tẹ apụ ma.

²⁵ Kẹ gotẹ ọkọ ḍukoarị ye anie, wamịna asi ma mie in gotẹ ọ̀ ḅaa ye, tẹ Tamụnọ fịị ḅụ ọ̀ saakịmam, ọ̀ wa kẹ Tamụnọ ḅụụ karakara ḅụ wẹrị ḅẹ ḅara.